Israel Kan 66
66
Kanamkamaŋ inan. Kanam ta, dug.
1O tan daŋan, Anutoi babeŋ gamun anaupe;
2inan nean inan kubeloi dug abi;
kalel gauai abip apani!
3Anut apai, Oina nauknauk bezeteŋanamanen!
tiwo ujan moklakoi oina agez o naonen tinidin belelei ibolge ditozdime.
4Tan daŋan naonen sibiniag digoddime;
i kalel diabi depanodime,
neawoi kalel diabiwoi. Sela
5Asop Anut inaulak anasi:
tamol leŋadinlon i nauknauk bezeteŋanek inauime.
6Mas ibuli tan kazak inau;
tamol dipazge naz dedaia.
Melak id i‐lon jaud isa,
7i me inan tiwonlon dedeŋanig gaten inauime,
ŋan i me inan malanlon panupanu dab pinidinime —
unaup liwojabekgaz sebadin so bisiadinoi. Sela
8O tamolpain, inad Anutoi kibineknen azu abolpe,
iwoi kalel jabeknen liŋan taloŋoi.
9I me tizinadge id baswain mai tatoz,
i nied seŋanig so peselau.
10O Anut, ŋan o kibianad;
silwer dikibianidime egin o kibianama.
11O amaglon noamalak;
o niemalon maiai unaulak;
12tamol horsdaŋan dodoloanamag o so piziana;
am ja naz mai abufateg ale;
ge o duzumag am aben ujanlon atase.
13Ŋa nanek inan janaukdaŋan oina ablon ŋaduwoi;
azu malik ŋabollak me niŋon ŋenauwoi,
14alan ŋenaumeg fiziŋog ibollak,
auag ibollak ŋan me.
15Dazuk numuzandaŋan ŋa wiwalak ja ŋenaup ŋepanowoi,
belelek dauai inan janauk inan jakaslon mai
ŋa bulmakau dauai, goutlon mai ŋa ja ŋenauwoi. Sela
16Aŋ daŋan me Anutoi azutame, asop aloŋ,
i ŋawoi inaulak me ŋepaiaŋoi.
17Ŋa beŋten ŋewagilak,
baleg i biŋan ibiselak.
18Ŋa bubeglon kagin salanoi ŋamatpe,
Ujanzen i dab so panagpe.
19Ge Anut i malik dab panilak;
inag gadiŋ inan auan dab panilak.
20Anut patun isap,
i ŋainag gadiŋ so bitilak,
inan ilopanek segatekdaŋan izignen so pasilak!
Currently Selected:
Israel Kan 66: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
