Yohane 20
20
Yesu feŋ lɩɩ sɩŋ naŋ
Matiyo 28:1-8; Maakɩ 16:1-8; Luka 24:1-12
1Wɩɩ gaa ga dɔŋ soji asanaŋ nafo fuu gʋ ŋɩ n ŋmaŋi ta na, Mariya Magadalini ju akpanaŋ bʋɔ gaa jaŋ sɛ wʋ ga na gʋ bʋɩ gaa gbiliti lɩɩ bʋɔ gaa nʋɔ. 2Dɩmʋŋ dʋɔ wʋ bɔrɛ se ju Simoŋ Petero na kpalɛnarɛ wʋ baŋbaŋ wʋŋ Yesu a ja wʋ wɩɛ na jaŋ ga tawɩ ba sɛ, <<Ba lɩsɛ Kpaŋjuo wʋŋ lɩɩ bʋɔ gaa naŋ, sɛ dɩ ba jiŋ diele gaa ba mʋ ɩ dʋ ʋ.>>
3Dɩmʋŋ dʋɔ Petero na kpalɛnarɛ wʋ baŋbaŋ wʋŋ kʋlʋ baa ju bʋɔ gaa jaŋ. 4Baa bala ba sebiei baa ju, ama kpalɛnarɛ wʋ baŋbaŋ wʋŋ se laŋ Petero dʋɔ chɩŋkpɩɛ ga tala bʋɔ gaa jaŋ. 5Sɛ wʋ luuŋ kɩɛ bʋɔ gaa naŋ, sɛ wʋ na gʋ dɩkalala atabaŋ duwei tɩba, ama wʋ n jʋʋ ʋ. 6Sɛ Simoŋ Petero wʋŋ wʋ dʋɔ wʋrʋgbɩɛ na ga talɛ sɛ wʋ jʋʋ bʋɔ gaa naŋ. Sɛ wʋ na dɩkalala atabaŋ ŋii duwei tɩba, 7na dukuru gaa ba mʋ pɔgʋ Yesu nyi. Sɛ dukuru gaa tɩŋtɩŋ guo, ga ba duwei dɩkalala gaa jaŋ ŋ. 8Dɩtamtɩŋ na, kpalɛnarɛ wʋ baŋbaŋ wʋŋ wʋ chɩŋkpɩɛ tala bʋɔ gaa jaŋ na gba jʋʋ tɩba. Wʋ na, sɛ wʋ lɩɛ di. 9[Ba saŋ ba n nyii ta tie lɩɩ Ɩsʋɔ Sabɩɛwɩɛ ŋii naŋ takɩɛ Yesu daga na wʋ a feŋ lɩɩ sɩŋ naŋ ŋ.]
Yesu lɩsɛ wʋ wʋsɛ kalaa Mariya Magadalini
Matiyo 28:9-10; Maakɩ 16:9-11
10Sɛ kpalɛnara baa bɔrɛ ju ba waasɛ dʋɔ. 11Ama Mariya bɩrɛ, wʋ dʋɔ wʋ sɩmɩɛɩ bʋɔ gaa jaŋ wʋ a wii. Gʋ wʋ a wii na, sɛ wʋ luuŋ kɩɛ bʋɔ gaa naŋ 12sɛ wʋ na Ɩsʋɔ gabʋɔsɛ bala ba fuona abʋrɩ afʋlʋma ba chaɩ diele gaa ba mʋ Yesu gɩtatɛ si na. Wʋrʋ chaɩ wʋ nyie dʋɔ, sɛ wʋrʋ dʋɔ chaɩ wʋ nafara tie.
13Sɛ ba tasɛ ɩ sɛ, <<Alʋ, be n yɩɛ sɛ nyaa wii?>>
Sɛ wʋ lɩsɛ nʋɔ sɛ, <<Ba mʋ ma Kpaŋjuo laŋ sɛ ma ba jiŋ diele gaa ba mʋ ɩ si i.>>
14Gʋ wʋ tawɩ ŋina na, wʋ biliŋi kɩɛ logo sɛ wʋ na Yesu wʋ sɩmɩɛɩ dɩmaŋ, ama wʋ n jiŋ sɛ Yesu bɛ ɛ.
15Sɛ Yesu tasɛ ɩ sɛ, <<Alʋ, be n yɩɛ sɛ nyaa wii? Mmʋɔ sɛ nyaa jawʋ?>>
Mariya cha wʋ a fa nfɩɛrɛ sɛ wʋ yɩɛ fʋɔ kɩɛrɛ bɛ, sɛ wʋ tawɩ sɛ, <<Kpaŋjuo, sɛ nyaŋ n mʋ ɩ laŋ na, kalaa maŋ diele gaa nya mʋ ɩ si na maa ju ga mʋ ɩ.>>
16Sɛ Yesu tawɩ ɩ sɛ, <<Mariya.>>
Sɛ wʋ biliŋi kɩɛ ɩ, sɛ wʋ kuusi Aramiki#20:16 Aramiki yɩɛ dɩtawɩ gaa Yudatina baa a tawɩ saŋa gana dɩtawɩ naŋ sɛ, <<Raboni!>> [Tie a kalaa sɛ Wʋkalaasa].
17Sɛ Yesu tawɩ ɩ sɛ, <<N baa tapʋ maŋ, akala takɩɛ ma n bɔrɛ ta ju Majuo wʋŋ jaŋ ŋ. Ama ju ma kpalɛnara baa jaŋ ga tawɩ ba sɛ ma bɔrɛ maa ju Majuo na amɩɛ Juo, ma Ɩsʋɔ na amɩɛ Ɩsʋɔ jaŋ.>>
18Sɛ Mariya Magadalini bɔrɛ ju ga tawɩ kpalɛnara baa sɛ, <<Ma na Kpaŋjuo Yesu wʋŋ!>> Sɛ wʋ tawɩ ba sɛ wʋŋ n tawɩ wɩɛ ŋina fa ɩ.
Yesu lɩsɛ wʋ wʋsɛ kalaa wʋ kpalɛnara baa
Matiyo 28:16-20; Maakɩ 16:14-18; Luka 24:36-49
19Wɩɩ gaa ga dɔŋ soji asanaŋ bʋyanɔ gʋ kpalɛnara baa jaŋi na, sɛ ba tɔ bʋɔlɩɛ dʋ ba wʋsɛ danɛ naŋ, akala takɩɛ baa se Yudatina bɩnɩɛ baa. Sɛ Yesu kɔŋ gaa sɩŋ ba tɩba, sɛ wʋ tawɩ ba sɛ, <<Wʋsɛfɩɛ n kɔŋ amɩɛ dʋɔ!>> 20Gʋ wʋ tawɩ ŋina wʋrʋgbɩɛ na, sɛ wʋ taŋa wʋ pamɩɛ na wʋ sinabie kalaa ba. Gʋ kpalɛnara baa na Kpaŋjuo wʋŋ na, ba asadi fɔɩ.
21Sɛ Yesu ti bɔrɛ tawɩ ba sɛ, <<Wʋsɛfɩɛ n kɔŋ amɩɛ dʋɔ. Takɩɛ ganaŋkʋ Majuo kpiri maŋ na, maŋ gba maa kpiri amɩɛ.>> 22Gʋ wʋ tawɩ dɩmʋŋ na, wʋ lɩɩ wuosi fu ba tawɩ sɛ, <<N lɩɛ Ɩsʋɔ Feliŋ ŋii. 23Sɛ ɩ mʋ wʋrʋ dɩsʋbʋ chɩɛ ɩ na, Ɩsʋɔ gba mʋ chɩɛ. Sɛ ɩŋ mʋ ba dɩsʋbʋ chɩɛ ba na, Ɩsʋɔ gba baa mʋ chɩɛ ba a.>>
Yesu lɩsɛ wʋ wʋsɛ kalaa Tomasi
24Saŋa gana Tomasi [wʋŋ baa yagɛ ɩ Dedimosi] wʋŋ wʋ yɩɛ kpalɛnara gifi bala baa tɩba wʋrʋ na, wʋ taŋ kpalɛnara baa jaŋ saŋa gaa Yesu kɔŋ ba jaŋ na a. 25Dɩmʋŋ dʋɔ kpalɛnara ba baŋbaŋ baa tawɩ ɩ sɛ, <<Dɩ na Kpaŋjuo Yesu wʋŋ!>>
Ama wʋ tawɩ ba sɛ, <<Amʋɔ ma na nyɩŋgɩrɛ gaa awʋŋtarɩɛ wʋ pamɩɛ naŋ na maa mʋ ma pam nyiŋbie tapʋ diele gaa ba jɔ nyɩŋgɩrɩɛ ŋii, na maa mʋ ma pam nyiŋbie tapʋ wʋ sinabie na, maa lɩɛ di i.>>
26Soji garɛ wʋrʋgbɩɛ na, wʋ kpalɛnara baa ti ba wɩɛ waa dʋɔ yela Tomasi wɩɛ ba jaŋ. Ŋɩ wɩɛ tɩba takɩɛ ba tɔ bʋɔlɩɛ bɩrɛ, Yesu kɔŋ gaa sɩŋ ba tɩba tawɩ sɛ, <<Wʋsɛfɩɛ n kɔŋ amɩɛ dʋɔ.>> 27Sɛ Yesu tawɩ Tomasi sɛ, <<Kɩɛ ma pam taŋtaŋ naŋ na nyaa mʋ n pam nyiŋbie tapʋ. Tɩɛŋɩ n pam nyiŋbie tapʋ ma sinabie. Yela noro na nyaa lɩɛ di.>>
28Sɛ Tomasi tawɩ ɩ sɛ, <<Ma Kpaŋjuo na ma Ɩsʋɔ!>>
29Sɛ Yesu tawɩ ɩ sɛ, <<Nya na maŋ dʋɔ sɛ nya lɩɛdi. Kusee n nyina baa ba n na a, ama ba lɩɛ di.>>
30Yesu yɩɛ adaŋgana daasɛ fɔɩ ŋarɛ wʋ kpalɛnara baa asanaŋ, ŋii ba n sabɩɛ ŋɛ dʋ tanɛ gana naŋ ŋ. 31Ama ba sabɩɛ ŋina bɛ na ɩ lɩɛ di gʋ Yesu n nyina Kirisito, Ɩsʋɔ Bu wʋŋ, na ɩ lɩɛ ɩ di na, ɩɩ yu nkpa ŋii ŋɩ taŋ gɩtɛ wʋ yɩrɛ naŋ.
Currently Selected:
Yohane 20: CLL
Highlight
Copy
Compare
Share
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
