Markus 1
1
Yesusé nwóm pafule, Yohanes ta nénbaptisé kyaté njé re nwómé ntubé
(Mat. 3:1-12; Luk. 3:1-18; Yoh. 1:19-28)
1Nte bo kéfétén Habar ta Fié, Yesus Kristusé njé Jou Lahatala ni Ntu I. 2Tatubé lima lesu, Habar ta Fié ta néi nabi Yesaya re néféténé, ta ni glio né faje,
Ya ktebo Aw po dunia pafule, Ya nase kané kyat isó nwómé ntubé.
Kyat ta njé bo nané kyaté né rngali si bo rlongé Awé, necé kfatailo dolo nfamówé yéfén ta Awé bo mdé lo i njé.
3Po géwgów isó ta nélówé pnuwé, I bo nécego kyat ta rfajól pocé né re gli ta pélóyé, néceg faje,
“Re mnuw pana, Jou bo nwómé! Se ffamówé yéfén ta I bo ndélo i njé.”
4Mnuw be néli, télél be ga kyaté njé nwómé, né Yohanes ta nénbaptisé kyaté njé. I nfan po géwgów ta nélówé pnuwé njé, se nbaptisé kyaté. Pocé nécegé kyaté-kyaté né faje, “Fngali mewé ro, bo fpóléné mew po Jou Lahatala ni, bóngo fpo fié bo ya kbaptisé keé mewé, pocé ga Jou Lahatala nase nfayangésé keé nómi sélsólé né.”
5Pocé kyat félé rfan néli po Yohanes ni. Kyat ta néi si lima kota Yerusalemé, re po farimé pnuw ta po bótén Yudea né. Néli, récegé róri sélsólé né tabóngo Yohanesé nbaptisé keé si po Wóé Yordané. 6Yohanesé ni juba njé haiwan unta ni liko i, sno ni pétpiténé njé ma haiwan liko i nóté. I nó mnómé né maduga kakaso re madu ta po banga lo né. 7Yohanesé nfasodoto kyaté né faje, “Ya ta kwómé ktubé, mayta mnuw pana kyat isó nóté bo nwómé. Kyat ta njé bo kgali késólé ni sandalé ni wólé le ma pantas pa, sababta I ni kawasa né lebe pélóy po ya ni. 8Ya kbaptisé mewé né re wóé, mayta I nase nbaptisé mewé né re Jou Lahatala ni Rohé njé.”
Yohanesé nbaptis Yesusé
(Mat. 3:13-17; Luk. 3:21-22; Yoh. 1:32-34)
9Waktu ta Yohanesé nbaptisé kyat po Wóé Yordané né, pocé Yesusé ma nwóm lima pnuw Nazaret ta po bótén Galilea né, tabóngo Yohanesé nbaptisé keé I pocé nóté. 10Nbaptis I rewóré, Yesusé npusél yama wóé lo, nékngól néya ga némnawé langété njé ntépówé, bóngo Jou Lahatala ni Rohé ntebé nóp po I ni né, tadolo mané pombo i. 11Télél be rlongé Jou Lahatala nméitén yama soroga, néceg faje, “Awé nte Ya ntig Awé, ta délé kmésié Awé. Sababta Awé ro ta mfamégo re Ya wlegé nje.”
Setané né riri kolano njé néyówé yéféné bo ntofén Yesusé
12Rewóré ta néi, Jou Lahatala ni Rohé njé nut Yesus néli po géwgów esó ta nélówé pnuwé. 13Yesusé ntolén I pocé ni mnuwo ngané yóféfóté, pocé setané né riri kolano njé néyówé yéféné bo ntofén I. Po géwgów ta néi ma reni haiwan ta masésró félé, mayta Jou Lahatala ntebo ni nénan ta si yama soroga né se rleleyan I.
Yesusé nfamdié ni yabé né néfétén Habar ta Fié
(Mat. 4:12-17; Luk. 4:14-15)
14Rfasung Yohanes po bui lo rewóré, ga Yesusé nfan po pnuw re pnuw ta po bótén Galilea né, se néfétén Habar ta Fié lima Jou Lahatala ni. 15I néfétén faje, “Waktu ta Jou Lahatala re néjaji ité né, re nwómo i ro. Mnuw pana Jou Lahatala bo nkawasa tadolo Kolano I po ni kyaté-kyat ta rdéréré I né. Se fngali mewé ro bo fdélé Habar ta fié ta lima Jou Lahatala ni né.”
Yesusé nkakémé ni motemote ta faiwóbno né
16Nuéncó Yesusé nfané ndé po Talaga Galilea lapo. Pocé némnaw món faftén si dorén luwé, Simon i re Andreasé. Si rénpawlo lóbéné, sababta riri yabé né réyówé be iné. 17Pocé Yesusé nécegé si faje, “Mew lima bo fdéréré Ya! Nimi yabé né maduga féyówé be iné le. Mayta bo fdéréré Ya, nase kfasodoto mewé féyówé kyat bo rdéréré Ya.” 18Pocé bóngo Simoné i re Andreasé rfatoléné keé riri lóbéné né, se rdéréré I.
19Rfan néli cuci, Yesusé némnaw món faftén séluwé nóté, isó ngósno Yakobusé, isó ngósno Yohanesé, Zebedeusé ni ntu si, rfamétegélé riri lóbén po yelé lo. 20Pocé Yesusé nkakém si bo rdéréré I nóté, tabóngo si ma rdéréré I, rfatoléné keé riri moke njé re kyat yabé nesté.
Yesusé nfaungé setan ta rcung po kyat isó ni
(Luk. 4:31-37)
21Yesusé I re ni motemote nesté rfan néli po pnuw Kapérnaumé. Po ngénngan Sabat ta kyat Yahudi né bisa rpe yabé pa, Yesusé nfan po agama Yahudi né riri um sambayangé lo. Pocé nfasodoto kyat Yahudi ta si pocé né. 22Kyaté né rtélélé rlongé ni dodoto né, sababta I nfasodoto né reni kawasa, dolo riri guru agama né pa!
23Pocé fajé reni kyat isó ta setan ntolno i. I némnaw Yesusé, bóngo n'gélay faje, 24“Ee, Yesusé, kyat Nazaret ta Awé. Amé kféyal Awé. Awé ta mwóm yama Jou Lahatala ni. Mwómé nte bo mpe am fanfawa? Bo mfamót am ó?”
25Bóngo Yesusé nécegé si faje, “Eh! Ffaténténgéné mewé. Fsópén pocé po kyat ta njé ni!”
26Pocé bóngo setané nesté rfakéyowén kyaté njé, rgélayé gliri né ma sésnaré ndimé, bóngo setané né ma rcópén pocé né. 27Kyat ta pocé né rtélélé se rfalécego, “Tabeu, I nané setané nesté rcópéné, tabóngo rcópén si ndimé né! Tagare I nfasodoto né, reni kawasa! Dodoto ta néi dolo nuéncó pafule, ta ité nte tlongé!”
28Pocé tabóngo si rut méitén ta néi néli lima sogado kyat ta po pnuw re pnuw ta po bótén Galilea né ma rlongé ndimé.
Yesusé nfafié Petrusé ni kmo mépiné njé
(Mat. 8:14-17; Luk. 4:38-41)
29Yesusé ncópén tóma agama Yahudi né riri um sambayangé lo, pocé I re Yakobusé re Yohanesé rfan néli po Simoné i re Andreasé riri umé lo. 30Si rwóm po umé lo, tabóngo kyaté né rfabingo Yesus ta Simoné ni kmo mépiné njé nlélété se nénbóy i le. 31Pocé Yesusé ncung néminé, nétané pégelé njé ni fao né se nfapangén i néya. Tabóngo waktu ta né óro, pégelé njé re nfié i se nléléyan si.
32Ta ngénngané ncep nóp né, kyaté né ruté kyat félé néli po Yesus ni, ta rpisé re ta setané ntolno si né. 33Kyat farimé po pnuw ta njéi rfajólo si lima po Simoné ni um nétóo né. 34Pocé Yesusé nfafié si ndimé: kyat ta rpisé, ta rlélété, re kyat félé ta setané ntolno si né. Setané né runé ta Yesusé Jou Lahatala ni Ntu I, mayta Yesusé wlo pafule bo kyaté né runé I. Se Yesusé npo fié pa bo setané né rfabingo kyaté né ta Yesusé njé Jou Lahatala ni Ntu I.
Yesusé nméiténé ndé Jou Lahatala
(Luk. 4:42-44)
35Ta rebo mélówé né, Yesusé npangéné se ncópén pocé po umé lo né, ga nfan po géwgów esó ta béklingéné. I re nwóm pocé ga nméiténé ndé Jou Lahatala. 36Waktu ta néi, Simoné i re ni délé né rémnaw Yesusé re tiso I, tabóngo rfané se réyówé I. 37Re rduk I bóngo rfabingo I, “Guru, kyat félé réyówé Awé, ga Aw pote-ó?”
38Bóngo Yesusé nécegé si, “Lima bo tfan po kota iglé ta nérakén pote né su, bo kfasodoto si Habar ta Fié nóté. Necé ta mulo sogado Ya kwóm po dunia nte.”
39Pocé bóngo Yesusé I re ni motemote né rfané réjel po farimé géwgów ta po bótén Galilea né. I ncung po agama Yahudi riri um sambayangé lo né, bo nfasodoto kyaté né re nfaungé setan ta rtolno kyaté né.
Yesusé nfafié kyat isó ta npado
(Mat. 8:1-4; Luk. 5:12-16)
40Nuéncó, kyat isó npado nwóm po Yesus ni, bóngo ntikibuku se ncuba I, ga néceg faje, “Guru, bo wlemé né, mfafié ya su pa? Sababta ya kuné Awé renim kawasa ta bisa mfafié ya.”
41Yesusé nlongé ta néceg fajé né, nmésia i. Pocé tabóngo nétewlé fao né néya po kyaté njé ni ga nécegé i, “Ya wlegé, se nte re mfié óro.” 42Tabóngo po waktu ta néi óro kyat ta npado njé nfié i.
43Rewóré ta néi, Yesusé nané i nfané, mayta nfaftóto i faje, 44“Mfan awé ro, mayta ma méfétén na, ta Ya re kfafié awé nte. Mfalów aw néli po imamé njé ni, bo mfaftulo i ta awé re mfié. Rewóré ga mpo nim sadaka haiwan faisó bo imamé njé ntapén i tadolo tatubé lima se nabi Musa nané mewé fpe né. Mpo sadaka ta necé, bo kyaté né runé ta awé re mfié.”
45Pocé bóngo kyaté njé nfané, mayta nfaténténgén i pa. Néféténé keé néli re lima, sogado Yesusé bo nfan po kota lo né ma re bisa pana, sababta kyaté né rfasésisén lima. Se Yesusé nfané ntolén I po géwgów ta béklingén ta reni kyat pa né, pocé ma kyaté né rfaféjalé I le.
Currently Selected:
Markus 1: PBS
Highlight
Copy
Compare
Share
Want to have your highlights saved across all your devices? Sign up or sign in
2026 Indonesia Bible Society
