Markus 3
3
Tamol niman miliaudaŋan Jesus uboulon kibine
1Jesus faun te ubouablon idule. Men tamol ta niman miliaulak. 2I defenafunge Jesus i uboulon kibinewoi tat, meginpe i depeneŋaniwoi. 3I tamol niman miliaulak me ipai, Umaispa zimanen uso. 4I ipidin, Uboulon abaŋ gauai tenaunen me kagin tat, tea, pitiŋineknen me tat, tamolai tataz taŋalnen, tea, tafup dimatnen me tat? Ge i to dibol. 5I buzundaŋan liliadinmeg i bubudin gegaunlakoi i teŋaen alan. I tamol me ipai, Oina nima wote I woteg mug kibine gauai.#Joh 11:33 6Farisea buntaimon didug Herodes inan ai mai dikibiai, dodin i dufuniwoi.#Mat 22:16
Tamolpain kuzum Jesus izinnen dise
7Jesus inan meglaum mai wililuk izinnen desazizge dimul, tamolpain malan ujanujan Galileanenge duzig ditoz. Judeanenge mai, 8Jerusalemnenge, Idumeanenge, Jordan aen akilon, Tirus Sidon zidinnen maig malan ujan me daŋan, abaŋ i inauime me diloŋge, izinnen dise.#Mat 4:25; 15:22 9I inan meglaum pidin, i iwoi wag ta kibinep ienoi, tamolpain malan ujanzen i dipiniwoilakoi. 10I kuzum kibinialakoi daŋan me maiai salan ifuime me dititiwoi dipini. 11Uzgataf i denasitag i i naonnen dibal didug dibobge dibol, O Anut inan ai!#Luk 4:41 12Ge i piziana gegaun, i me beŋten so diboloi.#Mar 1:34
Jesus meglaum twelf piliana
13Jesus i didlak iduse. I siben ilon ibollak me i wigidin. I izinnen dile. 14Jesus i twelf ipiliana, me i maip demadowoi, i me totol inaupa azu diboloi. 15I buga sladin kuduanen tiwondaŋan ditozoi: 16Simon i nean Petrus ipani,#Joh 1:42 17Jakobus, Sebedeus inan ai, Johanes, Jakobus inan tain mai, me i Boanerges, wail ai, iblana.#Luk 9:54 18Andreas, Filipus, Bartolomeus, Mateus, Tomas, Jakobus, Alfaeus inan ai, Tadaeus, Simon Kananaioswain, 19Judas Iskariot mai me Jesus iblanilak.
Jesus Beelsebub buga sladin kuduaime dibol
20Meginge Jesus inannen ile. Tamolpain malan ujan faun mug detemanilag i anaŋ dianinen kin so diloŋ. 21Inangaz me diloŋge i diabiwoi beŋten didu, I dibol, I gedagad funilak.#Joh 7:20; 8:48, 52; 10:20 22Gazekmaŋau Jerusalemnenge diselak me dibol, Jesus i Beelsebubdaŋan, buga sladin getadin sinan buga kuduaime. 23I wigidinge azu faŋanlon ipidin, Satan dodin Satan kuduiwoi? 24Kiŋ fatu tezepalep inan boi nug daŋedaŋemap fatu me stemanip iennen teaboi. 25Tamolai ab talon demadodime nug daŋedaŋemap ab me iennen teaboi. 26Satan imaispa siben tezepalep i mai nug daŋedaŋemap i inaunen tea, i gazop malan teaboi. 27Tata tamol gegaun inan ablak idusap inan abaŋ ponau iŋalnen so iloŋ. I malanmalan tamol gegaun ipaumap, meginpe malik i inan abaŋ wozainen iloŋ.
28Malik ŋa aŋ ŋepaiaŋ, tamolaigaz nadin aupasek daŋan pasip pinidinoi, Anutoi azu salan diboldime mai. 29Ge me i Auanuzgunoi azu salan ibolmap i inan aupasek so pasiwoi, tea, inan aupasek mewoi i dedeŋaneknen jadaŋanoi. 30I dibollakoi, Jesus i uzgatafdaŋan.#Mar 3:22
31Inan tinan, inan taingaz mai diseg beŋten ditiuzmeg i totol denaug izinnen ileg dewagi. 32Tamolpain malan ujan i dililitig dematalmeg i depai, Nasi, oina tina taigaz liugaz mai beŋten debezanodime. 33I auadin jabig ibol, Ŋainag nen, taiggaz mai it? 34Dililitig demataldime me liliadinmeg ibol, Ŋainag nen taiggaz mai ie. 35Tata i Anut inan auan uzi paniime, i inag taig, inag liug inag nen mai.
Currently Selected:
Markus 3: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
