Lukas 2
2
Maria Jesus inau
1Saen melon kaisar Augustus panu daŋan kibiai pinidin, ibol, Fatu daŋan tamolpain nadin neadin buklon degazewoi, nadin jes dusutanen dilawoi.#Apos 17:7 2Neadin gazenen me matu, Kirenius Siria fatu inan gowerner madelak, saen melon idu.#Apos 5:37 3Meginge tamolpain daŋan neadin gazekoi nadin fudin panulon diladime. 4Josef i Nasaretwain mai imais Galileanenge iseg Judeanen iduse, Dawid inan panulon ile, me nean Betlehem, i Dawid bagenlakoi. 5Inan iwon Maria, i aidaŋanlak, i maig gazewoi dile.#Luk 1:27 6Demademeg Maria inan nal pasi,#Mat 1:25 7i ai matu inau, siliŋonlon nule, ŋaleg ileg taweilon inaug ien. I aben aenta tealak.
8Fatu melon tizinektamol tidom umlon belelek ditizinameg demade. 9Ujanzen inan eŋel idu isemeg zidinnen ipaz, inan lelei lelamanime, tamol tiliana, i bubudin dizut. 10Eŋel pidin, Aŋ so azez mon, aloŋ, aŋ jumi isa, ŋa aŋ ziminen totoloi ŋase, totol gamun, gazop panu daŋan diloŋoi, 11aŋnami Putumipaseknen gazomnen Dawid panulon inaulak, i Kristus Ujanzen. 12Aŋ nanunai anasiwoi bagoz egin: siliŋonlon nuleg taweilon inaug ien. 13Buntaimon eŋel me izinnen didnen daup pifoldaŋan idu ise, kalel diabi, Anut inan biŋan dibise, dibol,#Dan 7:10 14Latnen Anut inan biŋan imais, tanlak mazoz idu, tamolpain iwoi i gamun funilak i leŋadinlon.#Luk 19:38; Jes 57:19
15Eŋel didlon dimulge dilemeg tizinektamol nug dikibiaimeg dibol, Asop, id Betlehemnen talawoi, abaŋ tenasiwoi, Anut id totol panadlak. 16Depalu mon dileg Maria, Josef, nanunai mai taweilon ienmeg 17denasilag, azu eŋel iwoi pidinlak me daŋan sai dipinidin.#Luk 2:10–12 18Tamolpain daŋan i tizinek nadin azu diloŋdime, dizut deladal demade. 19Ge Maria azu me daŋan ilon inaug dab pani, inan bubenlon du ibol.#Luk 2:51 20Tizinektamol abaŋ daŋan pidinlak diloŋ denasi mailak egin, megin i dimulge kalel diabi, Anut inan biŋan dibiseg kalel depani mai.
Jesus nean deblani. Tempellon Anut naonnen denau
21Nal eit pasi binilag i muluŋ nasiwoi dibol, inan nean mai deblani, Jesus dibol. Maria get so aidaŋan eginmeg eŋel mug i ipailak megin.#Luk 1:31, 59
22Maria inan tinin kibineknen nal mewoi Moses inan kibiaiŋbuklon gazelak, binig i Jesus tempellon Jerusalemnen deŋaleg dileg Ujanzen naonnen denau.#Lew 12:3 23Ujanzen inan kibiaiŋgazek uzig denau, me ibol: Nanunai matu me tinan inauime me Ujanzen inan gun.#Ekso 13:2 24Iwoi janauklon Ujanzen inan kibiaiŋ ibolime, me depaniwoi: Bun ujan azuazu, teatap bun faun azuazu.#Lew 12:8
Simeon Jesus nasi, muguzuŋ mai inau
25Uloŋ, Jerusalemnen tamol ta madelak, i nean Simeon, i taoz, Anut naonnen mai dagom itoz, i Israel inan ilon ŋalek malan inaug madelak, i Uzgundaŋan.#Jes 40:1; 49:13 26Auanuzgun azu ipailak ibol, i get so imatlak eginmap i Ujanzen inan Kristus nasiwoi. 27Uz me seseŋanig tempellon idu. Mademeg Maria Josef mai nanunai Jesus deŋaleg diseg tempellon ditase, azu kibiaiŋ ibollak, megin denauwoi dibolge dise. 28Simeon Jesus nimanlon ŋaleg jabi, Anut kalel panimeg ibol, 29Ujazen, o mug oina dagom ŋalep mazozlon ilawoi, o get ubollak egin,#Gen 46:30 30nainag malag mug oina patunpaseknen nasilak, 31me o tamolai daŋan noadinnen unaug iselak: 32i sul me gobgaz lelaman inauwoi, me Israel, oina tamolpainbadim, inan biŋan kubel.#Jes 42:6; 49:6 33Inan tinan taman mai, azu daŋan iwoi ibollak, diloŋge dizut deladal. 34Simeon baz pindinmeg inan tinan Maria ipai, Uloŋ, i mewoi inaulak, i‐lon Israel tamolpain daŋan pizibitip pizibitip ditozoi, aenta depadaloi, aenta tataz iŋalpa demadowoi, i mai bagoz tamolpain i inan auan detalewoi.#Jes 8:14; Mat 21:42; Kor I 1:23 35Oina bube badizlon desaelak egin izoznen gauz uloŋoi. Meginmap tamolpain kuzum nadin ladin boboloanawoi.
Profetpain Hana Jesus nasi
36Profetpain madelak i nean Hana, Fanuel inan nanunpain, i Aser bagen, i mug dinou mok, i umaz sewen mon inan iwon maig ditozlak. 37I mug umaz 84 bob made, i tempel so mok ibinilak, ad mai bo mai udimeg godoanimeg mon made.#Tim I 5:5 38I mai gazo ipaz iseg Anut kalel pani, me i Jerusalem inan paseknenoi malan denaug demadelak, iwoi azu pidin.#Jes 52:9; Luk 24:21
Josefgaz Nasaretnen dimul
39I abaŋ daŋan me Ujanzen inan kibiaiŋlon gazeg ienime me dab depani dibinilag, Galileanen dimulge inadin panu Nasaretlon dileg demade. 40Nanunai tinin itub, inan nitun du ibol, ilonlon kaginkagindaŋan, Anut inan kanim i stoaniime.#Luk 1:80; 2:52
Jesus umaz twelf itozlag i maig tempellon dile
41Jesus inan tinantaman sansan umaz geglon Pasanaloi Jerusalemnen diladimelak.#Ekso 23:14–17 42Jesus umaz twelf itozlag i maig megin mon Jerusalemnen dile. 43Pasanal dibinilag i nadinnen dimulge dile. Jesus i siben mon Jerusalemnen made, inan tinantaman me so diloŋ.#Ekso 12:18 44I dibol, tizangaz, temalengaz maig tat get dile, mewoi dallak ad taimon iwoi dedalel. 45Lo tealag dimulge Jerusalemnen dileg debezani. 46Nal tolgen debezanilag, alou mok ubouablon diduleg denasi; i gazekmaŋau liluŋlon maig dematal, azu iloŋmeg i maig sidizia. 47Daŋan inan auan dab depanig inan kaginkaginoi dizut. 48Inan tinantaman melak denasimeg dizut. Tinan ipai, Nanugai, o dodinlakoi megin unau? Uloŋume, oina tama ŋa mai bubuma izozmeg o gauz abezano lo tea. 49Jesus auan jabig ibol, Aitoige aŋ ŋa abezanagoi abollak? Aŋ so aloŋ, ŋa ŋainag Mam inannen ŋemado mokoi?#Joh 2:16; Kan 26:8; 27:1; Luk 2:19 50Inan tinantaman azu me so diloŋ. 51I i maig dile, Nasaretnen ditaseg i dagom pinidin, inan tinan azu e daŋan inan bubenlon inaug du ibol. 52Jesus itub, maŋau iloŋ tezepasi ŋaleg itoz; Anut naonnen, tamolpain noadinnen mai ai gamun inau.#Sam I 2:26; Met 3:4
Currently Selected:
Lukas 2: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
