Israel Kan 89
89
Etan, Esrawain, inan Maskil ta.
1O Ujazen, ŋa oina ilopanek segatekdaŋan dedeŋanip kanam ŋabiwoi;
auaglon oina bube maliknenoi daz uzek daŋan ŋipidinoi.
2Oina ilopanek segatekdaŋan me dedeŋanip ienoi unaulak,
oina bube maliknen kagin me did egin zatamlak.
3O ubollak, Ŋa inag pilianek mai temaneknen anaulak,
ŋa Dawid, inag begabeg, Malik e ŋepailak:
4Ŋa oina nanugaz ŋenaup i sansanpe demadowoi,
daz uzek daŋanoi oina pezatiu ŋestemaniwoi. Sela
5O Ujazen, did me oina kubelmaŋauoi kalel jabiwoi,
oina bube maliklak gungaz nadin medaeŋlon!
6It did ilonnen Ujanzen mai dikol e taboloi?
It eŋel leŋadinlon Ujanzen egin,
7Anut mewoi gungaz nadin kaunsillon dizutdime,
ujanzen bezeteŋanekdaŋan, i dililitig demadodime me daŋan nenaza?
8O Ujazen, Anut daupdaŋan,
it o egin tiwondaŋan, O Ujazen,
oina bube maliknen kagin lilito?
9O mas salan gaten madoume;
kizikoz dimaismap o unaug to diboldime.
10O Rahab sesanun egin bufazilak,
oina nima tiwondaŋanlon oina agez pititilialak.
11Did me oina, tan mai oina;
tan mai, abaŋ ilonnen diendime me daŋan mai, o fun unaulak.
12Nord saut mai o unaulak;
Tabor Hermon mai judindaŋan neaoi kalel diabidime.
13O nima tiwon zendaŋan;
nima me gegaun, nima waŋ latnen wote.
14Taoz talek tiduk mai me oina pezatiu fod unaulak;
ilopanek segatekdaŋan bube malik me mai o naonen dimugse.
15Putudin isa tamolpain me nal ujan inan muguzuŋ diloŋ,
O Ujazen, i me oina nao inan lelamanlon ditozdime,
16me nal melaen daŋan oina nealon zigiaime,
oina taoz biŋa dibisadime.
17O nadin zugudin inan kubel fun,
oina lolon amnama fai biŋan biselak.
18Amnama gubiz me Ujanzen inan,
nama kiŋ me Israel inan Gun inan.
19O wagam malan nitun jazek sinan azu ubollak,
oina buben malikwain upaig ubol:
Ŋa lilitkubel ta tiwondaŋan gatenlak ŋenau,
tamolpain ilonnen pilianilak me ŋa ŋibiselak.
20Ŋa Dawid, inag begabeg, ŋenasig ŋeŋale;
inag gazeŋ gunlon ŋubuzugusilak;
21Meginpe nimag gaid i maip madowoi,
nimag mai satuk ipaniwoi.
22Agez i se so wozaiwoi,
salanbibiadin i dezaep imulnen so diloŋoi.
23Ŋa i naonnen inan agez ŋupuzotoanawoi,
me i dumugunidime me ŋa ŋafuwoi.
24Inag bubeg maliknen ilopanek segatekdaŋan mai i maiwoi,
inag neaglon inan fai bisap ienoi.
25Ŋa inan niman maslak,
niman waŋ nazlak ŋenaup ienoi.
26I ŋa wigiagpa iboloi, O ŋainag Mam,
inag Anut, ŋainag patugisanen Pat.
27Ŋa ŋenaup i matu madowoi,
tanlak kiŋ ilonnen i ujanzenoi.
28Ilopanek segatekdaŋan ŋa iwoi dedeŋanip so ŋibiniwoi,
ŋainag temaneknen sansan zatampa ienoi.
29Inan wozou ŋenaup dedeŋanip madowoi,
inan pezatiu didpanu inan nal eginoi.
30Inan nanun ŋainag kibiaiŋ dibinimap,
ŋainag kibiaik duzi so depanitap,
31i ŋainag kibiai dagom so depanitap,
ŋainag kibiaiŋ duzi so depanitap,
32ŋa inadin doloanek jatoklon naon ŋipinidinoi,
nadin salannaukoi ŋupututawoi.
33Ŋainag ilopanek segatekdaŋan bo i‐lon so ŋepasiwoi,
ŋainag bubeg maliknen kagin so ŋibiniwoi.
34Ŋa ŋainag temaneknen so ŋepasiwoi,
azu auaglonge itaselak me so ŋubuliwoi.
35Ŋan taimon elon ŋa ŋainag gun sinanlon ŋabollak;
ŋa Dawid azu sekauk so ŋepaiwoi.
36Inan wozou dedeŋanip madowoi,
inan pezatiu me ad fonlak ienime eginoi.
37Fulei egin gaid zatampa ienoi;
did ienmap eginmap seŋanip ienoi. Sela
38Ge gazo o betetanig meselani mai,
o oina buzugusekwainoi buzu kekazudaŋan.
39O oina begabeg mai temanek unaulak me pasilak;
o inan lilitkubel kulukallon unaug nun panilak.
40O inan mad daŋan pitiŋinalak,
inan kaboŋ daŋan utazge didulak.
41Digegge diladime daŋan ponau diabidime;
i mudubangaz nadin dizawaik.
42O inan agezgaz nadin nimadin waŋ stemanilak;
o unaug inan agez daŋan zigiadime.
43Au o inan badiz malan bulig
julon o i so seŋanilak.
44O inan nimanlon kabu gaten taladdaŋan pasilak,
inan pezatiu tanlak tani idu.
45I ai faunge itozmeg nal taitai mon panilak,
o unaug mamai i toani. Sela
46Saen pitep, O Ujazen, o gaid kukumpa madowoi?
Saen pitep buzu ja egin naniwoi?
47Ilo isou, O Ujazen, tamol inan umaz o panilak me tenaek dodin,
abaŋ aitnen o tamol nadin aigaz daŋan se unaulak!
48Tamol it mademap mateŋ so nasiwoi?
It inan nitun Hades inan tiwonlonpa tetazi ŋalenen iloŋ? Sela
49Ujazen, oina ilopanek segatekdaŋan getnen me ŋan,
me o bube maliknenlon Dawid Malik e upailak?
50O Ujazen, oina begabeg dizan dewaidime me ilo isou;
ŋa bubeglon tamolpain nadin azu salan melon
51oina agez dizag dewaidime me ŋejoazeŋame,
melon oina buzugusekwain inan nien ban baŋai azu depanidime.
52Ujanzen dedeŋanip patun isap madowoi!
Malik mok malik.
Currently Selected:
Israel Kan 89: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
