Matius 5
5
Yesusé néfétén Jou ni méitén po métété lo
(Luk. 6:17-26)
1Yesusé néngóto kyat ta rdéréré I né re félé, tabóngo négafét I néya po métété myaku isó ni papo lo. Se néntolén I pocé, pocé tabóngo ni motemote nesté ma rfan néli se rérakén I nóté. 2Tabóngo Yesusé nfsodoto si. Se nécegé si faje,
3“Ta séngséngé bóto si né, maduga kyaté-kyat ta rpe riri diri dolo re riri ngale gélesó pa po Jou Lahatala usno lo né,
sababta si ta néi ta rdadi Jou Lahatala ni kyat si.
4Goné be kyat ta wlori kangelangé né,
sababta Jou Lahatala nase niwéné keé se séngséngé bóto si.
5Goné be kyat ta ryó be pópé le né,
sababta kyat ta dolo fajé né Jou Lahatala nase npo si dunia nje.
6Goné be kyaté-kyat wlori ncuka rpe be ta métegélé né, sababta Jou Lahatala nase n'gali sogado nbung si.
7Goné be kyaté-kyat ta rfaftulo riri masié po kyat pai le né,
sababta Jou Lahatala ma nase nfaftulo ni masié né po si ni nóté.
8Goné be kyaté-kyat ta wlori berési po Jou Lahatala usno lo né,
sababta kyat ta néi ta nase rémnaw Jou Lahatala.
9Goné be kyat ta rfaifio kyat ta rfatut lé né,
sababta Jou Lahatala nase nécegé ni ntu si.
10Goné be kyaté-kyat kyat iglé rfakangelangé keé si ni mdio rpe be ta métegél po Jou Lahatala usno lo, sababta si ta néi óro ta rdadi Jou Lahatala ni Ntu si bo nkawasa dolo Kolano po riri hidupé wlólo.
11Goné mewé sababta ni mdio be fdéréré Ya le,
kyaté né rfakcegé mewé,
rfakangelangé mewé, reni ta rpe nómi ta lé nóté. 12Wlomi né sanang re fséngé óro,
sababta po soroga nase fduk ta fié né tadélé pélóyé.
Tatubé lima né, nabi né ma re rduk pénpuné, ta ni mdio be rfawómo Jou ni faftóté po kyaté-kyaté.”
Kyat ta re fdélé Jou ne, mare ta fié po kyaté dolo gasi re manano né
(Mrk. 9:50; Luk. 14:34-35)
13Yesusé nécegé nóté, “Mew ta fdélé Ya né mare fpe ta fié po kyaté. Kfatailo dolo gasi. Gasi né ta nfamnó mnómé, mayta iga gasi né re nmamisé, nase reni nale pana se twóté keé nétó néliké bo kyaté né rfagteglo keé. Fajé nóté, bo nimi fafié né faftulo po kyat pana, bóngo mewé ma re nimi ngale gélesó pana.
14Kfatailo mewé né dolo manano ta nfaménano yéfén po dunia nje ni wlólo nte bo kyaté-kyaté né rdéréré Jou. Manano ta njé i masike tépiné i ma nase kyaté né rémnaw i le, tfailo dolo kota ta po métét papo lo né. 15Fajé nóté re logaloga né. Iga kyaté né résting i rewóré, bisa pa bo rfarfura keé i, mayta mare rétewlé i po ya bo nfamanano farimé kyat ta si po umé wlólo né. 16Fajé nóté re mewé. Nimi féifié né mare fpe po kyaté-kyaté bo rémnawé, bo si ma rtail re rfapélóyé nimi Moke Jou Lahatala ta I po soroga njé nóté.”
Yesusé nwómé bo férimé ta nabi-nabi né rlefo po Kitabé wlólo né ndadi i
17Yesusé nécegé, “Ma facogoma Ya kwómé nte bo kfayangésé keé aturan-aturan ta re rléfo po Musa ni kitab abén limé né, re po nabi-nabi ta iglé né riri kitab lo na, tisé. Mayta Ya kwómé nte, sói ta re rléfo po kitabé wlólo né nase bo ndadi i.#5:17 Musa ni kitab abén limé né re kitab-kitab ta igle nóté ta nabi-nabi tatubé rlefo né, ité téceg be Perjanjian Lama. 18Se flongé fafié é ta Ya kécegé nte. Iga langét re bétbété né pocé lesu, aturan-aturan ta po Musa ni kitab abén limé né, re po nabi-nabi ta iglé né riri kitabé lo né masike esó le ma nase myangés pa. Sababta aturan-aturan ta néi, reni isó pa ta bisa nliwé, se nase i pocé sogado ta Jou Lahatala re néjaji po tatubé lima né re ndadi i ndimé. 19Necé tamulo, kyat pai le ta ndéréré aturan-aturan ta po Jou ni Buké lo pa, masike aturan faesó le, re sogado ga nfaftulo kyaté igle bo rdéréré pa nóté, Jou nase néngóto i dolo kyat ta némya po I ni kyaté-kyaté né. Mayta kyat pai le ga ndéréré aturan-aturan ta po Jou ni Buké lo re nfaftulo kyat iglé nóté bo rdéréré, Jou nase néngóto i tadolo kyat ta pélóy po I ni kyaté-kyat ta rdéréré I né. 20Se nete Ya kécego mewé. Guru agama Yahudi re kyat Yahudi ta rdéréré dodoto Farisi né, si récegé rdéréré ta Jou Lahatala wlo né, mayta ta rpe né nfamwómo i pa. Se mewé mare féliw si, fpe ta fié né bo runé ta re fdéréré Jou Lahatala wlo njé, ga tagare fdadi Jou ni kyaté mewé.”
Ma ffamngamo na
(Luk. 12:57-59)
21“Mewé re flongé aturan ta rir gele re gaé tatubé lima nesté rduké, ta ni glio né ta dolo faje, ‘Ma fapun na. Pai ta nfapuné nase rfasól i.’ 22Mayta nte Ya bo kécego mewé, pai le ta ncawan ni délé né#5:22 ni délé né ni ngale po ayat ta njé, ménimi dél kyat pai le ta ndéréré Jou., nase rfasólo i. Fajé nóté re pai ta npopété ni délé njé, i mare rfatabono i po agama Yahudi né riri Mahkamah Agama nesté. Fajé nóté re pai le ta nécegé ni délé njé, ‘Awé renim ngale gélesó pa’, Jou nase nfasól i se ntéo keé i némin po naraka njé ni wlólo.
23Se iga re fsung po um sambayangé lo bo fpo nimi sadaka po Jou Lahatala ni po géwgów ta réntapén sadaka njé ni, po waktu ta néi iga ffatélolmo mewé nimi dél isó wlo pisé po mew ni lesu, 24se mare ffatoléné keé nimi sadaka pocé su, fsópéné bo ffané fféyfio mew re kyat ta njé i su, rewóré ta néi ga fpóléné mew néli nmulé bo fpo nimi sadaka né po Jou Lahatala ni.
25Fajé nóté, iga reni kyat faisó nkalaké mewé, se nuté keé mew po pengadilané lo, masike mew po yéféné lo lesu, mare famla le féyówé yéféné bo fféyfio mew su. Sababta iga fféyfio mew pa, nase néyété keé mew néli po kyat ta nkawasa njé ni, rewóré ga nase néyété keé mew néli nóté po i ni kyat ta bo rfasungé keé mew némin po bui wlólo né. 26Fatélolmo mew fafié, nase rcópné mew pa. Mare sogado re fpólésé ndimé utén ta hakimé né rané mewé fpólésé né, ga tagare rcópné mewé.”
Ma fyó sól na
27“Mewé re flongé aturan ta nje i, ‘Ma fyó sól na#5:27 Jou Lahatala nané ta néi po Hukum Yófésó né. Musa nlefo ta njéi po Keluaran 20:14. ’. 28Mayta nte Ya kécego mewé, iga reni món faisó ga néngóto mépin faisó se maduga nafsu i le ma, necé Jou nétén i re nyó sól po mépin ta njéi ni. 29Bo mtómi faspal wónéyé né npe sélsól sogado re fdéréré Ya pana, ffélébété keé bo ma npe sélsólé le na. Ta fié fsung soroga re mtómi faspalé le, sababta reni ngale pa re mtomi abén luwé ga fsung naraka né. 30Fajé nóté re faomi né. Iga faomi ta faspal wónéyé né npe sélsól sogado fdéréré Ya pana, féwetésé keé bo ma npe sélsólé le na. Sababta reni ngale pa re faomi abén luwé ga fsung naraka né.”
Mdél pa bo ffatélaké
(Mat. 19:9; Mrk. 10:11-12; Luk. 16:18)
31“Reni aturan ta nésé nóté, ta ni glio né faje, ‘Iga pai ta ntalaké ni pégelé, mare nlefo ni surat talak faisó bo npo i#5:31 Nabi Musa nlefo ta né po buk Ulangan 24:1..’ 32Mayta Ya kécego mewé nte, iga món re mépin fadiréncó ta re rafsówé, ga mépiné njé nyó sólé, gélesó pa bo ni légaé njé ntalaké keé i né. Mayta bo mépiné njé nyó sól pa, ndél pa bo ni légaé njé ntalaké keé i. Bo sogado ntalak i ga ni mépiné njé néfsóo nó món nésé, mépiné njé re nyó sólé. Fajé nóté, bo món faisó néfsóo nó mépin ta re rtalak i njé, i ma re nyó sólé nóté.”
Ma fsasi na
33“Mewé re flongé aturan esó nóté ta rir gele re gae tatubé lima nesté rduké né, ta dolo faje, ‘Bo fajaji fagalesó, fpe ta fécegé né. Bo sogado fajaji re fsasi po Jou ni, mare fpe#5:33 Jou Lahatala nané ta dolo né, po buk Imamat 19:12, po buk Bilangan 30:2 re po buk Ulangan 23:21. óro.’ 34Mayta nte Ya kécego mewé, ma fsasi le na! Masike féceg, ‘Dolo Jou, langété ntón ya’ matiné, sababta langété njé Jou Lahatala góo ta nkawasa dolo Kolano po ni kyaté-kyaté né. 35Masike maduga féceg be, ‘Bétbété ntón amé’ matiné, sababta bétbété njé Jou Lahatala sóo ni yéfyéf i. Bo fécegé, ‘Kota Yerusalemé ntón amé’ matiné, sababta pnuw ta njéi ité rir Kolano Jou Lahatala ni pnuw i, I ta njéi Kolano ta npélóy I. 36Fajé nóté ma fsasi bo fécegé, ‘Kokogé mwetés’ na, sababta bo nimi uté famutcó némfus pari nbablaté ma, necé mew pa ta fpe fajé né. 37Se ta fié né, iga ta fécegé né ga fatuwé, fsóngél be, ‘Fatuwé’, pari ta fatuw pa, fsóngél be, ‘Fatuw pa’. Mayta ma fsasi le na, sababta méitén ta néi lima setané né riri kolano njé ni.”
Ffaisno wlo né na
(Luk. 6:29-30)
38“Mewé ma re flongé aturan-aturan tadolo faje, ‘Iga reni kyat ta nfayóbété keé mtómi né, i mtó né ma mare rfayóbété keé. Re iga reni kyat ta nfapekét ngangom i né, i ngango né ma mare rfapekété keé#5:38 Jou Lahatala nané ta né po buk Keluaran 21:24-27 re po buk Imamat 24:20..’ 39Mayta nte Ya kécego mewé, iga reni kyat ta rpe nómi ta lé, ma fkotale ta si bo rpe né na. Iga kyaté réspakél fofomi ta wónéyé né, fpo ta féspal balété né nóté. 40Fajé nóté iga reni kyat ta rkalaké mewé bo ryó keé nimi kabaya né, nimi juba ta mulo lébé pélóyé njé ma fpo keé si nóté. 41Iga reni kyat ta pélóy faisó ndekené mewé fpó ni gina bo ni lóo fakilo pusó, fpó sogado ni lóo fakilo paluwé. 42Bo kyaté né réroro mew fagalesó, fdo si. Fajé nóté iga ralómo mew fagélesó, ffalómo si le.”
Fmasié kyat ta riri lé mewé né
(Luk. 6:27-28, 32-36)
43“Mewé re flongé aturan tadolo faje, ‘Mewé mare fmésié nimi délé né bo nimi lé keé kyaté-kyaté ta riri lé mewé.’ 44Mayta Ya bo kécego mewé, mewé mare fmasié kyaté-kyat ta riri lé mewé, re ta rfakangelangé mewé né, féroré bo Jou npo si be ta fié le. 45Iga fpe fajé, necé mewé re ffaftulo ta nimi Moke Jou Lahatala ni ntu mewé. I ta npe ngénngané njé bo ntulo férimé kyaté, ta rfié re ta rlé né. Fajé nóté re félfélé, ntebo né po kyaté-kyat ta rmétegélé re ta rmétegél pa né. 46Iga fmasié be maduga kyat ta riri fié mewé né, sói ta nase mewé bo fduké? Ma fngongano Jou Lahatala nase bo ndo mew sói néli na. Ta rénfalutno pajaké né ta cogo kyat léo si ma, runé rmasié kyat ta riri fié si né. 47Fajé nóté iga fhoromat be kyat ta riri fié mewé né, ma facogoma Jou Lahatala nase ntailé mew na. Sababta, kyaté-kyat ta rfayal Jou Lahatala pa ma runé rhoromaté kyat ta riri fié si né. Mayta mewé ma ftalko si na bo fmasié férimé kyaté. 48Se mewé re funé nimi Moke Jou Lahatala nmasié kyaté né reni ta sól faésó le ma tisé. Se mewé ma mare fpe né ta dolo I npe né nóté.”
Currently Selected:
Matius 5: PBS
Highlight
Share
Compare
Copy
Want to have your highlights saved across all your devices? Sign up or sign in
2026 Indonesia Bible Society
