Yohane 16
16
1Ma tawɩ amɩɛ ŋina kpiniŋ bɛ, ganaŋkʋ ɩɩ yela amɩɛ lɩɛdi naŋ ŋ. 2Baa geŋ amɩɛ lɩɩ Yudatina tʋm danɛ naŋ. Gasiŋteŋ saŋa garɛ aja kɔŋ gʋ wʋkʋma wʋŋ wʋ kʋ amɩɛ na aja yɩɛ wʋ nfɩɛrɛ takɩɛ wʋ a tʋŋ fa Ɩsʋɔ. 3Baa yɩɛ ŋina kpiniŋ, akala takɩɛ ba ba jiŋ Juo wʋŋ yaa maŋ ŋ. 4Ma tawɩ amɩɛ ŋina bɛ, ganaŋkʋ saŋa gaa kɔnɛ na, ɩɩ nyiŋi gʋ ma fɩla jɔ amɩɛ nyienaŋ. Ma n chɩŋkpɩɛ tawɩ amɩɛ ŋina a, akala takɩɛ ma wɩɛ amɩɛ jaŋ.
Ɩsʋɔ Feliŋ ŋii dɩtʋm
5Sɛ Yesu tawɩ sɛ, <<Dɩtɩɛna maa ju wʋŋ wʋ kpiri maŋ na jaŋ, ama amɩɛ tɩba wʋrʋ n tasɛ maŋ ŋ, sɛ le sɛ nyaa ju?>> 6Akala takɩɛ gʋ ma tawɩ ŋina kpiniŋ na, ɩ bɔtaa. 7Ama maa tawɩ sɛ n nyii na dieli sɛ, ŋɩ wɩɛ dieli fa amɩɛ gʋ maa ju na, sɛ ma n ju na, Chɔnarɛ wʋŋ baa kɔŋ amɩɛ jaŋ ŋ. Ama sɛ ma ju na, maa kpiri ɩ amɩɛ jaŋ. 8Sɛ wʋ kɔnɛ na, wʋ a yela na dulunya a jiŋ gʋ ba di dɩpʋɛ lɩɩna dɩsʋbʋ, chirigi na Ɩsʋɔ dɩpʋɛ fuu dʋɔ. 9Wʋ a yela na baa na ba gʋ ba di baa dɩsʋbʋ dʋɔ dɩpʋɛ akala takɩɛ ba n lɩɛ maŋ di i. 10Wʋ a yela na baa na gʋ ba di chirigi dʋɔ dɩpʋɛ akala takɩɛ maa ju Majuo jaŋ, diele gaa ɩɩ ti na maŋ ŋ. 11Wʋ a yela na baa na gʋ ba di Ɩsʋɔ dɩpʋɛ fuu gaa dɩpʋɛ akala takɩɛ Ɩsʋɔ taŋ fɩla fu Sɩtanɩ wʋŋ wʋ a di dulunya gana dʋɔ na dɩpʋɛ.
12Ma wɩɛna wɩɛ fɔɩ maa tawɩ fa amɩɛ, ama dɩtɩɛna gana bɩrɛ ŋɩ bɔlɩɛɩ fa amɩɛ na ɩɩ dɩlɛ lɩɛ dʋ. 13Ama gʋ gasiŋteŋ Ɩsʋɔ Feliŋ wʋŋ kɔnɛ na, wʋ a pala amɩɛ asanaŋ ju gasiŋteŋ kpiniŋ naŋ. Wɩɛ ŋii wʋ a tawɩ na ba yɩɛ wʋ tɩŋtɩŋ wʋ teri i, ama wʋ a tawɩ ŋii wʋ nyii na nyiŋeŋ bɛ, na wʋ a tawɩ amɩɛ bʋrʋ gaa gaa kɔŋ. 14Wʋ a mʋ jilima kɔna maŋ, na wʋ a mʋ ŋii ŋɩ yɩɛ ma teri na kalaa amɩɛ. 15Bʋrʋ kʋma gaa ga yɩɛ Majuo wʋŋ teri na yɩɛ ma teri bɛ. Dɩmʋŋ dʋɔ sɛ ma tawɩ sɛ Ɩsʋɔ Feliŋ aja mʋ ŋii ŋɩ yɩɛ ma teri na kalaa amɩɛ.
16Sɛ Yesu ju dʋɔ tawɩ sɛ, <<Dɩ ka saŋa chonii ɩɩ ti na maŋ ŋ, ama saŋa chonii garɛ wʋrʋgbɩɛ na, ɩɩ na maŋ.>>
Bɔtaa na asadi
17Sɛ wʋ kpalɛnara baa barɛ tasɛ dɔŋa sɛ, <<Dɩtawɩ gaa wʋ tawɩ sɛ dɩ ka saŋa chonii ɩɩ ti na maŋ ŋ, ama saŋa chonii garɛ wʋrʋgbɩɛ na, ɩɩ na maŋ, akala takɩɛ maa ju Majuo wʋŋ jaŋ na, tie akala sɩnɛ?>> 18Sɛ ba ju dʋɔ tasɛ sɛ, <<Be sɛ wʋ a kalaa gʋ wʋ tawɩ sɛ dɩ ka saŋa chonii naa? Dɩ ɩɩ nyii wɩɛ ŋii wʋ a tawɩ na tie e.>>
19Yesu jiŋ gʋ baa ja baa tasɛ ɩ wɩɛ ŋina na, sɛ wʋ tawɩ ba sɛ, <<Ɩ tasɛ dɔŋa ŋii ma dʋɔna, gʋ ma tawɩ sɛ dɩ ka saŋa chonii ɩɩ ti na maŋ ŋ, ama saŋa chonii wʋrʋgbɩɛ na, ɩɩ na maŋ?>> 20Maa tawɩ sɛ n nyii na dieli sɛ, ɩɩ wii na ɩɩ bɔtaa yela dulunya a di ba asa. Ɩɩ yɩyɩɛ, ama amɩɛ gayɩyɩɛ aja bɩrɩŋsɛ asadi. 21Alʋ wɩɛ dʋŋɩwʋ naŋ na, wʋ a na yowu akala takɩɛ wʋ saŋa talɛ. Ama wʋ lʋrʋ wʋchaa wʋŋ na, wʋ a solo wʋ yowu ŋii dʋɔ, akala takɩɛ wʋ asadi gʋ wʋ lʋrʋ wʋchaa kɔŋ dulunya naŋ dʋɔ. 22Dɩmʋŋ sɛ kɩɛna fa amɩɛ gba, dɩtɩɛna ɩɩ wɩɛ bɔtaa naŋ, ama maa ti bɔrɛ na amɩɛ na amɩɛ asa a di, sɛ wʋrʋ baa dɩlɛ lɩɛ amɩɛ asadi lɩɩ amɩɛ jaŋ ŋ. 23Dɩmʋŋ wɩɩ gana ɩɩ ti tasɛ maŋ bʋrʋ ʋ. Maa tawɩ sɛ n nyii na dieli sɛ bʋrʋkʋma gaa ɩɩ tasɛ ma yɩrɛ naŋ na, Majuo aja fa amɩɛ. 24Mʋ gaa tala saŋa gana, ɩŋ tasɛ ta bʋrʋ ma yɩrɛ naŋ ŋ. N tasɛ ɩɩ yu, na amɩɛ asadi a yɩɛ kʋrʋkʋrʋ.
25<<Ŋɩ wɩɛ tɩba takɩɛ aduuna naŋ sɛ maa tawɩ maa fa amɩɛ bɩrɛ, ama saŋa garɛ aja kɔŋ gʋ maa ti tawɩ aduuna naŋ fa amɩɛ ɛ. Ama maa tawɩ tʋlʋ amɩɛ lɩɩna Majuo dʋɔ. 26Dɩmʋŋ wɩɩ gana na, ɩɩ tasɛ ma yɩrɛ naŋ. Ma aa tawɩ sɛ maa sɩŋ amɩɛ nafara naŋ sʋlʋ Majuo wʋŋ fa amɩɛ ɛ. 27Aye, Majuo wʋŋ tɩŋtɩŋ a ja amɩɛ wɩɛ, akala takɩɛ ɩɩ ja ma wɩɛ sɛ ɩ lɩɛ di gʋ ma lɩɩ Ɩsʋɔ jaŋ. 28Ma lɩɩ Juo wʋŋ jaŋ bɛ sɛ ma kɔŋ dulunya naŋ. Dɩtɩɛna maa lɩɩ dulunya naŋ na maa ti bɔrɛ ju Juo wʋŋ jaŋ.>>
29Sɛ Yesu kpalɛnara baa tawɩ sɛ, <<Dɩtɩɛna bɩrɛ nyaa tawɩ nyaa tʋlʋ daa, nyaa ti tawɩ aduuna naŋ ŋ. 30Dɩtɩɛna dɩ na gʋ n jiŋ bʋrʋkʋma, sɛ ŋɩ n ti tiri gʋ wʋrʋ n tasɛ nyaŋ wɩɛ ŋarɛ ɛ. Ŋina n yela sɛ dɩ lɩɛ nyaŋ di gʋ nya lɩɩ Ɩsʋɔ jaŋ.>>
31Sɛ Yesu tawɩ sɛ, <<Dɩtɩɛna bɩrɛ ɩ lɩɛ di?>> 32N nyii, saŋa garɛ a kɔnɛ, sɛ ga taŋ kɔnɛ gʋ ɩɩ puseŋ yela maŋ ma nyiŋeŋ ju amɩɛ tɩŋtɩŋ amɩɛ dɩɛsɛ naŋ. Ama maa dʋɔ ma nyiŋeŋ ŋ, akala takɩɛ Majuo wɩɛ ma jaŋ.
33<<Ma tawɩ amɩɛ wɩɛ ŋina bɛ, ganaŋkʋ ɩɩ yu wʋsɛfɩɛ ma tɩba. Ɩɩ na awʋrʋfʋɔ dulunya gana naŋ ama n yu digela. Ma di dulunya gaa dʋɔ.>>
Currently Selected:
Yohane 16: CLL
Highlight
Copy
Compare
Share
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
