Israel Kan 34
34
Dawid inan kanam ta. I Abimelek naonnen gedagad egin itozmeg i dukuduig ilelak, menen sepalelak.
1Ŋa saen daŋanlon Ujanzenoi azu gauai ŋaboloi;
iwoi auaglon gaid kalel ŋabiwoi.
2Nitug Ujanzenlon fezafuzime;
modoanag demadodime me diloŋpa judin isawoi.
3Ŋa maip Ujanzen biŋan tibisaŋan,
auad taimon inan nean tibisap latnenoi.
4Ŋa Ujanzen ŋebezanig i auag jabi,
i inag ŋazeznen daŋanlonge tetazag ŋiliaglak.
5I adaŋep noami lelaman;
meginpe aŋ noami gaid mamai teaboi.
6Tamol gadon e ibobge Ujanzen auan iloŋ,
inan alan daŋanlonge patun pasi.
7Ujanzen inan eŋel i me Ujanzenoi dizutdime,
i daŋan lilitag tizinaime, tataz iŋal maiime.
8Kukumzi anasip Ujanzen i lo!
Tamol me i‐lon seafug madoime i jaun isaime.
9Inan gungaz, aŋ Ujanzenoi azut,
me iwoi dizutdime i alan denaup so demadowoilakoi.
10Laion faun me santa anaŋ teabge pitol ifuime;
ge me i Ujanzen debezanidime i abaŋ gauai ta so teaboi.
11Ai aso, auag dab apani,
ŋa Ujanzenoi azutnen ŋepeteŋanaŋoi.
12Tamol it madoime me basoi jaeŋ funiime?
abaŋ gauai ŋalep nal kin kuzum jaun isawoi ilon ibol?
13Kagin salanoi bale dab pani,
fiziŋo azu sekauk so iboloi dab nau.
14Kagin salan binip, kagin gauai nau;
mazozoi dalel me uzip utoz.
15Ujanzen inan malan taozgaz diŋiaime,
tiliŋan nadin gadiŋ salo feaniime.
16Ujanzen inan naon salannaukgaz diŋiaime,
i gusutap tanlak iwoi faun ladin so isouwoi.
17Taozgaz anedin idunenoi digodmap,
Ujanzen nadin alan daŋanlon putudin pasiime.
18Ujanzen bubudin pitiŋineklak me zidinnen madoime,
ladin puzotoanalak me putudin pasiime.
19Tamol taoz inan modoanek kuzum;
ge Ujanzen me daŋanlonge tetazi ŋaleime.
20Inan dog daŋan tiziniime,
taimon ta so pisiniime.
21Abaŋ salan, salangaz ifuwoi;
taozgaz dumugunadime me meselanawoi.
22Ujanzen i inan begabeg putudin pasiime;
tata i‐lon deseafug demadodime i so meselanawoi.
Currently Selected:
Israel Kan 34: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
