Mateus 4
4
Satan Jesus kibiani
1Meginge Auanuzgun Jesus fatu udaulon iduzi, Satan i kibianiwoi. #Heb 4:15; Ekso 34:28 2I nal 40 tidom 40 udig mademeg alouge pitol ifuni. #Kiŋ I 19:8; Gen 3:1–7 3Atensaek izinnen iseg ipai, O Anut inan aitap pat e paip sepalaŋ inauwoi. 4Ge i auan jabig ibol, Megin gazelak, Tamol sepalaŋlon mon bas so madowoi, tea, azu Anut auanlonge itasaime me daŋanlon. #Deut 8:3 5Meginge Satan iŋaleg panu gunlon ileg ubouab gun inan fiuŋ atenlak inaug#Mat 27:53 6ipai, O Anut inan aitap o sibe sisup udu, me gazelakoi, I inan eŋelgaz kibiai pinidinoi, i o nimadinlon dibisiowoi, oina nie pat ta so pututiwoi.#Kan 91:11, 12 7Jesus ipai, Faun te gazelak, O Ujanzen, oina Anut, so kibiani mon.#Deut 6:16 8Satan faun mug iduzig ileg did ta latnen moklak, tannen kiŋ fatu daŋan, nadin kubel mai ipeteŋanig 9ipai, Me daŋan o ŋepanowoi, o dagu sebenaip ŋa godoanagmap. 10Meginge Jesus ipai, Satan, umais ula! Me gazelakoi, O Ujanzen, oina Anut naonnen dagu sebenaip godoaniwoi, o i mon bian paluwoi.#Deut 6:13 11Meginge Satan ibini, nasi, eŋelgaz izinnen diseg i didinidime.#Joh 1:51; Heb 1:6, 14
Jesus imugse Galileanen imaisge meglaum taitai iwigidin
12Ge Jesus, i Johanes diabilak, iloŋge i Galileanen isazizge ile. 13Nasaret ibinig Kapernaumnen imade, me wililuk izinnen, Sebulun, Naftali nadin fatulon. 14Profet Jesaia ibollak niŋon inauwoi, i ibol, 15Sebulon fatu, Naftali fatu, wililuk dal gezaŋenlon, Jordan akilon, gobgaz nadin fatu Galileanen, 16tamolpain i mafuzlon dematallak lelaman ujan denasi, i me mateŋ aben inan jauŋlon mai dematal iwoi lelaman itaselak.
17Saen melonge Jesus fun inaug azu pidin ibol, Tulufunaŋpa adaŋsa, didnen kagin sizizlon iseg ienime.#Mat 3:2
18Galilea wililuk izinnen itozmeg i ai azug tain mauzun il, Simon me Petrus deblani, inan tain Andreas mai. I wililuklon kakaŋ detanidime, i ij ŋalektamol.#Joh 1:40 19I pidin, Ŋa uzagpa atoz, ŋa aŋ ŋonoaŋoi, aŋ ij aŋalame egin, megin tamolpain aŋaloi.#Mat 13:47; Hesek 47:10; Mat 19:27 20I gazo e nadin kakaŋ dibinge i dusunuzi. 21Menge ilemeg i ai azugen ta tain mauzun il. Jakobus, Sebedeus inan ai, inan tain Johanes mai. I temadin maig waglon kakaŋ deselanimeg demade. I wigidin. 22I buntaimon nadin wag temadin maig dibinge i dusunuzi.
Jesus Galilea fatulon azu ibol, maiaidaŋan me kibinia
23Jesus Galilea fatu daŋan itozse itozleg nadin ubouablon i azu peteŋana, totol gamun sigiani, tamolpain maiaidaŋan subdaŋan mai me daŋan kibinia.#Mar 1:39; Luk 4:15, 44; Apos 10:38 24Biŋ iwoi Siria fatu daŋanlon ile. I maiai ifulak me daŋan izinnen diŋalge dile, maiai izoznen ibenibendaŋan, buga salandaŋan, tinin tezaze ibol, bebazumlak me mai ikibinia.#Mar 6:55 25Tamolpain malan ujan Galileanen, Dekapolisnen, Jerusalemnen, Judeanen, Jordan aentanen me maig i duzig ditoz.#Mar 3:7, 8; Luk 6:17–19
Currently Selected:
Mateus 4: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
