Yohane 6
6
Yesu disi bakpa kɔrʋɔsɛ sɛ nʋŋ adiya
Matiyo 14:13-21; Maakɩ 6:30-44; Luka 9:10-17
1Saŋa garɛ wʋrʋgbɩɛ na, Yesu tɩɛsɛ Galaliya Ɔpʋ ju gatɩɛsa [gaa baa yagɛ sɛ Tiberiya Ɔpʋ], 2sɛ jama fɔɩ kpaŋ ɩ akala takɩɛ ba na adaŋgana daasɛ ŋii wʋ yɩɛ sɛ wʋ chɔ lʋmɩɛtina na. 3Sɛ Yesu ju bʋrɔŋ garɛ dʋɔ ga cha wʋ na wʋ kpalɛnara baa. 4Yudatina nyiŋi asadi adiya di ŋii tirina.
5Gʋ Yesu jiŋna wʋ asa kɩɛ na wʋ jama fɔɩ a kɔŋ wʋ jaŋ na, sɛ wʋ tasɛ Filipo sɛ, <<Le sɛ dɩɩ yu adiya lɩɛ fa bakpa bana na baa di?>> 6Wʋ tasɛ ŋina na wʋ a mʋ yɩɛ ɩ lɔ tɩba bɛ, wʋ fɩla wʋ jiŋ bʋrʋ gaa wʋ a yɩɛ na.
7Sɛ Filipo lɩsɛ ɩ nʋɔ sɛ, <<Gafɩtasɛ jiŋinara kɩmtʋɔ#6:7 Gafɩtasɛ jiŋinara kɩmtʋɔ yɩɛ aterembie dinari gafɩsɩ ala gba ba aa dɩlɛ lɩɛ adiya chonii fa ba wʋrʋ na wʋ a di i.>>
8Sɛ Yesu kpalɛnara baa tɩba wʋrʋ wʋŋ baa yagɛ sɛ Andurusi, wʋŋ wʋ yɩɛ Simoŋ Petero wʋnabu tawɩ sɛ, 9<<Wʋchaa baalɛ wʋrʋ wɩɛ jɩna, wʋ wɩɛna bodobodo anʋŋ na aji pii bala. Ama be sɛ ŋina aja dɩlɛ yɩɛ fa bakpa fɔɩ bana?>>
10Sɛ Yesu tawɩ ba sɛ, <<N yela baa cha.>> Kasɛ fɔɩ wɩɛ dɩmaŋ sɛ baala laŋ cha, baa yɩɛ kɔrʋɔsɛ sɩ nʋŋ (5,000). 11Yesu mʋ bodobodo ŋii sɛ wʋ yɩlɩ Ɩsʋɔ sɛ wʋ kpara fa baa ba chaɩ na ganaŋkʋ baa jawʋ. Dɩmʋŋ sɛ wʋ yɩɛ aji ŋii gba.
12Gʋ ba kpiniŋ ba di pa na, sɛ wʋ tawɩ wʋ kpalɛnara baa sɛ, <<N tɔɔsɩ ŋii ba di kakaa na. N baa yela ŋarɛ a dʋɔ warɩɛ.>> 13Dɩmʋŋ dʋɔ ba tɔɔsɩ bodobodo anʋŋ ŋii ba di kakaa na su gachaŋasɛ gifi ala.
14Gʋ bakpa baa na adaŋgana daasɛ ŋii Yesu yɩɛ wʋrʋgbɩɛ na, ba faara baa tawɩ sɛ, <<Gasiŋteŋ wina n nyina Ɩsʋɔ Ɔja wʋŋ wʋ a kɔŋ dulunya naŋ na.>> 15Gʋ Yesu jiŋ gʋ baa ja baa yɩɛ ɩ juo doŋ dʋɔ na, wʋ ti bɔrɛ ju bʋrɔŋ gaa dʋɔ wʋ nyiŋeŋ.
Yesu pala lɩŋ dʋɔ
16Gʋ bʋyanɔ talɛ na, wʋ kpalɛnara baa ju lɩɩ gaa nʋɔ, 17dɩmaŋ sɛ ba jʋʋ buori naŋ tɩɛsɛ ju Kapeniyum. Na tɩɛtam yela Yesu n kɔŋ ta ba jaŋ ŋ. 18Na feliŋ janɛ a jʋɔ sɛ apaa jɔ lɩŋ ŋii dʋɔ. 19Gʋ Yesu kpalɛnara baa pala mayili atoro yaa atoro na salɛ na, ba na Yesu wʋ doŋ lɩŋ ŋii dʋɔ wʋ a tirina buori gaa, sɛ nyɩŋtɩɛ chaŋ ba. 20Ama wʋ tawɩ ba sɛ, <<Maŋ bɛ, n baa yɩɛ nyɩŋtɩɛ.>> 21Nafʋɔ ba ja sɛ baa mʋ ɩ dʋ buori gaa naŋ. Gabʋanaŋ sɛ buori gaa tala lɩɩ gaa nʋɔ diele gaa baa ju na.
22Gʋ tɩɛna na, jama baa ba dʋɔ lɩɩ gaa nʋɔ gatɩɛsa na, ba na gʋ buori garɛ damɩɛɩ dɩmaŋ na Yesu n jʋʋ buori gaa naŋ wʋ kpalɛnara baa jaŋ ŋ. Ama ba laŋ ba nyiŋeŋ. 23Sɛ buoriŋ ŋarɛ lɩɩ Tiberiya gaa daŋ diele gaa Kpaŋjuo mʋ yɩlɩ fa Ɩsʋɔ adiya ŋii dʋɔ sɛ bakpa baa di na. 24Gʋ jama baa jiŋ gʋ Yesu yaa wʋ kpalɛnara baa taŋ dɩmaŋ na. Ba jʋʋ buoriŋ ŋii naŋ ju Kapeniyum ga ja Yesu.
Yesu n nyina bodobodo gaa gaa fa nkpa
25Gʋ ba na Yesu lɩɩ gaa gatɩɛsa na, ba tasɛ ɩ sɛ, <<Wʋkalaasa, saŋa gamʋɔ sɛ n kɔŋ jɩna?>>
26Sɛ Yesu lɩsɛ ba nʋɔ sɛ, <<Maa tawɩ amɩɛ sɛ n nyii na dieli sɛ, naa adaŋgana daasɛ ŋii ma yɩɛ na dʋɔ sɛ ɩ ja maŋ ŋ, ama adiya ŋii ɩ di pa na dʋɔ. 27N baa yɩɛ dɩtʋm ja adiya ŋii ŋii warɩɛwʋ, ama adiya ŋii ŋii fa nkpa ŋii ŋɩ taŋ gɩtɛ na, ŋii sɛ Wʋkpa Bu wʋŋ aja fa amɩɛ. Akala takɩɛ Majuo Ɩsʋɔ daasɛ maŋ mʋ kalaa gʋ wʋ lɩɛ maŋ dʋ.>>
28Sɛ ba tasɛ Yesu sɛ, <<Be sɛ ŋɩ tiri gʋ dɩ n yɩɛ na a yɩɛ dɩtʋm gaa Ɩsʋɔ a jawʋ?>>
29Sɛ Yesu lɩsɛ ba nʋɔ sɛ, <<Ŋina n nyina Ɩsʋɔ dɩtʋm takɩɛ n lɩɛ wʋŋ wʋ kpiri ɩ na di.>>
30Dɩmʋŋ dʋɔ ba tasɛ ɩ sɛ, <<Be adaŋgana daasɛ sɛ nyaa yɩɛ na dɩɩ na, na dɩɩ lɩɛ nyaŋ di? Be sɛ nyaa yɩɛ? 31Daa duluŋ di adiya ŋii baa yagɛ sɛ mana#6:31 Mana yɩɛ adiya ŋii Ɩsʋɔ yela sɛ ŋɩ lɩɩ adugbe kɔŋ fa Isiraitina ifuli dʋɔ ifuli dʋɔ takɩɛ ganaŋkʋ ba sabɩɛ Sabɩɛwɩɛ ŋii naŋ si na sɛ, <Wʋ fa ba bodobodo lɩɩ Ɩsʋɔ adugbe sɛ ba n di.>#Ɛsa 16:4; Nehe 9:15; Num 78:24.>>
32Sɛ Yesu tawɩ ba sɛ, <<Maa tawɩ amɩɛ sɛ n nyii na dieli sɛ, naa Mosesi n fa amɩɛ bodobodo lɩɩ Ɩsʋɔ adugbe e, ama ma Juo n fa amɩɛ bodobodo tɩŋtɩŋ gaa ga lɩɩ Ɩsʋɔ adugbe. 33Akala takɩɛ Ɩsʋɔ bodobodo gaa n nyina wʋŋ wʋ lɩɩ Ɩsʋɔ adugbe kɔŋ wʋ a fa dulunya nkpa na.>>
34Sɛ ba tawɩ Yesu sɛ, <<Kpaŋjuo, lɩɩ jaŋ mʋ a ju fa daa dɩmʋŋ bodobodo gana.>>
35Sɛ Yesu tawɩ ba sɛ, <<Maŋ n nyina nkpa bodobodo gaa. Wʋkʋma wʋŋ wʋ kɔŋ ma jaŋ na dusoŋ baa kʋ ɩ ɩ, sɛ wʋkʋma wʋŋ wʋ lɩɛ maŋ di na, nyʋɔlɛ baa kʋ ɩ ɩ. 36Ama takɩɛ ganaŋkʋ ma tawɩ amɩɛ na, ɩ na maŋ ama ɩŋ lɩɛ di i. 37Wʋkʋma wʋŋ Juo wʋŋ mʋ ɩ fa maŋ na, aja kɔŋ ma jaŋ. Sɛ wʋkʋma wʋŋ wʋ kɔŋ ma jaŋ na, maa geŋ ɩ ɩ. 38Akala takɩɛ ma lɩɩ Ɩsʋɔ adugbe kɔŋ na maa gaa yɩɛ wʋŋ wʋ kpiri maŋ na jawʋ bɛ, ama naa ma jawʋ ʋ. 39Ŋina n nyina wʋŋ wʋ kpiri maŋ na jawʋ takɩɛ baa wʋ mʋ fa maŋ na wʋrʋ baa tʋsʋ ʋ, ama maa feŋsi ba kɔŋ nkpa naŋ dulunya dɩtamtɩŋ. 40Ma Juo jawʋ n nyina sɛ wʋkʋma wʋŋ wʋ kɩɛ Bu wʋŋ sɛ wʋ lɩɛ ɩ di na, aja yu nkpa ŋii ŋɩ taŋ gɩtɛ, na maa feŋsi ɩ kɔŋ nkpa naŋ dulunya dɩtamtɩŋ.>>
41Gʋ Yudatina baa nyii ŋina na sɛ ba faara baa fʋlʋ lɩɩna Yesu dʋɔ, akala takɩɛ wʋ tawɩ sɛ, <<Maŋ n nyina bodobodo gaa ga lɩɩ Ɩsʋɔ adugbe kɔŋ na.>> 42Sɛ ba tawɩ sɛ, <<Naa Yesu mɩnaŋ, Yosefu bu wʋŋ dɩ jiŋ wʋ juo na wʋnaa naa? Sɩnɛ sɛ dɩtɩɛna wʋ a dɩlɛ tawɩ sɛ ma lɩɩ Ɩsʋɔ adugbe kɔŋ?>>
43Sɛ Yesu tawɩ ba sɛ, <<N yela amɩɛ nyiŋeŋ-nyiŋeŋ fʋlʋ>> 44Sɛ Yesu tawɩ sɛ, <<Wʋrʋ baa dɩlɛ kɔŋ ma jaŋ ŋ, amʋɔ Juo wʋŋ wʋ kpiri maŋ na tuna ɩ tirina, na maa feŋsi ɩ kɔŋ nkpa naŋ Ɩsʋɔ dulunya dɩtamtɩŋ. 45Ɩsʋɔ bajana sabɩɛ si sɛ, <Ɩsʋɔ aja kalaa ba kpiniŋ.> Wʋkʋma wʋŋ wʋ a nyii Juo wʋŋ jaŋ sɛ wʋ kpalɩɛna lɩɩ wʋ jaŋ na, a kɔŋ ma jaŋ. 46Wʋrʋ n na ta Juo wʋŋ ŋ amʋɔ wʋŋ wʋ lɩɩ Ɩsʋɔ jaŋ na nyiŋeŋ n na Juo wʋŋ. 47Maa tawɩ amɩɛ sɛ n nyii na dieli sɛ, wʋŋ wʋ lɩɛ di na wɩɛna nkpa ŋii ŋɩ taŋ gɩtɛ. 48Maŋ n nyina bodobodo gaa gaa fa nkpa. 49Amɩɛ duluŋ di mana ifuli dʋɔ ama ba sɩŋ. 50Ama bodobodo gaa ga lɩɩ Ɩsʋɔ adugbe kɔŋ jɩna mɩnaŋ, gaa wʋkpa aja di sɛ wʋ aa sɩŋ ŋ. 51Maŋ n nyina nkpa bodobodo gaa ga lɩɩ Ɩsʋɔ adugbe kɔŋ na. Wʋkʋma wʋŋ wʋ di dɩmʋŋ bodobodo gana na, aja cha gakpaa. Dɩmʋŋ bodobodo gana yɩɛ ma wʋsɛ tanɛ bɛ, gaa maa mʋ fa na dulunya a yu nkpa.>>
52Sɛ Yudatina baa faara baa di noro ba nyiŋeŋ-nyiŋeŋ na dieli sɛ, <<Sɩnɛ sɛ baalɛ wina a dɩlɛ mʋ wʋ wʋsɛ tanɛ fa daa sɛ dɩ n di?>>
53Sɛ Yesu tawɩ ba sɛ, <<Maa tawɩ amɩɛ sɛ n nyii na dieli sɛ, amʋɔ ɩ di Wʋkpa Bu wʋŋ wʋsɛ na ɩ nyʋɔ wʋ asima, ɩ tana nkpa amɩɛ tɩba a. 54Wʋkʋma wʋŋ wʋ di ma wʋsɛ sɛ wʋ nyʋɔ ma asima na wɩɛna nkpa ŋii ŋɩ taŋ gɩtɛ, sɛ maa feŋsi ɩ kɔŋ nkpa naŋ dulunya dɩtamtɩŋ. 55Akala takɩɛ ma wʋsɛ tanɛ yɩɛ adiya tɩŋtɩŋ bɛ sɛ ma asima gba yɩɛ lɩŋ tɩŋtɩŋ. 56Wʋkʋma wʋŋ wʋ di ma wʋsɛ tanɛ sɛ wʋ nyʋɔ ma asima na chaɩ ma tɩba, sɛ maŋ gba ma chaɩ wʋ tɩba. 57Takɩɛ ganaŋkʋ ma Juo wʋŋ wʋ chaɩ nkpa naŋ gakpaa kpiri maŋ, sɛ ma chaɩ nkpa naŋ Juo wʋŋ dʋɔ na, dɩmʋŋ sɛ ma dʋɔ wʋkʋma wʋŋ wʋ di ma wʋsɛ na aja cha nkpa naŋ. 58Gana n nyina bodobodo gaa ga lɩɩ Ɩsʋɔ adugbe kɔŋ na. Amɩɛ duluŋ di mana sɛ ba sɩŋ, ama wʋkʋma wʋŋ wʋ di dɩmʋŋ bodobodo gana na aja cha gakpaa.>> 59Yesu tawɩ ŋina bɛ gʋ wʋ wɩɛ Kapeniyum Yudatina tʋm danɛ naŋ wʋ a kalaa na.
Wɩɛ ŋii ŋii fa nkpa ŋii ŋɩ taŋ gɩtɛ na
60Gʋ Yesu kpalɛnara baa fɔɩ nyii ŋina na, ba tawɩ sɛ, <<Kalaa ŋina wɩɛ doŋ. N Mmʋɔ aaŋ dɩlɛ di ŋɩ dʋɔ?>>
61Sɛ Yesu jiŋ gʋ wʋ kpalɛnara baa afʋlʋ ŋina dʋɔ, sɛ wʋ tawɩ ba sɛ, <<Wɩɛ ŋii maa tawɩ na yela sɛ ɩ kara biŋbira bɛ? 62Sɛ ɩ na Wʋkpa Bu wʋŋ bɔrɛ wʋ a ju diele gaa wʋ cha wʋ wɩɛ na. 63Ɩsʋɔ Feliŋ ŋii a fa nkpa, wʋsɛ tanɛ gaa bɩrɛ ba yɩɛ bʋrʋ ʋ. Wɩɛ ŋii ma tawɩ fa amɩɛ na yɩɛ feliŋ bɛ sɛ ŋɩ yɩɛ nkpa. 64Ama amɩɛ tɩba barɛ wɩɛ baa lɩɛ baa di i,>> Akala takɩɛ Yesu cha wʋ jiŋ lɩɩ dɩfaratɩŋ ba tɩba wʋŋ wʋ n lɩɛ di i, na wʋŋ wʋ a lɩsɛ ɩ fa na. 65Yesu ju dʋɔ tawɩ sɛ, <<Ŋina dʋɔ sɛ ma tawɩ amɩɛ sɛ wʋrʋ taŋ wʋ a kɔŋ ma jaŋ ŋ, amʋɔ Juo wʋŋ fa ɩ gbɩɛ.>>
66Lɩɩ dɩmʋŋ saŋa gana na, wʋ kpalɛnara baa fɔɩ bɔrɛ ba wʋrʋgbɩɛ ba n ti kpaŋ ɩ ɩ.
67Sɛ Yesu tasɛ gifi bala baa sɛ,<<Amɩɛ gba ɩɩ bɔrɛ bɛ?>>
68Sɛ Simoŋ Petero lɩsɛ ɩ nʋɔ sɛ, <<Kpaŋjuo, Mmʋɔ jaŋ sɛ dɩ n ju? Nyaŋ n wɩɛna wɩɛ ŋii ŋii fa nkpa ŋii ŋɩ taŋ gɩtɛ na. 69Dɩ lɩɛ di sɛ dɩ jiŋ gʋ nya yɩɛ wʋsɛ Chɩrɩchɩrɩtɛ wʋŋ wʋ lɩɩ Ɩsʋɔ jaŋ na bɛ.>>
70Sɛ Yesu lɩsɛ ɩ nʋɔ sɛ,<<Naa maŋ n lɩsɛ amɩɛ gifi bala? Ama amɩɛ tɩba wʋrʋ yɩɛ Sɩtanɩ!>> 71[Wʋ dʋɔna Yudasi, Simoŋ Isikariyoti bu, wʋŋ wʋ yɩɛ gifi bala baa tɩba wʋrʋ na bɛ, wʋŋ wʋ a gaa lɩsɛ ɩ fa wʋrʋgbɩɛ na.]
Currently Selected:
Yohane 6: CLL
Highlight
Copy
Compare
Share
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
