Israel Kan 104
104
1O ŋainag nitug, Ujanzen kibine!
Ujanzen ŋainag Anut, o ujazen mok!
O biŋa sutannen kubel mai nuleg madoume,
2o lelamanlon jamel eginlon tini tabubge madoume,
o me did tazas egin loanig ienime,
3o me oina galuŋ nadin bag nazlak unaulak,
o me timtaen ŋaleg oina bobo egin unauume
o me tim baninlak matalmeg utozume,
4o me tim oina totol unaulak,
jananin jabalen mai me oina dinek.
5O tan inan fodlak unaulak,
meginge i gaid so telelauwoi.
6O betabetlon jamellon egin segemanilak;
naz me did dezemanig ien.
7Oina bebaneklon i diau;
oina wail inan liŋanlon sinan i bezazou diau.
8Did disag tan bini idulak me idug ileg
aben o iwoi ubollak melon.
9O geg unau, me i so nenaziwoi,
i faun tan daŋan so toanawoilakoi.
10O unaug naz bubuaik tan bini idulaklon dububuai,
i did liluŋlon didug diladime.
11I gazaŋ inan dazuk daŋan naz pinidin,
doŋki duguze nazoi dimatge dimili.
12Zidinnen did paen inan ma melak demadodime;
i zaeŋ ilonnen dug diabidime.
13Oina madoknen latnenge o did wizez paniume;
tan me oina uzat inan niŋonoi gauai e ibol.
14O unaug kebasik bulmakauoi isag,
biab tamol ipaenen mai,
meginpe i tanlonge anaŋ inaup itasaime,
15greip tamol tinidin judin ŋalenen mai,
gazeŋ me naon leleinen,
sepalaŋ tamol buben stemaninen.
16Ujanzen inan ja me wizez iduse,
Lebanon inan wamei i ipaelak me.
17I‐lon ma nadin uz denaudime;
stork inan ab ja jarlon inauime.
18Did ujan me gout duguze nadin;
pat me hota inan seafuk.
19O fatu bulekoi fulei bagoz penamalak;
ad i saen idulanenoi iloŋ.
20O mafuz unaug tidom idu,
saen melon gazaŋ inan dazuk daŋan dikiziakge ditasadime.
21Laion faun nadin anaŋoi dibob,
Anutlon anaŋ deŋalewoi delaŋai.
22Ad itasemap i diau,
nadin gogoŋlon diduladime.
23Tamol i umlon ilaime idup
uzatlon ilaime juzamap eginmap.
24O Ujazen, oina nauknauk me kubel kuzum mai!
ilo kaginkaginlon o daŋan unaulak;
oina dazuk abaŋ tan fuam.
25Mas ujan bebaŋan mai ua,
abaŋ kuzum sutek tea melon debelamai,
abaŋ bas mitin ujan mai.
26Wag melak ditozdime,
lewiatan mai me o unaulak i melon baŋai denauwoi denauwoi.
27E me daŋan o didiŋio,
o nadin saenlonpa anaŋ pinidinoi.
28O i pinidinmap i denanedime;
o oina nima fuemap i abaŋ gauailon loadin didi.
29O oina nao miŋianitap i dedeladal;
o inadin jaeŋ wizidinmap i dimatpa tenatanlon dibuldime.
30O oina Uz unaup idumap i bas demadodime;
tan inan tinin faun unau mugume.
31Ujanzen inan kubel sansanpe ienoi,
Ujanzen i inan nauknauklon zigewoi.
32I me tan lalep i telelauime,
i me did titimap jakas itasaime!
33Ŋa ŋemademap geglonpe Ujanzen kanam ŋabip ŋepaniwoi;
ŋa bas ŋemademap ŋa Anutoi kalel ŋabiwoi.
34Inag kankan me gamun funipes,
ŋa Ujanzenlon zigiagŋame.
35Aupasekwain tanlak toŋolpa teaboi,
salanbibiangaz meladin teaboi!
O ŋainag nitug, Ujanzen kibine!
Ujanzenoi kalel wabi.
Currently Selected:
Israel Kan 104: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
