Israel Kan 109
109
Kanamkamaŋ inan. Dawid inan kanam ta.
1To so ubol mon, inag kalel inan Anut!
2Auadin salan sewozaik mai didiŋiagge desepani,
beladin sekauklon ŋawoi uf denaudime.
3Mugunek azulon ŋa dililitag,
tinignen ja teag dufunagoi denaudime.
4Inag ilogpanek naon i tinig desaedime,
ŋa iwoi ŋogodoanimeg saen melon.
5Megin kagin gauai naon donoag alan,
ilogpanek naon i dumugunag.
6Tamol salan ta naup ilap idaŋewoi;
tamol ta kortlon inan aupasekoi iboloi.
7Debetenaemap i jadaŋan itasaŋan;
igodtap auipas e uboloi!
8Inan nal taitai monpes;
tata inan abaŋ wozaiwoi!
9Inan nanun temadin teapes,
inan iwon painboboi!
10Inan nanun kekazeŋ ditozse ditozlap
ab samoi i demadodime melonpa kuduap dilapes!
11Fun i abaŋ ti panilak me abaŋ daŋan wozaipeges;
panubaswain inan uzat naon deŋalepes!
12Tata izinnen lo so iduŋan,
inan nanun temadin tealak iwoi tata teŋaen so alanoi!
13Inan begazangaz gusutap teaboi;
daz uzek azuplon inan nean bedazepes!
14Tamangaz nadin nauknauk me Ujanzen naonnen ilon isouwoi,
tinan inan aupasek me so suasoi!
15I gaid Ujanzen naonnen itasap ienoi;
tanlak iwoi faun ladin so isouwoi!
16I lo iwawoi so ilon isoulakoi,
tea, waiz alangaz mai iŋal uz,
bubudin itautlak me mai, mateŋlon mon geg.
17I meselanek azu iboloi imat, mewoi meselaneknen azu i fonlak iduwoi!
i kibineknen azu imoi, mewoi azu menen laŋaip so nasiwoi!
18Meselanek azu me kot egin nulelak,
mewoi azu me naz egin tininlon idulawoi,
gazeŋ egin dog ilonnen!
19I me jamel i pilaime eginpes,
metagiz egin i nal daŋan bubutiime me!
20Naon ŋan e Ujanzen inag uftamol pinidinpes,
i me ŋawoi azu salan dufunagnenoi dibol!
21Ge o, O Anut, inag Ujanzen,
oina neawoi ŋawoi unaupe;
oina ilopanek segatekdaŋan gauailakoi, tetazag ŋiliag!
22Ŋa waiz alan mai,
bubeg saeg ŋemadoŋame.
23Ŋa juza inan jauŋ egin ŋauge ŋale
ŋa sis egin tutag ŋadu.
24Udeklon dagug bodo ibol;
tinig gezaŋailak.
25Ŋainag uftamol i ŋawoi dizag dewaidime;
i denasagmap i getadin dugudugudedime.
26O Ujazen, ŋainag Anut, dinagpe!
oina ilopanek segatekdaŋan sinan patug pasipe!
27Me oina nima me boboloanip diloŋpe;
O Ujazen, o me unaulak ŋan me!
28I meselanek azu diboloi, ge o kibinek azu ubolpe!
inag wagaitamol mamai deŋaleŋan; oina begabeg me jaun isawoi.
29Ŋainag uftamol biŋadin teanen jamel egin dipilawoi;
sebadin nadin mamai jamel melaen egin me tabubŋan!
30Auaglon ŋa Ujanzen pez zen ŋepaniwoi;
ŋa tamolai malanzen ilonnen kalel ŋabip ŋepaniwoi.
31I tamol alan niman waŋlon itiuzime,
i me, i imatoi diboldime, iwoi i patun pasiwoi.
Currently Selected:
Israel Kan 109: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
