Yohane 2
2
Sarɛ garɛ gaa ba yɩɛ Kana dɩɛ naŋ
1Wɩɛ atoro wɩɩ na, sarɛ garɛ cha ju dʋɔ Kana dɩɛ gaa ga wɩɛ Galaliya tibi dʋɔ. Yesu wʋnaa gba cha wʋ wɩɛ dɩmaŋ. 2Ba lɔ pam yagɛ Yesu na wʋ kpalɛnara gba sarɛ gaa tie. 3Gʋ wayɩŋ sʋlʋŋ ŋii tam na, Yesu wʋnaa tawɩ ɩ sɛ,<<Ba wayɩŋ sʋlʋŋ tam.>>
4Sɛ Yesu tawɩ ɩ sɛ, <<Nna, n baa tawɩ maŋ bʋrʋ gaa ma n yɩɛ. Ma saŋa n talɛ taa a.>>
5Sɛ wʋnaa tawɩ tʋmɩra baa sɛ,<<N yɩɛ bʋrʋkʋma gaa wʋ tawɩ amɩɛ na.>>
6Na anyɩŋkpaŋ lʋrʋ cha ŋɩ sɩmɩɛɩ dɩmaŋ, ŋii sɛ Yudatina a mʋ baa yɩɛ ba wʋsɛ iniesi saŋ lɩsɛ. Lɩŋ na kpalɛ tɩtɩba naŋ tɛ nkuo yaa nkuonasala a dɩlɛ su ŋɩ gakʋma.
7Yesu tawɩ tʋmɩra baa sɛ, <<N chie lɩŋ su anyɩŋkpaŋ ŋii.>>Dɩmʋŋ dʋɔ ba chie lɩŋ su ŋɛ.
8Sɛ wʋ tawɩ ba sɛ,<<Dɩtɩɛna n chie ŋarɛ ga fa wʋŋ wʋ yɩɛ asadi adiya di kɩɛrɛ na.>>Sɛ ba yɩɛ dɩmʋŋ.
9Sɛ asadi adiya di kɩɛrɛ wʋŋ daa lɩŋ ŋii ŋɩ bɩrɩŋsɛ wayɩŋ sʋlʋŋ na kɩɛ. Wʋ n dɩlɛ jiŋ diele gaa ŋɩ lɩɩ ɩ, ama wʋ tʋmɩra baa ba chie lɩŋ ŋii na bɩrɛ jiŋ. Sɛ wʋ yagɛ alʋ fɔlɛ baalɛ wʋŋ lɩɩ laraŋ 10sɛ wʋ tawɩ ɩ sɛ,<<Wʋkʋma n chɩŋkpɩɛ lɩsɛ wayɩŋ sʋlʋŋ abama fa baa wʋ lɔ pam yagɛ baa na, na wʋkʋma a nyʋɔ paa pɔɩ na wʋ a lɩsɛ wayɩŋ sʋlʋŋ ŋii ŋɩ taŋ dieli na. Ama nyaŋ bɩrɛ, nya mʋ abama ŋii si gaa tala dɩtɩɛna.>>
11Ŋina n nyina adaŋgana daasɛ ŋii Yesu chɩŋkpɩɛ yɩɛ Kana dɩɛ gaa ga wɩɛ Galaliya tibi dʋɔ na. Dɩmaŋ sɛ wʋ lɩsɛ wʋ jilima kalaa sɛ wʋ kpalɛnara baa lɩɛ ɩ di.
12Ŋina wʋrʋgbɩɛ na, Yesu ju Kapeniyum dɩɛ naŋ wʋ na wʋnaa, wʋ nabie na wʋ kpalɛnara. Dɩmaŋ sɛ ba cha wɩɛ akalasa.
Yesu geŋ yawʋ dira lɩɩ Ɩsʋɔ tʋm danɛ naŋ
Matiyo 21:12,13; Maakɩ 11:15-17; Luka 19:45,46
13Gʋ Yudatina nyiŋi asadi adiya di tirina na, Yesu ju Yerusalem. 14Gʋ wʋ wɩɛ Ɩsʋɔ tʋm danɛ gaa naŋ na, wʋ na bakpa baa yaa naŋ, feŋ na juori gakuosɛ yela barɛ chaɩ tebulu aba dʋɔ baa chɩɛgɩna aterembie. 15Sɛ wʋ mʋ ganya yɩɛ dɩchʋchʋ geŋ baa baa chɩɛgɩna aterembie, na naŋ na feŋ lɩɩ Ɩsʋɔ tʋm danɛ gaa naŋ, sɛ wʋ puseŋ baa baa chɩɛgɩna diterembi bie na tʋsʋ sɛ wʋ titi ba tebulu aba ŋii lɔ. 16Sɛ wʋ tawɩ baa baa yaa juori gakuosɛ na sɛ, <<N mʋ ba lɩɩ jɩna. N baa mʋ Majuo waa bɩrɩŋsɛ gɩyɩɛ.>>
17Sɛ wʋ kpalɛnara baa nyiŋi gʋ baa sabɩɛ si sɛ, <<Jawʋ fa nya waa, aja tʋʋ maŋ takɩɛ bʋala.>>
18Sɛ Yudatina bɩnɩɛ baa tasɛ ɩ sɛ, <<Be adaŋgana daasɛ sɛ nyaa dɩlɛ yɩɛ kalaa daa, na ŋii kalaa sɛ nya wɩɛna yikuo nyaa yɩɛ ŋina kpiniŋ?>>
19Yesu lɩsɛ ba nʋɔ sɛ, <<N warɩɛ Ɩsʋɔ tʋm danɛ gana, maa mʋ wɩɩ atoro ti ma ga.>>
20Sɛ Yudatina bɩnɛ baa lɩsɛ ɩ nʋɔ sɛ, <<Dɩ mʋ bɩŋsɛ ŋɩla na lʋrʋ ma dɩmʋŋ Ɩsʋɔ tʋm danɛ gana, sɛ nyaa mʋ wɩɩ atoro ma ga?>> 21Ama Ɩsʋɔ tʋm danɛ gaa Yesu cha tawɩ ga wɩɛ na, yɩɛ wʋ tɩŋtɩŋ wʋ wʋsɛ bɛ. 22Gʋ wʋ feŋ lɩɩ sɩŋ naŋ wʋrʋgbɩɛ na, wʋ kpalɛnara baa nyiŋi wɩɛ ŋii wʋ tawɩ na. Sɛ ba lɩɛ Ɩsʋɔ Sabɩɛwɩɛ ŋii na wɩɛ ŋii Yesu cha tawɩ na di.
Yesu jiŋ wʋkpa duluŋ
23Gʋ Yesu wɩɛ Yerusalem, nyiŋi asadi adiya di ŋii naŋ na, bakpa fɔɩ na adaŋgana daasɛ ŋii wʋ a yɩɛ na, sɛ ba lɩɛ wʋ yɩrɛ di. 24Ama Yesu n lɩɛ ba di i. Akala takɩɛ wʋ jiŋ ganaŋkʋ bakpa kɩɛna. 25Yesu n tiri gʋ wʋkpa n di seriya lɩɩ wʋ dʋɔ wʋkpa dʋɔ ɔ. Akala takɩɛ wʋ jiŋ ŋii ŋɩ wɩɛ wʋkpa digela naŋ.
Currently Selected:
Yohane 2: CLL
Highlight
Copy
Compare
Share
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
