Israel Kan 10
10
1O Ujazen, dodinge o ibennen makaiu madoume?
Dodinge saen salasalalon kukumume?
2Salanbibian i digasge gik dibolge waizgaz diŋal duzdime;
i me maŋau desepalelak me sebadin ijaboi.
3Salanbibian i inan buben imaisime melon auan fezafuzime,
tamol me dadeŋlon abaŋ subuŋan ŋalewoi jaeŋ
sufutanaime, i Ujanzen meselanig bitiime.
4Inan naon igasge salanbibian i Anut so bezaniime;
Inan kankan daŋan megin: Anut ta tea.
5Inan uzat sansan niŋon inauime;
oina betenaek me latnenlak i dab so paniime;
inan daŋek daŋanoi Tsok ibolime.
6Bubenlon ibol, Ŋa saziznen tea;
daz uzek daŋanlon ŋa abaŋ alan so ŋenasiwoi.
7Meselanek azu, sekauk, modoanek azu mai inan auan fuam;
inan balen paenlon kagin salan, zegaik azu mai ienime.
8I panupanulon ab gezaŋenlon matalime;
kukumlon tinidinnen tealak me ifuime.
Malan laŋaimeg mitingaz dab pinidinime,
9i laion seafuimelak egin seafug madoime;
i tamol waiz ŋalewoi fenafunime,
i tamol waiz aten isaep inan kakaŋlon idulap jabiime.
10Mitinwain puzotoanip ileip,
wagai tiwonlon ibal iduime.
11Bubenlon kankange ibol, Anut ilon padallak,
i inan naon miŋianilak, i gaid so nasiwoi.
12Ujazen, umaispa; O Anut, nima bisape;
alangaz so ilo padal mon.
13Dodinge salanbibian Anut ipaiime,
bubenlon ibol, O menen naonoi so uboloi?
14O nasiume, au, abaŋ alan ilon alannen mai dab paniume,
meginge o menenoi umaisnen uloŋ;
mitinwain siben o nimalon inauime;
o temadin tealakgaz nadin dinek.
15Salanbibian salantamol mai nimadin pisini;
inan salannaukoi laŋaip daŋan nasimap eginmap.
16Ujanzen i sansanpe kiŋ madoime,
inan tanlon panupanu depadal dilawoi.
17O Ujazen, ibin didulak nadin gadiŋ o dab paniwoi;
nadin bubudin o stemaniwoi, tiliŋa diŋiap pinidinoi.
18Temadin tealak modoanalak me mai nadin azu o betenaep tidukoi,
meginpe tamol i tanwain mon me faun wagai so inaup itozoi.
Currently Selected:
Israel Kan 10: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
