Rom 13
13
Krisgaz tan elon gowerment paenlon demadodime
1Tamolpain daŋan gowerment inan gaten peadinlon demadoŋan Anut mon gaten nauk daŋan fun, tangaten demadodime me Anut inaulak.#Tit 3:1; Joh 19:11; Met 8:15 2Mewoi tata i tangaten liwon jabimap i Anut inan kibiaiŋ liwon jabiime, me i liwon diabidime i betenaek dezaedime. 3Gowerment gaten i kagin gauaioi dizutnen wagai so denaudime, tea, kagin salanoi. O tan gatenoi so uzezoi ubol? Meginpe abaŋ gauai me unaumap i gauai e ipaowoi.#Pet I 2:13, 14 4I Anut inan dinek, o gauai madowoi ipanolak. Ge o kagin salan unautap o uzezpa mado, i se mon sebuzidaŋan tealak, i Anut inan dinek, i me abaŋ salan inauime me naon paniime.#Kan 82:6 5Mewoilakoi id buzunoi mon sibinadpa dagom so temadowoi, tea, kakadoi mai. 6Mewoi aŋ täks ataniame, tangaten i Anut inan uzattamollak me uzat e mok denaudime. 7Jawadan naon daŋan ipinidin, täkstap täks pinidin, duti me duti, azeznen me azeznen, biŋan me biŋan bisaknen.#Mat 22:21
Ilopanek me kibiaiŋ dadon isaknen
8Aŋ ta abaŋ ta paninen tiniminen so ien mon, nug ilon panipaninen me mon. Ta i ta ilon paniime i kibiaiŋ uzi panilak.#Gal 5:14; Tim I 1:5 9Kibiaiŋ me, O jait so wabi mon! Tamol ta so funip imat mon! O mala so isi mon! Kibiaiŋ tata mai me azu elon temanilak, O sibe ilo paniume egin, megin oina muduban mai ilo pani.#Ekso 20:13–17; Lew 19:18 10Ilopanek me muduban alan so paniime, mewoilakoi ilopanek me kibiaiŋ inan niŋon mok.#Kor I 13:4; Mat 7:12
Ujanzen isoime mewoi lelamanlon tatozoi
11E mai, saen taloŋtame saen mug pisinig id wonoŋ jabeklon titiziauwoi. Gazo patudpaseknen id izidnen iseg ienime, get ilodlon malikmeg egin tea.#Ef 5:14; Tes I 5:6, 7 12Tidom mug binig fatu gigig siziz ipani. Mewoi mafuz inan nauknauk tapaspa lelaman inan judazuk tabpa tatozoi.#Joh I 2:8; Ef 5:11 13Adlon egin gauai tatozoi, anaŋ tetameklon, aiu mileknenlon, jaitlon, abaŋ salan daŋanoi buben funeklon, zoiklon gik moknenlon tea.#Luk 21:34; Ef 5:18 14Tea, Ujanzen Jesus Kristus anulapa, ge tinin inan malanisek uzi paninen kankan so aŋale mon.#Gal 3:27
New Testament published by the British and Foreign Bible Society in 1960. Genesis published by the Australian Bible Society in 1971.