Israel Kan 81
81
Kanamkamaŋ inan: Gitit sinan. Asaf inan kanam ta.
1Anut, inad zagud, iwoi dug beŋten abipe;
Jakob inan Anutoi jumidaŋan muguzuŋ anau!
2Kanam abi, dum iwi,
laiar gamun harp mai.
3Fulei faun itasap horn iwi,
fulei gubizmap, inad tuz nallon.
4Me Israel inan kibiaiŋ ta,
Jakob inan Anut inan kibiaik ta.
5I me Josefgaz ilonnen dagom paneknen azu inaulak,
i itaseg Egipta fatu bufateg ilemeg.
Auan ta so ŋaloŋlak dab ŋepaniŋame;
6Ŋa jazolak joazek muzuan ŋepasilak;
sazeg muzuanoi mai nima ŋepasilak.
7O alan unaumeg o uwogge ŋa tetazo ŋiŋiliolak;
ŋa wail aben miŋianeklon aua ŋabilak;
Meribah naz aenlon ŋikibianolak. Sela
8O inag tamolpain, aloŋpe, ŋa ŋebebanaŋmap!
O Israel, o inag auag dab panipeges!
9Tibud bas ta aŋ leŋamilon so madowoi;
tibud bas ta naonnen so atakokoi.
10Ŋa Ujanzen, oina Anut,
me Egipta fatulonge duzog uselak.
Aua sepani gauai, ŋa abaŋ ŋidizip fuamoi.
11Ge ŋainag tamolpainbadim i auag dab so depani;
Israel i ŋa dimoi.
12Mewoi ŋa ŋabinge i nadin bubudin gegaunlon ditoz,
sebadin auadin inan azu duziwoi.
13O ŋainag tamolpainbadim auag dab panipeges,
Israel ŋainag dallon ditozpeges!
14Ŋa pasak nadin agez ŋafuwoi,
daŋekgaz nimag diŋiap ŋipinidinoi.
15I me Ujanzen dumugunidime i iwoi demagozpa ditozoi,
i sansanpe depadalpa demadowoi.
16Ŋa whit gauai moklon ŋufutuaŋoi,
pat inan gubuzustaen ŋepanaŋpa loami didiwoi.
Currently Selected:
Israel Kan 81: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
