Matius 10
10
Yesusé nkakémé ni motemote nesté bo nané si rfafané ni yabé né
(Mrk. 6:7-13; Luk. 9:1-6)
1Yesusé nkakémé ni motemote yófésó re séluwé nesté, se rfajól lima po I ni, bóngo npo si ni kawasa né bo rfaungé setan-setané, re bo rfafié kyat ta reriri péspisé sói le.
2Ta Yesusé nkakém si bo nané si rfafané ni yabé né, si ngósnori né ta nte: Simon (ta Yesusé nfangósno i Petrusé njé), Andreasé (Petrusé ni fténo i), Yakobusé i re ni fténo Yohanesé (Zebedeusé ni ntu si), 3Filipusé, Bartolomeusé, Tomasé, Matiusé (ta ni yabé né nfalutno pajaké), Yakobusé (Alfeusé ni ntu i), Tadeusé, 4Simoné (ta i re ni délé né bo rfaungé keé kyat Roma ta rkawasa po riri bótén Israelé né) re Yudas Iskarioté (kyat ta njé i ta bo nwagé keé Yesusé).
Yesus nané ni motemote rfafané ni yabé né
(Mrk. 6:7-13; Luk. 9:1-6)
5Yesusé nané ni motemote yófésó re séluw ta bo rfafané ni yabé né, bóngo nfaftóto si faje, “Ffané nte, ndél pa bo ffan po bótén ta kyat Yahudi si pa né, re ma fsung po kyat Samaria né riri kota né na. 6Mayta ffan be po ité rir suku Yahudi né le, sababta ta iglé né rdéréré Jou né re métegél pa na. Ya kfatailo si né tadolo domba ta rémsayé né#10:6 Yesus nané si rfan po suku Yahudi né su. Rfan po si ni rewóré, nase bo rfan po kyat ta suku Yahudi si pa nóté, kyat ta rfayal Jou Lahatala pafule.. 7Se ffané bo ffébingo si faje, ‘Re mnuw pana, Jou Lahatala nase nkawasa dolo Kolano po kyaté-kyat ta rdéréré I né’. 8Se ffané bo ffafié keé kyat ta rpisé né, kyat ta re rmóté né ffapangéné keé si, ffafié keé ta rpado né, bóngo ffaungé keé setan-setan ta rtolén si po kyaté-kyaté né. Kawasa ta kpo mewé né, re pélpólso pa. Se mewé ma iga ffafan kawasa ta né i bo fgali kyat iglé né, ndél pa bo féror pélpólésé. 9Bóngo iga fané, ndél pa bo fut pipis po nimi pipis góo lo na, masike necé pipis guraci pari, tembaga pari. 10Bóngo ndél pa bo fut yéléné, ngélngaléné, sandal pari tatoné. Sababta kyat ta rfawómo Habar ta Fié yama Jou Lahatala ni né, pantasé iga kyat ta pocé rgawene si fafié né.
11Bóngo iga re fsung po kota pari pnuw faisó ni, féyówé kyat pai ta nase ruté mew fié né bo ftolno si, sogado fsópén po bótén ta néi. 12Iga fsung po kyaté ni umé, féroré bo Jou ni féyfié né pélóy po férimé ta si po umé wlólo né. 13Pocé, iga kyat ta ftolno si né ga ruté mew fié, Jou ni féyfié ta féroré né nase rduké. Mayta bo sogado ruté mew lé, nase rduk pa. 14Fajé nóté iga reni kyat po um faisó ni pari po kota ta rtarima mew pa, pari rlongé nimi dodoto né pa, fsópéné mew po um re kota ta njé i óro. Bo bétbét ta natéf po sóomi pópo lo né, ffatété keé pocé ro bo runé ta re rcól po Jou Lahatala ni. 15Fatélolmo mew fafié é, pote se néli ga dunia njé nkiamaté, po waktu ta Jou bo nadili keé férimé kyaté né, kyat ta rtarima mew pa né nase rduké róri hukumané né tadélé météwé, nase lebe météw po hukuman ta kyat po kota Sodom re kota Gomora nesté re rduké né.”
Kyat ta riri lé mewé né, ma fémtat si na
(Mrk. 13:9-13; Luk. 21:12-17)
16Yesusé nécegé nóté po ni motemote nesté ni, “Flongé fafié é! Ta Ya kané mewé fané né, nase po kyat léo bóto, necé kfatailo mewé né tadolo domba ni ntu ta rfan po yaw banga né riri fapéluné né. Se mare fpe akal ta dolo guwé njé nénpe né, re wlomi né mare berési dolo mané pombo wlo né.
17Se fpe mew fafié po férimé kyaté! Sababta, pote se néli nase reni kyat ta riri lé mewé né rfagégóé mewé ga ruté keé mew néli po agama Yahudi né riri kyat tuté nesté ni bo rfasólé mewé. Bóngo nase rpake wólé ta ni wómo mdalémé né se réswako nómi po riri um-um sambayangé lo. 18Mewé fdéréré Ya, se nase ruté keé mewé bo rfatébono mew re gubernur-gubernur re po kolano-kolano né, mayta pocé nase fduk yéfén óro ta bo fafétén Ya po si ni re po kyaté-kyat ta rféyal Jou Lahatala pa né. 19Iga ruté mew néli, pocé ga rserakané bo radili keé mewé, mayta ma fémtat na sói ta bo fécegé né. Sababta po waktu ta néi óro, Jou Lahatala nase nfaftulo mew sói ta bo féceg po si ni né. 20Sababta necé mew pa ta fméiténé fdé si né, mayta nimi Moke Jou Lahatala nase nkawasa keé wlomi wlólo né, bo funé sói ta mewé bo fécegé né.
21Nase reni waktu nóté ta kyaté-kyaté né bo rpo keé rémóri né néli bo kyaté-kyat ta rféyal Jou pa né bo rpuné keé si. Fajé nóté re kyat tut móné né, si ma nase rpe nturi né tadolo fajé nóté. Bóngo reni nóté, yomya-yomya ta rmakotale po riri déluté né, si ma nase rpo keé riri déluté né néli bo rpuné keé si nóté. 22Sababta mewé re fdéréré Ya se férimé kyaté nase riri lé keé mewé. Mayta iga bo fdéréré Ya sogado fajé néli le, nase bo fduk salamaté. 23Se iga reni kyat ta rpuné mew po kota faisó ni, fówésé mew po kota ta nésé óro. Se fatélolmo mew fafié é, iga Habar ta Nfié njé ga ffawómo po férimé kota ta po Israelé né pafule, Kyaté Ntu ta Ya I yama soroga re kwómé.
24Reni motemote isó pa ta lebe npélóy po ni guru njé ni, pari reni kyat yabé isó pa ta lebe npélóy po ni tuangé njé ni. 25Fié óro, iga motemote isó ga nfamgo re ni guru njé né, bóngo fié óro, iga kyat yabé isó ga nfamgo re ni tuangé njé né. Ya tadolo nimi tuangé njé, se mewé nte Ya nik yomya-yomya mewé. Iga kyaté né ga récegé Ya kpake Beelzebulé ni kawasa, nase lebe flé nóté mew ta fdéréré Ya né. Se mare fpe mew fafié!”
26Yesusé nécegé nóté, “Se mewé ma fémtat si na, kyat ta bo rfakangelangé mewé né. Sababta sói ta répino mewé lesu né, nuéncó nase bo ncópéné se bo tuné keé le. 27Se sói ta Ya kfébingo mew ta kyat iglé rlongé pafule né, mewé mare ffébingé po kyaté ta félé né. Re sói ta kfagéyaso mewé né, mare ffébingé po kyat ta félé né ffakwaté mewé, tadolo fméitén yama um papo lo né. 28Mewé ma fémtaté kyat ta bo rpuné keé mewé né na. Sababta si maduga réfené rfamóté nimi badané, mayta réfen pa bo rfamóté nimi jiwa né. Se fémtat be maduga Jou Lahatala le, sababta maduga I ta néfené nfamóté nimi badan re nwóté nimi re jiwa né po naraka wlólo.
29Coba fénuta fafié: Mané gotolo séluw ta kyaté rwagé si né, masike mulori né maduga cuci le, mayta bo ropé ga faisó némnap po bétbété lo, nimi Moke Jou Lahatala nase nfamól i pa. 30Fajé nóté re mewé! Jou Lahatala ta délé nuné mew fié, sogado nimi uté ta po babokomi lo ma nuné keé ni féléo né. 31Se ma fémtaté le na, sababta mewé mulomi né lebe pélóy po mané gotolo nesté ni.
32Pai ta nécegé nfayal Ya po kyat ta félé né usnori lo, Ya ma nase kécegé kféyal i po nik Moke Jou Lahatala ta I po soroga njé ni usno lo. 33Mayta pai ta némtaté se nécegé nféyal Ya pa, Ya ma nase kécegé kféyal i pa po nik Moke Jou Lahatala ta I po soroga njé ni usno lo né.”
Kyat ta rdélé Yesus pa né rfakotale re kyat ta rdélé Yesusé né
34Yesusé nécegé nóté, “Ya kwóm po dunia nje ni wlólo né, ma facogoma nase kyaté né bo rfatut fié ndimé na. Mayta Ya kwómé nte nase kyat félé rfakotale sogado rfanpuné se iglé rmóté. 35Sababta ta Ya kwómé nte, kyat ta rdéréré Ya pa né rfakotale re kyat ta rdéréré Ya né: yomya móné né nase riri lé keé riri moke né, fajé nóté re yomya mépiné né, si ma nase riri lé keé riri neke né, malófé-malófé né ma nase riri lé keé kmori mépiné né. 36Kyat ta rdéréré Ya né, riri kyat ta si po umé wlólo né nase riri lé keé si.#10:36 Yesusé néceg ta néi, tatubé lima lesu Jou Lahatala re nécegé bo ndadi i se nabi Mikha nlefo, po buk Mi. 7:6.
37Pai ta nmésié ni moke re neke nesté lebe pélóy po ni mésié ta po Ya ni né, nejé pantas pa bo ndéréré Ya né. Fajé nóté re pai ta nmésié ni ntu món pari ntu mépiné né ga lebe pélóy po ni mésié ta po Ya ni, pantas pa nóté bo ndéréré Ya né. 38Se kyat pai ta bo ndéréré Ya, mare ma ndéréré ni wlo njé na. Masike nduk kangelang sói le sogado bo nmóté ma, ndéréré be Ya le. Bo tisé, pantas pa bo ndéréré Ya né. 39Kyat pai ta nfatubé be i ni diri né le, nejé nase nmóté né nduk ta fié pa sogado fajé néli le. Mayta kyat pai ta npo ni hidupé bo ndéréré Ya, i ta njéi nmóté né nase nduk ta fié sogado fajé néli le.”
Kyat ta rdéréré Jou né nase rduk ta fié
(Mrk. 9:41)
40Yesusé nécegé nóté, “Kyat pai ta ntarima mewé, necé tadolo ntarima Ya, kyat pai ta ntarima Ya, necé tadolo ntarima Jou Lahatala ta nané Ya njé. 41Kyat pai ta ntarima nabi, ta rfawómo Jou ni faftóté po ni kyaté-kyaté né, kyat ta njé i nase nduk ta féyfié yama Jou Lahatala ni né tadolo nabi nesté rduké né. Fajé nóté re kyat ta rpe be ta métegél po Jou Lahatala usno lo né, ga kyat pai le rtarima si, nase rduk Jou ni féyfié né tadolo kyat ta rpe ta métegélé nesté rduké né. 42Nik motemote nesté, masike réngóto si dolo gélesó ni ngale si pa, mayta kyat pai ta ndo si wóé babóblo masike fagalas pusó le bo rinémé ma, Ya kécego mewé kyat ta n'gali si njé nase nduk féyfié yama Jou Lahatala ni né tadélé pélóyé.”
Currently Selected:
Matius 10: PBS
Highlight
Share
Compare
Copy
Want to have your highlights saved across all your devices? Sign up or sign in
2026 Indonesia Bible Society
