Matius 1
1
Yesus Kristusé ni gele re gaé né
(Luk. 3:23-38)
1Yesus Kristusé I lima Abraham ni, re lima kolano Daud ni. Nte bo kéfétén ta sogado ntubé né I ni délut sogado wes re félbawé né tadolo faje#1:1 Ta mulo Matius néceg Yesus Kristus ta I lima kolano Daud re lima Abrahamé ni, bo ité tuné ta I ro ta Jou Lahatala néjaji tatubé ta bo nwómé nfasalamaté kyaté. Sababta po Jou Lahatala ni Buké lo, néjaji ta bo nwómé njé nase I lima Kolano Daudé ntu re gbu..
2Abrahamé ni ntu Ishaké, Ishaké ni ntu Yakobé, Yakobé ni ntu Yehuda re fténo iglé nóté. 3Yehuda ni ntu né Peresé i re Zera (riri neke ngósno Tamaré), Peresé ni ntu Hezroné, Hezroné ni ntu Ramé, 4Ramé ni ntu Aminadabé, Aminadabé ni ntu Nahasoné, Nahasoné ni ntu Salmoné, 5Salmoné ni ntu Boasé, (Boasé ni neke ngósno Rahabé), Boasé ni ntu Obedé (Obedé ni neke ngósno Ruté), Obedé ni ntu Isaié, 6Isaié ni ntu kolano Daudé. Daudé njé kyat Israelé né riri kolano i.
Pote se nópé ga taga bo kéfétén kolano Daudé ni ntu re gbu sogado ni wes re félbawé né tadolo faje. Daudé ni ntu Salomo (ni neke njé Uria ni pégelé tatubé njé), 7Salomo ni ntu Rehabeamé, Rehabeamé ni ntu Abia, Abia ni ntu Asa, 8Asai é ni ntu Yosafaté, Yosafaté ni ntu Yoramé, Yoramé ni ntu Uzia, 9Uzia ni ntu Yotamé, Yotamé ni ntu Ahasé, Ahasé ni ntu Hiskia, 10Hiskia ni ntu Manasye, Manasye ni ntu Amoné, Amoné ni ntu Yosia. 11Yosia ni ntu Yekhonya. Yekhonya i re ni fténo nesté rtub pó waktu ta kyat babelé né ruté keé kyat Israelé né néli po riri bóténé lo se rpeé riri béyak si né.
12Se ta kyat Israelé né re réléy lima Babelé né, bo kéfétén nturi re gburi sogado riri wes re félbawé, tadolo faje: Yekhonya ni ntu Sealtielé, Sealtielé ni ntu Zerubabelé, 13Zerubabelé ni ntu Abihudé, Abihudé ni ntu Elyakimé, Elyakimé ni ntu Azoré, 14Azoré ni ntu Zadoké, Zadoké ni ntu Akhimé, Akhimé ni ntu Eliud, 15Eliudé ni ntu Eleazar, Eleazaré ni ntu Matané, Matané ni ntu Yakobé, 16Yakobé ni ntu Yusufé. Yusufé njé Maria ni légaé i. Maria ni ntu Yesusé, ta rkakmé I Kristusé njé.
17Se po Abraham sogado Daudé ntubé né, ntebé nuén yófésó re nuén fót nópé. Taga po Daud ni sogado kyat Babelé né rpeé riri béyak kyat Israelé né ma ntebé nóp nuén yófésó re nuén fóté. Pocé sogado Kristusé ntubé né ma ntebé nóp nuén yófésó re nuén fóté nóté.
Yesusé ntubé
(Luk. 2:1-7)
18Nte bo kéfétén ta Yesus Kristusé ntubé né, I ni fénfané né ta dolo faje: Yesus Kristusé ni neke njé ngósno Maria. Maria njé i re món isó ta ngósno Yusufé njé rfajaji bo rafsówé. Si dórén luwé nté rfaltolné si pafule, mayta Maria re npe lapo. Maria njé nuné món pafule. Se ta npe lapo né, necé Jou Lahatala ni Roh ta ndadi i. 19Yusufé njé kyat isó ta wlo métegél po Jou Lahatala ni. I wlo pa bo kyaté né rfamaymóy Maria, se nlongé ta Maria npe lapo né, tabóngo nénuta po wlo wlólo, “Ta fié né kfatoléné keé i bo ma kéfsóo i na, mayta ma sogado kyaté né runé na.”
20Mayta Yusufé nénuta ta néi lesu, télél be Jou Lahatala ni nénan isó nwóm yama soroga po bélisé wlólo se nécegé i faje, “Yusufé, kolano Daudé ni ntu re gbu ta awé, ma mémtat na myó Maria bo ndadi nim pégelé i né. Sababta yomya ta I po sno wlólo njé, kyaté nturi I pa, mayta Jou Lahatala ni Rohé njé ta ndadi i. 21Se iga Maria nmawyóyé, ni ntu njé nase món I. Se kécego awé bo iga re ntubé, mfangósno I Yesusé, sababta Yomya ta njé I ta nase nfayangés I ni kyaté-kyaté né róri sélsólé bo rduk salamaté#1:21 Ngósén “Yesusé” ni ngale “Jou nfasalamaté kyaté.” I ni ngale né pai ta ndélé Jou Yesusé né, nase bo nsalamaté..”
22Necé farimé Jou Lahatala re néceg po ni nabi po tatubé lima lesu, se ta Jou nécegé né re ndadi i ro. I ni glio né tadolo faje:
23“Pote se néli, reni mépiné mya isó ta nuné món pafule, nase npe lapo,
se ntu ta bo ntubé njé, yomya món I.
Nase rfangósno I, ‘Imanuel’ ta ni ngale né, ‘Jou Lahatala ntaptubo re ndéréré ité#1:23 Nabi Yesaya nlefo nubuat ta njé po kitab Yesaya 7:14. Ta waktu Jou Yesus ntubé né, pocé ta ndadi i ndimé..’ ”
24Yusufé tésib i néya, tabóngo npe tadolo Jou ni nénan yama soroga njé nécego i né, se néyó Maria se ndadi ni pégelé i. 25Mayta sogado Maria nmawyóyé né, Yusufé nébak i pa. Tabóngo Yomya njé ntubé né, Yusufé nfangósno I, “Yesusé”.
Currently Selected:
Matius 1: PBS
Highlight
Share
Compare
Copy
Want to have your highlights saved across all your devices? Sign up or sign in
2026 Indonesia Bible Society
