Mateus 17
17
Jesus tinin buli
1Nal siks binig Jesus Petrus, Jakobus, inan tain Johanes mai iŋalge ibennen did ujan talak idauzi.#Pet II 1:16–18 2I malakmalak tinin bulig inan naon ad egin nunuti, inan jamel lelaman, sul ujan egin kebazan inau. 3Ge nasi, Moses Elias mai i zidinnen ditaseg Jesus maig dikibiai. 4Petrus Jesus ipai, Ujazen elak temadonen gauai, o uboltap ŋa tazas tolpa ŋasosoi, ta oina, ta Moses inan, ta Elias inan. 5I megin ibolmeg, nasi, timtaen sepetadek i stoana. Nasi, timtaen ilonnenge auan ta ibol idu, E me ŋainag Ai wazan gadon, i‐lon ŋa ilog gamun funi, inan auan dab apani.#Mat 3:17; 16:16, 17; Kan 2:7 6Meglaumgaz me diloŋge i noadin tan desaeg didug gauz dizez. 7Ge Jesus iseg ijabge ibol, Amais, so azez mon. 8I meladin dibiseg i ta so denasi, Jesus siben mon.
9I didlakge didumeg Jesus kibiai pinidin ibol, Abaŋ anasilak me ta so apai mon, Tamolai get mateŋlonpa imaismap eginmap.#Mat 16:20 10Inan meglaum desedazeg dibol, Aitoi gazekmaŋau diboldime, Elias imugpa isowoi?#Mat 11:14; Maleak 3:23 11I auadin jabig ibol, Elias isoime, i mai abaŋ daŋan sedagewoi. 12Ge ŋa aŋ ŋepaiaŋ, Elias mug iselak, ge i so diloŋ, tea, iwoi abaŋte tat denauwoi ladin ibolge me denaulak. Megin mon Tamolai mai i nimadinlon denau alanoi.#Mat 14:9, 10 13Me uzig meglaum diloŋ, i Flaneknen Johanesoi ipidinlak.#Luk 1:17
Ai buga salandaŋan Jesus ikibine
14I tamolpain malanzen zidinnen ditaseg tamol ta dagun sebenaig ibol, 15Ujazen, ŋainag ai ilo pani, i tinin tezaze ibolime, i gauz alan inaug madoimelakoi. Santa jalon, santa nazlon ibal iduime. 16Ŋa i oina meglaum zidinnen ŋuduzig, ge i dikibinenen so diloŋ. 17Jesus auan jabig ibol, O tamol daz wozou e ladinlon maliknen tea, kagin dopololoanidime. Saen pitep aŋ maip temadowoi? Saen pitep aŋoi auag kin itauwoi? Izignen uduzip aso.#Deut 32:5; Joh 14:9 18Jesus buga salan ibebanig ibinig ile, ai i buntaimon kibineg made.
19Meginge meglaum sebadin mon Jesus izinnen diseg dibol, Aitoige am i ukuduinen tea?#Mat 10:1 20I ipidin, Aŋ lamilon so maliklakoi. Malik ŋa aŋ ŋepaiaŋ, nami lamilon maliknen mustard patun eginmap aŋ did a apaitap, Elakpa melak ula, i ilawoi. Aŋ abaŋ ta anaunen tea menen ta so ienoi.#Mat 21:21; Luk 17:6 21Buga salan menen ta godoaneklon udek mailon mon tapas idunen iloy.
Jesus alan inaup madowoi
22I Galileanen ditozse ditozlemeg Jesus ipidin, Tamolai tamol nimadinlon denaunen mug siziz ipani.#Mat 16:21 23I dufunip imatoi, ge nal tollon imaisoi, I teŋeadin gauz alan.
KRISTUS KAPERNAUMNEN. MEGLAUM KAGIN PETEŊANA, 17:24—18:35
Jesus gaŋmalan tani
24I Kapernaumnen diseg täks inan gaten i Petrus izinnen ditaseg dibol, Nami peteŋanek täks inan gaŋmalan so taniime tat? 25I ibol, Tea, taniime. Petrus izinnen itaseg Jesus imugseg azu ipaig ibol, Simon, o ilo dodin, tannen kiŋgaz it zidinnen duti, tea, täks deŋaledime, nadin ai zidinnen tat, tea, nadin fatu inan panupanuwain zidinnen?#Ekso 30:13 26Panupanuwain zidinnen e ibolge, Jesus i ipai, Meginpe nanungaz täks inan gaŋmalan so detaniwoi. 27Ge id ladin bebazenen so tipinidinoi, mewoi wililuklon ulap aul tanip, ij imugse ŋalemap me auan fuep o gaŋmalan ta nasiwoi, me ŋalep ulap ŋawoi owoi mai pinidin.
Currently Selected:
Mateus 17: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
