Markus 4
4
Fabuloi Jesus azu faŋan ibol
1Jesus faun te imaisge wililuk izinnen azu fun ipeteŋanaime. Tamolai malan ujan i izinnen detemanig i mas aten waglak matal. Tamolai malanzen i laŋten demade. 2Jesus i abaŋ kuzum azu faŋanlon ipeteŋana. I inan peteŋaneklon ipidin. 3Dab anau! Fabul sezanektamol ta fabul sezanewoi ile. 4Sezanemeg aenta dal aenlon dibal didu, ma diseg me dunua depasi. 5Aenta tan patdaŋanlak dibal didu, me tan gauz tea, buntaimon isalak, i tan tig tealakoi. 6Ad itaseg i me nunuti i dabin tealakoi imakaz. 7Aenta faiag ilonnen dibal didu, ge faiag disag dostoana, mewoi noŋodin tea. 8Aenta tan gauailak dibal didu, me disag noŋodin denaug kuzum, ta tirtipa, ta sikstipa, ta hundertpa. 9I ibol, Ta i iloŋnen tiliŋandaŋantap i me iloŋoi.
10I siben mon mademeg i me i izinnen twelf maig demadodime i azu faŋanoi sodoz depani. 11I ipidin, Aŋ Anut inan kiŋdom fun toanilak me aloŋoi panaŋlak, ge me i muzinnen demadodime i abaŋ daŋan azu faŋanlon mon diloŋoi.#Kor I 5:12 12Meginpe me denasimap i denasiwoi, ge so diloŋoi, tiliŋadinlon diloŋmap i diloŋoi, ge ladinlon dab so depaniwoi, so tulufunap didaŋsap aupasek pasinen so deŋalewoilakoi.#Jes 6:9, 10; Apos 28:26
13I ipidin, Aŋ azu faŋan e so aloŋ? Meginmap azu faŋan aenta daŋan dodin aloŋoi? 14Fabul sezanektamol i azu sezaneime. 15I me dal izinnen melak azu sezanelak, i azu diloŋmap buntaimon Satan isop azu bubudinlon me pasi ŋaleime. 16Tan patdaŋanlak melon sezanelak i megin mon. I azu diloŋmap i pasak zigiap deŋaledime. 17Ge i sebadinlon dubudin tea, tea, kin mon segata, ge azuoi modoanek ŋalek uzek tat itasemap i pasak Anut miz depanidime. 18Aenta faiag ilonnen sezanelak i azu diloŋ, 19ge tan e inan jaeŋ funek, filian inan sewozaik, abaŋ aentawoi bubudin imaisnen me azu dopozotoanip niŋon so inauime.#Mar 10:23, 24 20Ge me i tan gauailon sezanelak i azu diloŋ deŋale maidime, i noŋodin denaup aenta tirtipa, aenta sikstipa, aenta hundertpa.
Jesus inan meglaum dodin ditozoi?
21Jesus ipidin, Lamp me kunup paenlon denauwoi denaleg disodime, tea, kapal paenlon tat, lamp inan madudlak so seŋaniwoi?#Mat 5:15 22Abaŋ ta se kukumlon iennen tea, daŋan beŋten itasanen mon, ta se toanip iennen tea, daŋan lelamanlon idunen mon.#Mat 10:26; Luk 12:2 23Tata i azu iloŋnen tiliŋandaŋantap i me iloŋoi. 24I ipidin, Azu aloŋame me dab apani, aŋ atenaeame megin tenaep panaŋoi, subuŋan mai panaŋoi.#Mat 7:2 25Ta i abaŋdaŋan i ta mai panip iŋalewoi, ge ta i tealak inan abaŋ ta ientap me mai wozaiwoi.#Mat 13:12
Fabul siben isanenoi
26Jesus ibol, Anut inan kiŋdom me megin.#Jak 5:7 27Tamol ta fabulpatun tanlak sezanemap ilap tidom ad mai imaispa itozoi, ge fabul nabun isap ujanime me dab so pani. 28Tan siben niŋon ikibineime, malan nabun isaime, uzip lelapen bonog itasaime, me uzip niŋon bonog itasaime. 29Ge niŋon melaunmap i buntaimon badiz gauai iŋalep gusutiwoi, melaunsaen mug idulakoi.#Joel 4:13
Mustardoi Jesus azu faŋan ibol
30Jesus ibol, Anut inan kiŋdom abaŋte kilian e taboloi, aitlon iwoi faŋanlon taboloi? 31Me i mustard patun egin, me tanlon paemap patun aenta daŋan i egin mitin tea. 32Ge me tanlon paemap isaime, i sagau aenta daŋan nenazaime, zaen ujan inauime, meginpe ma did paenlon inan jauŋlon dematalnen diloŋ.#Dan 4:9, 18; Hesek 17:23
33Azu faŋan kuzum eginlon i azu pidin, i me diloŋnen iduselak melon. 34Azu faŋan tealon i azu ta so ipidin, ge inan ablon meglaum sebadin azu daŋan iflale pinidin.
Jesus mas salan ipaig to ibol
35Nal e juzalon Jesus ipidin, Dil akilon tejauawoi. 36I tamolpain dibinge i megin Jesus se niŋon mon deŋaleg dile. Wag aenta i maig dile. 37Tim fazek ujan imaisge kizikoz pisinig wag ilonnen idu, wag mug loloaniwoi inauime.#Jona 1:3 38Jesus wag wadanlon lamelak idozime. I dufuŋunig depai, Peteŋanek, id tepadaltame o kin so ubolume? 39Jesus imaisge tim bebanig mas mai ipai, Butunop to ubol! Tim to ibolge manin salei ibol.#Kan 89:10; 107:23–32 40Jesus ipidin, Aitoige azezame? Aŋ lamilon so malik? 41I gauz dizutge nug dikibiaig dibol, Ne, i me it? Tim mas mai dagom depanidime.
Currently Selected:
Markus 4: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
