Mateus 9
9
Jesus tamol ta bebazum funig ikibine
1Waglak iduseg i daiag inan panulon ise.#Mat 4:13 2Nasi, i tamol ta bebazumlak kapal fonlak ienmeg i izinnen deŋaleg dise. Jesus nadin ladinlon maliknen inasig i ai bebazumlak me ipai, Nanugai, ilo gauaipa mado, oina aupasek ŋepasi ŋepano. 3Ge nasi, gazekmaŋau taitai ladinlon dibol, I azu salan ibolime.#Mar 2:7 4Me Jesus nadin kankan iloŋge ibol, Aitoi abaŋ salanoi lamilon kankaname?#Mat 12:25; Joh 2:25; Luk 9:47 5Abaŋte me pasak? Ŋa ŋabolmap, Oina aupasek pasi ŋepano, tea, Umaispa utozoi? 6Ge Tamolai i tanlak aupasek pasinen tiwondaŋan me aloŋoi, i bebazumlak me ipai, Umaispa, oina kapal joazep oinanen ula.#Joh 5:8; 17:2 7I imaisge inannen ile. 8Tamolpain malan ujanujan me denasig i dizut, Anut biŋan dibise, me i megin tinin kibineknenoi tamol tiwon pinidinlak.
Jesus Mateus iwagi, aupasekbibian mai anaŋ diani
9Jesus menge ilemeg i tamol ta täks ŋalek ablon matalmeg nasi, i nean Mateus. I ipai, Ŋa uzagpa utoz. I imaisge i uzig itoz. 10I anaŋ janekoi ablon matalmeg, nasi, selna aupasekgaz mai dise, i Jesus inan meglaum maig dematal. 11Fariseagaz me denasig i inan meglaum dipidin, Aitoi nami peteŋanek selna aupasekgaz mai anaŋ dianidime?#Luk 15:2 12Ge i me iloŋge ibol, I tinidin zagun gauaidaŋan i kibinekkamaŋoi so dibol, tea, i maiai ifulak me mon. 13Ge aŋ alap azu me fun abezani: Ŋa ilonpanekoi ŋukumeŋame, janaukoi tea; ŋa me i taozlak ŋiwigidinoi so ŋase, tea, aupasekai.#Hosea 6:6; Sam I 15:22; Mat 18:11
Inan meglaum dudig so demadodime
14Meginge Johanes inan meglaum i izinnen diseg dibol, Aitoige am farisea mai udiame, ge oina meglaum so dudidime?#Luk 18:12 15Jesus ipidin, Aifazeŋ inan dinekgaz aifazeŋ maip depeleŋanimap ladin alanoi tat? Ge nal iduwoi melon aifazeŋ zidinnen wozaiwoi, meginpe i dudiwoi.#Joh 3:29 16Ta i jamel boi faun nazlon so leleŋanilak jamel samoilak so iwaeime jamel migilan kululumunimap inan tetazek getnen me nenazip ujanoi,#Joh 1:17 17Wain faun mai i siliŋon samoilon so ditigilidime, ge me inautap siliŋon tezepalep pitiŋinip wain mai bedaniwoi. Tea, i wain faun siliŋon faunlon ditigilidime, Meginpe auzun se gauai dien.
Jesus gaten ta inan nanunpain ifuŋuni
18Abaŋ e pidinmeg, nasi, gaten ta izinnen iseg ibal idug ibol, Ŋainag nanugpain gazo imat pasi, ge usop oina nima fonlak unaup i basoi. 19Jesus imaisge inan meglaum mai duzig dile. 20Ge nasi, pain ta, i umaz twelf tininlon daz idu, i muzinnen iseg inan jamel didin jabi. 21I ilon ibol, Ŋa inan jamel mon ŋititimap ŋa kibiniagoi.#Mat 14:36 22Ge Jesus idaŋseg i inasig ibol, Nanugpain ilo gauaipa, oina ilolon maliknen kibiniolak. Pain i saen me moklon kibineg made. 23Ge Jesus gaten inan ablak iduseg i dum diwimeg tamolpain malan ujan me mai tiŋia diabimeg ilge, 24i ibol, Ala, aipain so imat pasi, tea, ienime. Ge i dizan dewai depani.#Joh 11:11; 14:25 25Tamolpain malandaŋan sulusulag didug Jesus ilonnen idule, niman jabig aipain imais.#Mat 8:15 26Abaŋ ewoi biŋ fatu daŋanlon bebaŋeg ile.
Ai azugen meladin itau ikibine
27Jesus menge ilemeg ai azugen meladin itaulak i duzig dibobge dibol, Dawid ai, ilo am penamape. 28I ablak iduseg ai meladin itau me izinnen diseg Jesus ipidin, Ŋa me ŋenaunen ŋaloŋ me lamilon malikime? I depai, Au, Ujazen. 29Meginge i meladin ititimeg ibol, Aŋ lamilon maliklak egin noaŋoi.#Mat 8:13 30Nadin meladin fuelak. Jesus ibol, Dab anau, ta so iloŋoi.#Mat 8:4 31Ge i dileg azu me fatu daŋanlon desezane.
Jesus buga salan ta ikudui
32I dimaisge dilemeg, nasi, i ta buga salandaŋan auan itau me izinnen deŋaleg dise. 33Buga salan ikudualag auan itaulak azu ibol. Tamolpain malandaŋan dizutge dibol, Get Israellon megin ta so idulak.#Mat 15:31; Luk 7:16 34Ge farisea dibol, Buga salan gatenlon i buga kuduaime.#Mat 12:24
Jesus Tamolpain ilon pinidin
35Jesus panu ujan daŋanlon, panu kitek daŋanlon mai itozge nadin ubouablon azu flaleg peteŋana, kaginoi totol gamun ipidin, maiai funfun sub funfun mai ikibinia.#Mat 4:23; 10:1 36Ge i tamolpain malan ujan ilge iwoi teŋaen alan, i tiziŋinag meladin kadumge, belelek tizinek tealak eginlakoi.#Mat 14:14; Mar 6:34; Hesek 34:5 37Meginge i inan meglaum pidin, Um inan niŋon me kuzum ge uzatai me taitai mon.#Luk 10:2 38Mewoi um inan niŋon inan gaten godoanip i uzatai inan um inan niŋon ŋaleklon inaup dilawoi.
Currently Selected:
Mateus 9: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
