Yohane 19
19
Ba fu Yesu sɩŋ dɩpʋɛ
Matiyo 27:15-31; Maakɩ 15:6-20; Luka 23:13-25
1Sɛ Pilato mʋ Yesu fa sɛ ba taɩ ɩ achʋchʋɛ. 2Sɛ yuora baa mʋ sɔba lʋʋ juori gapa mʋ fu Yesu. Sɛ ba mʋ kirimaŋ lɩŋ gagba gajalɩŋtɛ fu ɩ. 3Sɛ ba pala wʋ dʋɔ sɛ ba jabi ɩ tawɩ ɩ sɛ, <<Yudatina juo, yu nkpa!>> Sɛ ba jɔ wʋ asanaŋ.
4Sɛ Pilato ti lɩɩ asʋŋ gaa tawɩ Yudatina baa sɛ, <<N nyii, ma chamɩna ɩ maa kɔna amɩɛ na ɩɩ jiŋ gʋ ma n na wɩɛ ŋii maa sɩŋ ŋɩ dʋɔ fu ɩ dɩpʋɛ ɛ.>> 5Gʋ Yesu lɩɩ asʋŋ wʋ fuona sɔba juori gapa na kirimaŋ lɩŋ gagba gajalɩŋtɛ na, Pilato tawɩ ba sɛ, <<Baalɛ wʋŋ mɩnaŋ!>>
6Gabʋanaŋ sɛ Ɩsʋɔ sei bɩnɩɛ na ba bɩnɩɛ baa na Yesu, sɛ ba kuusi tawɩ sɛ, <<Jɔ ɩ daŋ gasagasa dʋɔ! Jɔ ɩ daŋ gasagasa dʋɔ!>>
Ama Pilato lɩsɛ nʋɔ sɛ, <<N mʋ ɩ na ɩ jɔ ɩ daŋ gasagasa dʋɔ. Maŋ bɩrɛ ma n na wɩɛ ŋii maa sɩŋ ŋɩ dʋɔ fu ɩ dɩpʋɛ ɛ.>>
7Sɛ Yudatina baa lɩsɛ nʋɔ sɛ, <<Dɩ wɩɛna mbara ŋarɛ, ŋii kalaa sɛ dɩ daga na wʋ a sɩŋ, akala takɩɛ wʋ a tawɩ sɛ wʋŋ n nyina Ɩsʋɔ Bu.>>
8Gʋ Pilato nyii ŋina na, nyɩŋtɩɛ chaŋ ɩ fɔɩ, 9sɛ wʋ bɔrɛ ga jʋʋ juorigbɩɛ gaa. Sɛ wʋ tasɛ Yesu sɛ, <<Le sɛ n lɩɩ?>> Ama Yesu n lɩsɛ ɩ nʋɔ ɔ. 10Sɛ wʋ ti bɔrɛ tasɛ ɩ sɛ, <<N pɩɛ nyaa tawɩ ma jaŋ? N ba jiŋ gʋ ma wɩɛna yikuo maa dɩlɛ yela nyaŋ yaa maa jɔ nyaŋ daŋ gasagasa dʋɔ?>>
11Sɛ Yesu lɩsɛ ɩ nʋɔ sɛ, <<Sɛ Ɩsʋɔ n fa nyaŋ yikuo ma dʋɔ na, nafʋɔ nyaa dɩlɛ yu yikuo ma dʋɔ ɔ. Dɩmʋŋ dʋɔ wʋŋ wʋ lɩsɛ maŋ fa nyaŋ na, wʋ di dɩsʋbʋ dɩpʋɛ fɔɩ.>>
12Lɩɩ saŋa gana mʋ a ju na, Pilato a ja sɛ wʋ a yela Yesu, ama Yudatina baa ju dʋɔ baa kuusi sɛ, <<Sɛ nya yela sɛ baalɛ wina lam na, nya ba yɩɛ Kayisa wʋ dɩɛtɛ ɛ. Wʋkʋma wʋŋ wʋ a tawɩ sɛ wʋ yɩɛ juo na, wʋ a kʋlʋ sɩŋ Kayisa dʋɔ.>>
13Gʋ Pilato nyii wɩɛ ŋina na, wʋ mʋ Yesu lɩɩ asʋŋ sɛ wʋ cha wɩɛ diri gbeli dʋɔ, diele gaa ba mʋ bʋɛ taga [Aramiki dɩtawɩ naŋ na baa yagɛ sɛ Gabata]. 14Dɩmʋŋ wɩɩ gana yɩɛ wɩɩ ga kʋlasa fa nyiŋi asadi adiya di bɛ, aja wiita yɩɛ keŋkeŋ.
Sɛ Pilato tawɩ Yudatina baa sɛ, <<N kɩɛ amɩɛ juo.>>
15Ama ba kuusi sɛ, <<Mʋ ɩ pala! Mʋ ɩ pala na ɩ jɔ ɩ daŋ gasagasa dʋɔ!>>
Sɛ Pilato tasɛ ba sɛ, <<Ma n jɔ amɩɛ juo daŋ gasagasa dʋɔ?>>
Sɛ Ɩsʋɔ sei bɩnɩɛ baa lɩsɛ nʋɔ sɛ, <<Dɩ tana juo wʋrʋ ʋ, amʋɔ juo Kayisa.>>
16Dɩtamtɩŋ na, sɛ Pilato mʋ ɩ fa ba sɛ ba n ga jɔ ɩ daŋ gasagasa dʋɔ.
Ba jɔ Yesu daŋ gasagasa dʋɔ
Matiyo 27:32-44; Maakɩ 15:21-32; Luka 23:26-43
Dɩmʋŋ dʋɔ wʋ mʋ Yesu fa yuora ba. 17Sɛ Yesu tɩŋtɩŋ sɩlɛ wʋ daŋ gasagasa lɩɩ dɩmaŋ ga tala diele gaa baa yagɛ sɛ nyi gafie [Aramiki dɩtawɩ naŋ na baa yagɛ sɛ Goligato]. 18Dɩmaŋ sɛ ba jɔ ɩ daŋ gasagasa dʋɔ. Sɛ ba ti jɔ baala bala barɛ daŋ gasagasa dʋɔ kpi wʋ dʋɔ, wʋrʋ wɩɛ wʋ jɩsaŋ dʋɔ sɛ wʋrʋ dʋɔ wɩɛ wʋ naŋbii dʋɔ yela Yesu wɩɛ ba tɩtɩba.
19Sɛ Pilato sabɩɛ wɩɛ ŋarɛ mʋ mata daŋ gasagasa gaa dʋɔ sɛ, YESU NASARATI WƲKPA, YUDATINA JUO WƲŊ. 20Yudatina baa fɔɩ a karaŋ wɩɛ ŋii, akala takɩɛ diele gaa baa jɔ ɩ daŋ gasagasa gaa dʋɔ na tirina dɩɛ janɛ gaa. Ba sabɩɛ wɩɛ ŋii Aramiki, Latiŋ#19:20 Latiŋ cha yɩɛ Romatina dɩtawɩ bɛ na Girikitina atawɩ naŋ. 21Sɛ Yudatina Ɩsʋɔ sei bɩnɩɛ baa tawɩ Pilato sɛ, <<N baa sabɩɛ sɛ Yudatina Juo, ama sabɩɛ sɛ baalɛ wina a tawɩ sɛ wʋŋ n nyina Yudatina Juo wʋŋ.>>
22Sɛ Pilato tawɩ ba sɛ, <<Ŋii ma ta sabɩɛ na, ŋii sɛ ma sabɩɛ.>>
23Gʋ yuora baa jɔ Yesu daŋ gasagasa dʋɔ taŋ na, ba fulu wʋ abʋrɩ afuusa sɛ ba kpara ŋɛ gbɩɛta bʋnara, sɛ ba wʋkʋma yu bʋdʋŋdʋlʋŋ, sɛ dɩ kakaa wʋ tie gagba. Dɩmʋŋ gagba gana na, ba lʋʋ ga bʋdʋŋdʋlʋŋ bɛ lɩɩ adugbe gaa tala tie.
24Sɛ yuora baa tawɩ dɔŋa sɛ, <<N baa yela dɩɩ chati ga, ama n yela dɩɩ lɔ ga dʋɔ mbi na dɩɩ na wʋŋ wʋ a yu ga na.>>
Ŋina tibi bɛ na ŋii Ɩsʋɔ Sabɩɛwɩɛ ŋii tawɩ na, a kɔŋ tɩba sɛ,
<<Ba kpara ma abʋrɩ afuusa tɩba fa dɔŋa,
na baa lɔ mbi ma gagba dʋɔ.>>#Num 22:18.
Ŋina sɛ yuora baa yɩɛ.
25Yesu wʋnaa, wʋ naamaŋsie, Mariya Kilopasi alʋ, na Mariya Magadalini sɩmɩɛɩ tirina daŋ gasagasa gaa. 26Gʋ Yesu na wʋnaa dɩmaŋ, na kpalɛnarɛ wʋŋ wʋ a ja wʋ wɩɛ sɩmɩɛɩ tirina na, wʋ tawɩ wʋnaa sɛ, <<Alʋ wʋŋ maa ja n wɩɛ, n bu mɩnaŋ!>> 27Sɛ wʋ tawɩ wʋ kpalɛnarɛ wʋŋ dʋɔ sɛ, <<Kɩɛ, nnaa mɩnaŋ.>> Lɩɩ dɩmʋŋ saŋa gana sɛ kpalɛnarɛ wʋŋ mʋ ɩ ju ga cha wʋ tɩŋtɩŋ wʋ waa dʋɔ.
Yesu sɩŋ wɩɛ
Matiyo 27:45-56; Maakɩ 15:33-41; Luka 23:44-49
28Ŋina wʋrʋgbɩɛ na, Yesu jiŋ gʋ dɩtɩɛna bʋrʋkʋma tam ganaŋkʋ ŋii yela na Ɩsʋɔ Sabɩɛwɩɛ ŋii a kɔŋ tɩba na, wʋ tawɩ sɛ, <<Nyʋɔlɛ chamɩna maŋ.>> 29Sɛ kpalɛ na wayɩŋ sʋlʋŋ aŋaŋsa ŋarɛ cha ŋɩ sɩmɩɛɩ dɩmaŋ, sɛ ba mʋ dɩchɩɛ nyʋ ŋɩ tɩba, sɛ wʋ mʋ saga hisopi daŋ dʋɔ, sɛ wʋ jiŋna ga ju Yesu nʋɔ jaŋ. 30Gʋ Yesu chʋchʋʋ sʋlʋŋ ŋii na sɛ wʋ tawɩ sɛ, <<Dɩ tam.>> Gʋ wʋ tawɩ ŋina na, sɛ wʋ mʋ wʋ nyi wuu, sɛ wʋ sɩŋ.
31Dɩmʋŋ wɩɩ gana cha ga yɩɛ kʋla wɩɩ fa Fɩɛsɛ wɩɩ bɛ. Ga tɩɛna dʋɔ yɩɛ Fɩɛsɛ wɩɩ gajanɛ. Yudatina bɩnɩɛ baa n ja sɛ atatina n saga dasɛ asagasa dʋɔ Fɩɛsɛ wɩɩ ɩ. Dɩmʋŋ dʋɔ ba sʋlʋ Pilato sɛ wʋ n yela na baa jaɩ ba nafara, na baa sagi atatina baa. 32Dɩmʋŋ dʋɔ yuora baa kɔŋ gaa chɩŋkpɩɛ jaɩ baalɛ wʋŋ ba jɔ ɩ daŋ gasagasa dʋɔ kpi Yesu dʋɔ na nafara, sɛ ba jaɩ wʋ baŋbaŋ wʋŋ gba teri. 33Ama gʋ ba kɔŋ Yesu jaŋ sɛ ba na gʋ wʋ taŋ sɩŋ na, ba n ti jaɩ wʋ nafara a. 34Ama yuora baa tɩba wʋrʋ mʋ banɛ sʋɔ Yesu sinabie, gabʋanaŋ sɛ asima na lɩŋ lɩɩ. 35Baalɛ wʋŋ wʋ na ŋɩ na, di seriya sɛ wʋ seriya gaa yɩɛ gasiŋteŋ. Wʋ jiŋ gʋ gasiŋteŋ sɛ wʋ a tawɩ, sɛ wʋ di seriya ganaŋkʋ amɩɛ gba ɩ lɩɛ di. 36Ŋina tibi bɛ ganaŋkʋ Ɩsʋɔ Sabɩɛwɩɛ ŋii a kɔŋ tɩba sɛ, <<Wʋ ŋmabɛ garɛ gba baa jaɩ ɩ.>>#Ɛsa 12:46; Kal 9:12; Num 34:20. 37Sɛ Ɩsʋɔ Sabɩɛwɩɛ ŋarɛ gba ti tawɩ sɛ, <<Baa kɩɛ wʋŋ ba mʋ banɛ sʋɔ ɩ na.>>#Sak 12:10.
Yesu wuu
Matiyo 27:57-61; Maakɩ 15:42-47; Luka 23:50-56
38Ŋina wʋrʋgbɩɛ na, Yosefu wʋŋ wʋ lɩɩ Arimatiya na ju Pilato jaŋ ga sʋlʋ ɩ Yesu gɩtatɛ. Yosefu cha wʋ yɩɛ Yesu kpalɛnarɛ bɛ asiri naŋ, akala takɩɛ wʋ a se Yudatina bɩnɩɛ baa. Sɛ Pilato fa ɩ gbɩɛ sɛ wʋ gaa mʋ Yesu gɩtatɛ gaa laŋ. 39Sɛ Nikodemosi wʋŋ wʋ cha ju Yesu jaŋ yuluma garɛ na kpaŋ ɩ. Sɛ Nikodemosi mʋ gafɔla lira mʋlʋŋ na baalɛjagɩɛ bʋga aja yɩɛ takɩɛ kiliŋgbe dɩnyɩkpa garɛ mʋ kɔŋ. 40Sɛ baa bala ba mʋ Yesu gɩtatɛ, sɛ ba mʋ nuŋ alifeŋsa susa ɩ mʋ dɩkalala atabaŋ pɔgʋ ɩ takɩɛ ganaŋkʋ Yudatina a yɩɛ ba atatina pɔɩ sɛ baa wuu ba na. 41Diele gaa ba jɔ Yesu daŋ gasagasa dʋɔ na, fʋɔ bie garɛ cha ga wɩɛ dɩmaŋ sɛ akpanaŋ bʋɔ gafɔlɛ garɛ wɩɛ fʋɔ bie gana naŋ gʋ ba n wuu ta wʋrʋ ga tɩba a. 42Ŋɩ cha ŋɩ yɩɛ Yudatina kʋla wɩɩ bɛ, gʋ bʋɔ gaa tirina dʋɔ ba mʋ Yesu ga wuu dɩmaŋ.
Currently Selected:
Yohane 19: CLL
Highlight
Copy
Compare
Share
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
