Israel Kan 116
116
1Ŋa Ujanzen ilog ŋepani, i ŋainag auag
gadiŋ mai dab panilakoi.
2I tiliŋan inaug ŋawoi po ibol,
mewoi ŋa i ŋewagip mateŋ mon geg.
3Mateŋ inan amag lilitag;
Hades inan izoznen biag;
ŋa alan noag jaeŋ funag mai.
4Meginge ŋa Ujanzen nean ŋewagi:
O Ujazen, ŋa o ŋogodoano, tinig nitug mai patug pasipe!
5Ujanzen i lo taoz mai;
inad Anut kanimdaŋan.
6Ujanzen ladin tealak me tizinaime;
ŋa sagaflon ŋaenge i patug pasi.
7O nitug, oina jaeŋ ŋalek abenlon umul;
Ujanzen o duzo nuo mai gauailakoi.
8O ŋainag nitug mateŋlonge tetazi ŋalelak,
malaglon melaug so iduwoi,
nieg so peselauwoi tizinaglak.
9Ŋa Ujanzen naonnen ŋatozŋame,
tamolai bas nadin fatulon.
10Ŋa alan mok noagime ŋabolmeg
mai bubeg so feanilak.
11Ilog bebazemeg ŋabol,
Tamol daŋan suzuazouk se mok mon.
12Ŋa Ujanzen inan lodaŋanoi
abaŋte ŋepaniwoi?
13Ŋa patunisanen gab ŋibisap
Ujanzen neanoi ŋawogoi.
14Azu malik Ujanzen ŋepailak me
inan tamolpain daŋan noadinnen niŋon ŋenaup itasawoi.
15Gungaz dimatmap Ujanzen iloŋge,
Inag e ibolime.
16O Ujazen, Ŋa oina begabeg;
ŋa oina begabeg, oina painbegabeg inan ai.
O inag sebanek inan mol pasi panaglak.
17Ŋa pez paneknen ja ŋenaup ŋepanowoi,
Ujanzen nean ŋewagiwoi.
18Azu malik Ujanzen ŋepailak me tamolpain daŋan
noadinnen niŋon ŋenaup itasawoi.
19Ujanzen inan ab gun inan damonlon,
o ilonnen, O Jerusalem.
Ujanzenoi kalel abi!
Currently Selected:
Israel Kan 116: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
