Matius Kitab Matiusé ni wlólo né
Kitab Matiusé ni wlólo né
Habar ta Fié: Po Kitab Matiusé, Matiusé nlefo, “Habar ta Fié” (B. Ind: Injil pari Kabar Baik). Yesus Kristusé nwóm yama soroga lo, po dunia nje ndadi Kristus (B Ibrani: Mesias), Kolano ta Jou Lahatala néjaji tatubé lima lesu bo nfasalamaté kyaté. I ta npe ni diri ndadi korban, bo pai le ta ndélé I né, nase Jou Lahatala nfayangésé keé nó sélsólé né, bóngo nfayal Jou Lahatala se nduk ta fié sogado fajé néli le.
Kyat ta nlefo kitab Matiusé njé: Matius óro. Matiusé njé Yesusé ni motemote isó. Matiusé nlefo po ni buké lo sói ta i re némnawé, re nlongé ta i ndéréré Yesusé né. I ta njéi kyat Yahudi i. Ta ndéréré Yesus pafule né, ni yabé né nfalutno pajak po pemerentah Roma.
Matiusé nlefo po pai ni: Matiusé nlefo ni buké njé po kyat Yahudi ta rdéréré Jou Yesusé né. Kyat Yahudi né, ité ma tkakmé si ‘kyat Ibrani’ pari, ‘kyat Israel’ pari, ‘kyat Yahudi’ si nóté. Tatubé kyat Yahudi nesté Jou Lahatala re néftul si bo rdadi ni kyat si, re I ma npo si Jou ni Méiténé, ta ité técegé né Perjanjian Lama.
Dodoto-dodoto ta po kitab Matiusé: Po kitab ta njéi, Matiusé néfétén Yesusé nfafié kyaté né re nfaungé setan félé po kyaté-kyaté né. Po kitab ta njéi, reni dodoto pélim ta pélóy ta Yesusé néféténé: dodoto ta npe po métété lo né (Mat. 5-7), dodoto ta Yesusé npo po waktu ta nkakém re nané ni motemote nesté (Mat. 5-7), dodoto ta Yesusé nkakémé ni motemote né (Mat. 10), dodoto adeade ta Jou Lahatala nkawasa dolo Kolano po ni kyaté-kyaté né (Mat. 13), dodoto ta npe bo Jou ni kyaté né rngali (Mat. 18), re dodoto ta bo ndadi po waktu dunia nje bo nkiamaté né (Mat. 24-25).
Matiusé ma nlefo ta Jou Lahatala ni jaji po kyaté-kyat agama Yahudi né, ta I nase nané Mesiasé, Kolano ta Jou Lahatala nané I bo nfasalamaté kyaté njé, nwóm po dunia nje ni. Se po kitabé nje ni, Matiusé npake ayat-ayat félé lima Perjanjian Lama, bo kyat Yahudi né runé ta Yesusé njé I óro, ta kyaté-kyaté né re réftón I njé.
Pasal ta isémé né, Matiusé néfétén ta agama Yahudi né riri kyat tuté nesté réyówé yéféné bo rpuné keé Yesusé (Mat. 26-27). Matiusé néfétén ta Yesusé nduk kangelang sogado rsalib I, sogado nmóté. Mayta i ni ngané telé né, npangéné nmulé rewóré, bóngo nané ni motemote nesté rfané rfasodoto kyat iglé nóté bo rdéréré I né (Mat. 28). I nané si né bo rfan po farimé suku po dunia nje ni, bo pai re pai rdéréré I né, si ma réyówé kyaté bo rdadi Yesusé ni motemote si nóté sogado kyat ta po bótén pua le ma rdéréré I ndimé.
Currently Selected:
Matius Kitab Matiusé ni wlólo né: PBS
Highlight
Share
Compare
Copy
Want to have your highlights saved across all your devices? Sign up or sign in
2026 Indonesia Bible Society