Yohane 3
3
Yesu na Nikodemosi
1Baalɛ wʋrʋ cha wʋ wɩɛ baa yagɛ ɩ sɛ Nikodemosi. Wʋ yɩɛ Farasitina bɛ sɛ wʋ kpi Yudatina dɩɛnaŋ bɩnɩɛ naŋ bɩnɩɛ dikpeŋ gaa dʋɔ. 2Wʋ kɔŋ Yesu jaŋ yuluma gaa tawɩ ɩ sɛ, <<Wʋkalaasa, dɩ jiŋ gʋ nya yɩɛ wʋkalaasa wʋŋ wʋ lɩɩ Ɩsʋɔ jaŋ na bɛ. Akala takɩɛ wʋrʋ baa dɩlɛ yɩɛ adaŋgana daasɛ ŋii nyaa yɩɛ na yela Ɩsʋɔ n kpi wʋ dʋɔ ɔ.>>
3Sɛ Yesu lɩsɛ ɩ nʋɔ sɛ, <<Maa tawɩ sɛ n nyii na dieli sɛ, wʋrʋ baa dɩlɛ na Ɩsʋɔ Juori gaa, amʋɔ ba ti bɔrɛ lʋrʋ ɩ gɩfɔlɩŋ.>>
4Sɛ Nikodemosi tasɛ ɩ sɛ, <<Sɩnɛ sɛ baa ti dɩlɛ lʋrʋ wʋkpa wʋŋ wʋ bɩɩ na? Gasiŋteŋ wʋ aa dɩlɛ jʋʋ wʋnaa lorinaŋ na wʋ a ti lʋrʋ ɩ bʋlatɛ ɛ.>>
5Sɛ Yesu lɩsɛ ɩ nʋɔ sɛ, <<Maa tawɩ sɛ nyii na dieli sɛ, ba n mʋ lɩŋ na Ɩsʋɔ Feliŋ lʋrʋ wʋrʋ na, wʋ aa dɩlɛ jʋʋ Ɩsʋɔ Juori gaa naŋ ŋ, 6Wʋkpa a lʋrʋ wʋkpa wʋ duluŋ naŋ bɛ, ama Ɩsʋɔ Feliŋ a lʋrʋ feliŋ duluŋ naŋ bɛ. 7N baa yela na ŋii yɩɛ nyaŋ doba takɩɛ ganaŋkʋ ma tawɩ sɛ, <Amɩɛ, ŋɩ tiri gʋ baa ti bɔrɛ lʋrʋ amɩɛ gɩfɔlɩŋ.> 8Feliŋ a jɔ ŋii ju diele gaa ŋii jawʋ na bɛ. Sɛ nyaa nyii ŋɩ galaŋba, ama nyaa dɩlɛ jiŋ diele gaa ŋɩ lɩɩ, yaa diele gaa ŋii ju u. Dɩmʋŋ sɛ ŋɩ kɩɛna fa wʋkʋma wʋŋ Ɩsʋɔ Feliŋ lʋrʋ ɩ na.>>
9Sɛ Nikodemosi tasɛ ɩ sɛ,<<Sɩnɛ sɛ ŋina a dɩlɛ tibi?>>
10Yesu tasɛ ɩ sɛ, <<Nya yɩɛ Isiraitina wʋkalaasa bɛ sɛ nyaa nyii ŋina tie? 11Maa tawɩ sɛ n nyii na dieli sɛ, ŋii dɩ jiŋ na sɛ dɩ tawɩ, sɛ bʋrʋ gaa dɩ na na, sɛ dɩ di ga dʋɔ seriya, ama amɩɛ ɩ saŋ ɩɩ lɩɛ daa seriya ɩ dʋ ʋ. 12Ma tawɩ tibi dʋɔ abʋrɩ wɩɛ fa amɩɛ sɛ ɩŋ lɩɛ di i, sɩnɛ sɛ maa tawɩ Ɩsʋɔ adugbe abʋrɩ dʋɔ wɩɛ fa amɩɛ na ɩ lɩɛdi? 13Wʋrʋ taŋ sɛ wʋ taŋ ju Ɩsʋɔ adugbe e amʋɔ wʋŋ wʋ lɩɩ Ɩsʋɔ adugbe kɔŋ na. Wʋŋ n nyina Wʋkpa Bu#3:13 Ɩsʋɔ sabɩɛwɩɛ ŋii ŋarɛ wɩɛna Wʋkpa Bu wʋŋ wʋ lɩɩ Ɩsʋɔ adugbe. wʋŋ. 14Takɩɛ ganaŋkʋ Mosesi jiŋna nyɩŋgɩrɛ sʋlɛ mʋlʋŋ dʋm wʋŋ adugbe ifuli dʋɔ na, dɩmʋŋ sɛ ŋɩ tiri gʋ ba n jiŋna Wʋkpa Bu wʋŋ gba adugbe, 15ganaŋkʋ wʋkʋma wʋŋ wʋ lɩɛ ɩ di na, wʋ a yu nkpa ŋii ŋɩ taŋ gɩtɛ.>>
16Ganaŋkʋ Ɩsʋɔ a ja dulunya na dʋɔ sɛ wʋ mʋ wʋ Bu wʋdʋŋdʋlʋŋ wʋŋ fa, ganaŋkʋ wʋkʋma wʋŋ wʋ lɩɛ ɩ di na ba aa tʋsʋ ʋ, ama wʋ a yu nkpa ŋii ŋɩ taŋ gɩtɛ. 17Akala takɩɛ Ɩsʋɔ n kpiri wʋ Bu kɔŋ dulunya naŋ sɛ wʋ n gaa fu dulunya dɩpʋɛ ɛ, ama wʋ a pala na wʋ dʋɔ mɔlɔgɩ dulunya. 18Wʋkʋma wʋŋ wʋ lɩɛ ɩ di na, baa fuu ɩ dɩpʋɛ ɛ, ama wʋkʋma wʋŋ wʋ n lɩɛ di na, ba fɩla fuu ɩ dɩpʋɛ, akala takɩɛ wʋ n lɩɛ Ɩsʋɔ Bu wʋdʋŋdʋlʋŋ yɩrɛ gaa di i. 19Wɩɛ di gaa n nyina sɛ, ŋmaŋi kɔŋ dulunya naŋ, ama bakpa a ja giteŋteŋbiri kii gʋ nafʋɔ ba n ja ŋmaŋi, akala takɩɛ ba ayɩɛsa yɩɛ dɩsʋbʋ. 20Wʋkʋma wʋŋ wʋ a yɩɛ dɩsʋbʋ na a kɔla ŋmaŋi gaa, sɛ wʋ aa kɔŋ ŋmaŋi gaa naŋ ŋ, akala takɩɛ wʋ a se nyɩŋtɩɛ sɛ wʋ ayɩɛsa aja lɩɩ ifuli. 21Ama wʋkʋma wʋŋ wʋ kpaŋ gasiŋteŋ na, a kɔŋ ŋmaŋi gaa naŋ ganaŋkʋ wʋkʋma a na na dieli takɩɛ wʋ yɩɛ wʋ ayɩɛsa Ɩsʋɔ naŋ.
Yesu na Yohane Ɩsʋɔ Sɔrɛ wʋŋ.
22Ŋina wʋrʋgbɩɛ na, Yesu na wʋ kpalɛnara baa ju Yudiya tibi dʋɔ dɩmaŋ sɛ wʋ cha ba jaŋ wɩɛ akalasa ŋarɛ sɛ wʋ sɔ bakpa Ɩsʋɔ sɔ. 23Saŋa gana na, Yohane gba a sɔ bakpa Ɩsʋɔ sɔ Anoŋ dɩɛ gaa ga tirina Salim na. Akala takɩɛ lɩŋ cha ŋɩ wɩɛ dɩmaŋ fɔɩ sɛ bakpa ju dʋɔ baa kɔnɛ sɛ wʋ n sɔ ba Ɩsʋɔ sɔ. 24[Ŋina tibi pɔɩ sɛ ba tɔ Yohane danɛ.] 25Sɛ Yohane kpalɛnara baa barɛ na Yuda wʋkpa wʋrʋ a di noro lɩɩna iniesi saŋ lɩsɛ dʋɔ wɩɛ. 26Ba kɔŋ Yohane jaŋ gaa tawɩ ɩ sɛ, <<Wʋkalaasa, baalɛ wʋŋ wʋ cha wʋ wɩɛ n jaŋ Yodaŋ buo ga tɩɛsa, wʋŋ nya di wʋ dʋɔ seriya na dieli na, wʋ a sɔ bakpa Ɩsʋɔ sɔ sɛ wʋkʋma a ju wʋ jaŋ.>>
27Sɛ Yohane lɩsɛ nʋɔ sɛ, <<Bʋrʋ gaa ba mʋ fa wʋkpa lɩɩ Ɩsʋɔ adugbe na nyiŋeŋ sɛ wʋ a dɩlɛ yu. 28Amɩɛ tɩŋtɩŋ ɩɩ dɩlɛ di seriya takɩɛ ma tawɩ sɛ, <Ma ba yɩɛ Kirisito wʋŋ ŋ, ama ba kpiri maŋ pala wʋ asanaŋ bɛ.> 29Alʋ fɔlɛ baalɛ wʋŋ n tina alʋ fɔlɛ wʋŋ. Alʋ fɔlɛ baalɛ wʋ dɩɛtɛ wʋŋ bɩrɛ dana ɩ bɛ na wʋ a nyii wʋ jaŋ. Wʋ nyii wʋ lofu na, wʋ asa aja di. Dɩmʋŋ sɛ dɩtɩɛna maŋ gba ma asadi yɩɛ kʋrʋkʋrʋ.>> 30Ŋɩ tiri gʋ wʋ a yɩɛ wʋjanɛ, na maŋ dʋɔ ŋɩ tiri gʋ maa yɩɛ wʋpɩɩ.
Wʋŋ wʋ lɩɩ adugbe
31Sɛ Yohane ju dʋɔ tawɩ sɛ, <<Wʋŋ wʋ lɩɩ Ɩsʋɔ adugbe na kii bʋrʋkʋma. Wʋŋ wʋ lɩɩ tibi dʋɔ yɩɛ tibi dʋɔ teri bɛ, sɛ wʋ a tawɩ takɩɛ wʋŋ wʋ lɩɩ tibi dʋɔ. Wʋŋ wʋ lɩɩ Ɩsʋɔ adugbe na kii bʋrʋkʋma. 32Ŋii wʋ na, na ŋii wʋ nyii na dʋɔ sɛ wʋ a di seriya. Ama wʋrʋ n lɩɛ wʋ seriya di i. 33Ama wʋkpa wʋŋ wʋ lɩɛ wʋ seriya di na, lɩɛ dʋ gʋ Ɩsʋɔ yɩɛ gasiŋteŋtɛ bɛ. 34Wʋŋ Ɩsʋɔ kpiri ɩ na, Ɩsʋɔ wɩɛ sɛ wʋ a tawɩ. Akala takɩɛ Ɩsʋɔ fa ɩ Feliŋ ŋii ŋɩ kii nʋɔ. 35Juo wʋŋ a ja Bu wʋŋ wɩɛ sɛ wʋ mʋ bʋrʋkʋma dʋ wʋ pamɩɛ naŋ. 36Wʋkʋma wʋŋ wʋ lɩɛ Bu wʋŋ di na wɩɛna nkpa ŋii ŋɩ taŋ gɩtɛ, ama wʋkʋma wʋŋ wʋ pɩɛ Bu wʋŋ na, wʋ aa yu nkpa a, akala takɩɛ Ɩsʋɔ biŋbira janɛ wɩɛ wʋ dʋɔ.>>
Currently Selected:
Yohane 3: CLL
Highlight
Copy
Compare
Share
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
