Israel Kan 69
69
Kanamkamaŋ inan: Moz inan. Dawid inan kanam.
1O Anut, patug pasipe!
Lom ifotge klaguglak itaselakoi.
2Tan bodoklon ŋatoglaŋame,
nieg pazeknen tealak melon;
ŋa naz tiglon ŋadu,
lom foglak iseg ilaime.
3Ŋatameg tiwog izoz;
klagug kekaka ibol.
Ŋainag Anut malan ŋenaumeg
malag salan.
4Gategzaun nenazig kuzum mok
tinignen teag dumugunagdime;
dufunagpa ŋamatoi dibol me tiwodindaŋan,
ŋan i me azu sekauklon dibiagoi didudime.
Ŋa ponau so ŋeŋalelak
ja me gazo naon ŋenauwoi?
5O Anut, o ŋainag gedagad uloŋ;
abaŋ ŋa ŋetezebedanilak me o naonen toanig so ien.
6Unaup i me owoi dusuzuazoudime me ŋalon
mamai so deŋalewoi,
O Ujazen, daupdaŋan;
Unaup i o debezanodime iwoi ŋalon uf azu so itasawoi,
O Israel nadin Anut.
7Owoi i ŋawoi azu salan diboldime,
owoi mamai naog toanilak.
8Taiggaz zidinnen ŋa baswain ŋakol,
nen inan nanunai zidinnen ŋa panutawain egin.
9Oina aboi wagai ŋenaug mug tiwog taze,
uf azu i owoi dibollak me foglak idu.
10Ŋa udeklon nitug ŋezaeg imulmeg,
i mewoi uf denau.
11Jamel memasendaŋan ŋipilag
neag alan saz egin desae.
12I me panu inan dalauanlon demataldime ŋawoi dikibiai,
aiu milekgaz ŋawoi dug desepaledime.
13Ge O Ujazen, ŋa me o mai ŋogodoanoŋame,
O Anut, oina saenlonpa,
ilopanek segatekdaŋan zenlon auag wabipe.
14Tan bodoklon ŋatoglawoi,
oina bube malik inan kaginlon gateg pasipe;
inag agezoi tetazag ŋiliagpe,
naz tig menenlon.
15Lom bitip foglak so idusawoi,
betabet so teŋalagoi,
lof foglak mon auan so funatiwoi.
16O Ujazen, oina ilopanek segatekdaŋan me gauai, auag wabipe;
oina teŋaealannen zen sinan nao bulip diŋiagpe.
17Oina begabegoi nao so miŋiani mon;
ŋa alan ŋenauŋamelakoi, pasak auag wabipe.
18Izignen udup udad ŋiliagpe,
inag agezoi pisiagpe.
19O ŋawoi uf uloŋ,
ŋainag mamai, biŋag pitiŋinilak mai;
inag agez daŋan uloŋ.
20Uf azu bubeg pitiŋini,
ŋa bubeg idu iau.
Tata ladin depanagoi tat ŋabolge lo tea;
ilog deŋalenen tata mai so ŋail.
21Anaŋ naon baib panag,
nazoi ŋamatge i naz kisipan depanag.
22Unaupa nadin badim noadinnen amag egin ijaboi
nadin janauk inan tuz me siŋ inauwoi.
23Unaup meladin mafuz jabip abaŋ so denasiwoi;
nieden gaid telelauwoi.
24Ina buzu me fodinlak wali,
oina kekazu nanek penenazap uwaboi.
25Inadin panu me fuzai inauwoi,
tata nadin tazaslon madonenoi piziana.
26O pututiumelak me i deŋale duzidimelakoi,
o tinin usaelak me i alan subuŋan depanidime.
27O auan naon batep ilap
o iwoi lo so udu mon.
28Buk baslon o neadin bedazep,
inadin neadin taozgaz nadin neadin maip gazep so ienoi.
29Ŋa noag alan, ilog tinig mai dizoz;
O Anut, oina patunisanen kin latnen noagoi.
30Ŋa duglon Anut neanoi kalel ŋabiwoi;
pez paneklon ŋa biŋan ŋibisawoi.
31Me bulmakau, teap bulmakau dauai fai nien kudumendaŋan
nenazip Ujanzen buben gamunoi.
32Modoanalak me denasip ladin gauaioi;
aŋ me Anut abezaniame bubumi bas imais.
33Ujanzen alangaz auadin iloŋ,
inangaz sebaneklon demadodime me so zezeŋanaime.
34Did tan mai iwoi kalel diabiwoi,
mas, abaŋ melon debelamaidime me mai.
35Anut Sion patun pasiwoi,
Juda inan panu faun isosoi;
inan begabeg melon fun egin demadowoi;
36begabeg nunudin fuzadin diŋaloi,
i me inan neanoi dimat i melon demadowoi.
Currently Selected:
Israel Kan 69: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
