Lukas 1
1
Gaten
1Tamol kuzum bo get abaŋ daŋan me id leŋadlon niŋon inaulak me sai degaze.#Apos 1:1; 13:26 2Me i abaŋ daŋan funlon meladinlon denasilak, tiliŋadin dab depanilak, i azu me inan totol ditoz mailak dibolge diloŋlak egin. 3Meginge ŋa nean ŋenaulak, abaŋ e inan fun daŋan kabe mok sodoz ŋenaup ŋatozpa ŋaloŋoi me owoi, Teofilus waza, daŋan zazep sedagep ŋegazep ŋepanowoi. 4O mai malik dab paniwoi, o get auadinlon uloŋlak me inan fun mai uloŋoi.
SAI FUN, 1:5–2
Eŋel Gabriel Sakarias izinnen totoloi ile
5Herodes Judea fatulon kiŋ mademeg, saen melon Abias inan wozoulon waliŋ ta made, i nean Sakarias, inan iwon Elisabet mai, Aron inan nanunpain ta.#Sai I 24:10 6I auzun Anut naonnen tali, inan kibiaiŋ mai azu mai duzi depanig dagom ditozdime. 7I wagam dinou denaug ai teag, Elisabet inig itozimelak, mewoi.#Gen 18:11 8Santa Sakarias inan wozou inan zazeklon Anut naonnen waliŋ uzat inauime. 9Waliŋ kaginlon i dititi dititi denaumeg, Sakarias Ujanzen inan tempellon ja inauwoi dibol.#Ekso 30:7 10I ja inauwoi mademeg saen me tamolpain pifoldaŋan beŋten dogodoanimeg demade. 11Ujanzen inan eŋel i naonnen itaseg, i wiwa niman waŋlon itiuzmeg made. 12Sakarias i nasig deladalge izutmeg made. 13Ge eŋel i ipai, Sakarias, o so uzut mon, oina gadiŋ Anut mug iloŋ, oina iwo Elisabet ai inaup panowoi, i nean Johanes blaniwoi. 14O iwoi zigiowoi, jau isa maiwoi, itasemap tamolpain kuzumpanu iwoi mai zigiawoi. 15Ujanzen naonnen i ujan madowoi, aiu, naz aenta mai, mewoi gedagad ifuime me i so miliwoi; tinan teŋaenlon i mug Auanuzgundaŋanoi.#Num 6:3; Bet 13:4, 5; Sam I 1:11 16Israel nanunai kuzum i tininlon didaŋsawoi, Ujanzen nadin Anut i daŋe depaniwoi. 17I Elias inan uz mai tiwon mailon Ujanzen naon iŋalpa itozoi; inan auanlon tamangaz nunudingaz egin didaŋsawoi, aupasekai i tamol taoz nadin kagin maliklon bubuadin tidukdaŋan ditozoi, i tamolpain kibinep Ujanzen paniwoilakoi.#Mat 17:11–13; Mar 3:1; 4:5, 6 18Sakarias eŋel ipai, Ŋa aitlon ŋaloŋoi? Nasi, ŋa mug waŋawaŋdaŋan, inag iwog megin mon mug umaz kuzum itozlak.#Gen 18:11 19Eŋel auanlon pasi ŋale ibol, Ŋa Gabriel, ŋa Anut naonnen ŋitiuzŋamelak, ŋa Anut totol noaglak, azu o ŋepaowoi, totol gamun me ŋeŋalep ŋepanowoi ŋase.#Dan 8:16; 9:21; Heb 1:14 20Nasi, o inag auag me inan saenlon niŋon inauime me gazomnen ilolon so maliklakoi, mewoi o aua itaupa, azu ubolnen teap medowoi. Abaŋ e nal talon niŋon inauwoi eginmap oina aua faun po iboloi. Melon o uloŋoi, inag auag malik ibollak.
21Tamolpain Sakariasoi malan denaug demademeg dizut deladalge demade, i saen melaen tempellon madelak, mewoi. 22Alouge i beŋten idumeg i tamolpain azu pidinnen so iloŋ. Melon i diloŋ, i tempellon malan nitun jazelak. I nimanlon mon tabei ipinidin, auan itau mon made. 23Inan waliŋ uzat saen tempellon binilag, inannen imulge ile.
24Nal alounen ta inan iwon Elisabet iadaŋan itoz. I fulei faif kukumge made, ibol, 25Ujanzen tamolpain ilonnen ŋainag meselanek pasilak, i inag nal dinoulon megin noaglak, mewoi.#Gen 30:23
Eŋel Gabriel Maria izinnen totoloi ile
26Fulei siks pasi binilag Anut eŋel Gabriel faun mug totol pani, Galileanen panu ta nean Nasaret ien, 27men bazas ta izinnen totoloi inaug ile. Bazas me i tamol ta mai nug difezlak, i nean Josef, i Dawid tibun, bazas i nean Maria.#Luk 2:5; Mat 1:16, 18 28Eŋel Maria izinnen ablak iduseg ibol, Pez ŋepano, Anut gamun nuolak, Ujanzen o mailak.#Bet 5:24 29Maria eŋel nasig, azu maig iloŋge, izut ilon gazemeg ibol, Azu dodin mok! 30Eŋel i ipai, O so uzut mon, Maria, Anut kanim ŋale o panolak. 31Uloŋume, gazop o aidaŋanoi, ai unauwoi, i nean Jesus blaniwoi.#Bet 13:3; Jes 7:14; Mat 1:21–23 32I tamol ujan siben, i Ujanzen mok inan Ai depaiwoi. Ujanzen Anut i inan tibun Dawid inan pezatiu inaup paniwoi.#Jes 9:7; Sam II 7:12, 13, 16 33I Jakob inan daz dedeŋanip idauziwoi, inan kiŋdom wadan so itautoi.#Mika 4:7; Dan 7:14 34Maria eŋel ipai, ibol, Me dodin mok nauwoi? Ŋa tamol ta so ŋale! 35Eŋel auan jabig ipai, Auanuzgun o stoanop, Ujanzen mok inan tiwon o doloanowoi, mewoi mai me i o teŋaelon inauime i gun, i Anut nanunai.#Ekso 13:12; Mat 1:18, 20 36Uloŋ, Elisabet, oina taitaua, i mug dinou inaulak iwoi diboldime, i inig itozime, i gazo mai aidaŋanime, fulei e mug inan fulei siks itase. 37Anut abaŋ daŋan inaunen iloŋ pasilak.#Gen 18:14 38Maria ibol, Uloŋume, ŋa Ujanzen inan dagom, oina aua uzip segauz noagoi. Eŋel Maria binig ile.
Maria Elisabet izinnen ile
39Nal enen ta Maria imaisge pasak Judea jabnen panu talon ile. 40I Sakarias inan ablak iduseg Elisabet pez ipani.#Luk 1:15; Gen 25:22 41Elisabet Maria inan pez iloŋmeg nanunai i teŋaenlon pazeime. Mug Elisabet Auanuzgun ifofokmeg, 42muguzuŋ inaumeg, auan biseg zigemeg ibol, Gadon, o pain aenta ilonlon kibiniog mado, niŋon o teŋaelon megin mon.#Bet 5:24 43Me dodin tatge ŋainag Ujanzen inan tinan izignen isoime? 44Uloŋ, oina pez tiliŋaglon ŋaloŋmeg, nanugai zigemeg teŋaeglon ipazlak. 45Patu isap madowoi me o ilolon maliklak, Ujanzen inan blanipanek malik niŋon itasawoi me.#Luk 11:28
Maria inan kanam
46Meginlak Maria ibol, Ŋainag nitug Ujanzen inan biŋan bisaime;#Sam I 2:1–10 47ŋainag uz Anutoi zigeime, i inag Patugpaseknen.#Kan 113:5, 6 48I inan dagom inan bini iduknen nasilakoi. Uloŋ, gazomnenge daz daŋan ŋawoi bazas gadon e diboloi;#Luk 11:27 49Ujanzen tiwondaŋan abaŋ ujan ŋa noag panaglakoi. Inan nean gun ienime.#Kan 71:19 50Inan ilopanek me i iwoi dizutdime, daz uzekuzek fodinlak ienoi.#Kan 103:13, 17 51I niman tiwondaŋanlak me beŋten inau. Me i sebadin biŋadinoi mon kankanmeg ditozdime, i pizitiliaime.#Sam II 22:28 52Tata ujan latnenlak, nadin pezatiu i belemanag didu; izaeg dimullak me ibiseg latnen inau.#Kan 147:6 53Pitoldaŋanlak i abaŋ filian pinidin; filiadinlak me inaug se lasen mon dimul.#Kan 34:11; 107:9 54Inan begabeg Israel anen idu, inan kanim ilon isoulakoi, 55i tamadgaz, Abraham, inan daz mai pidinlak egin, azu me dedeŋanip ienoi.#Gen 17:7; 18:18
56Fulei tolgen Maria i izinnen maig demadelag imulge inannen ile.
Elisabet Johanes inau
57Elisabet inan nal pasi binig i ai inau. 58Inan mudubangaz, temalengaz mai diloŋge, Ujanzen ilonpanek ujan inaulak, i maig judin isa. 59Nal eitlon nanunai muluŋ nasiwoi diseg, inan taman nean deblani, Sakarias dibol.#Gen 17:12 60Ge tinan auadin taleg ibol, Tea, i nean Johanes blaniwoi.#Luk 1:13 61I depai dibol, Aitoige oina mezaugaz ta nean megin tea! 62Meginlak i inan taman tabei depani, i dodin tat ai nean blaniwoi dibol. 63Sakarias gazeknen dazukoi igod, ibolmeg gaze: I nean Johanes. I daŋan dizut. 64Gazog inan auan po ibol, inan balen mai seflaleg azu ibol, Anut inan biŋan ibise.
65Mudubangaz daŋan bubudin dizut; au, panupanu Judea fatulon abaŋ mewoi dikibiaidime. 66Dududin i me diloŋmeg bubudinlon denaug du ibolge, dibol, Nanunai me gazop ait inauwoi tat? Anut inan niman i fonlak ien, dab ipani.
Sakarias inan kanam
67Inan taman Sakarias Auanuzgundaŋange abaŋ aloupa iduwoi me imugseg ibol. 68Ujanzen, Israel inan Anut biŋan imais ilaime, i lo idu ise, i inan tamolpain putudin pasilak, mewoi.#Luk 7:16; Kan 41:13; 106:48 69I inan begabeg Dawid inan dazlon id fai didinadnen panadlak.#Kan 132:7 70Wagam profetgaz gun auadinlon ibollak egin. 71I id agez inan tiwonlon tiziad ŋiliadoi, id dumugunadoi, i nimadinlon id mai pisiadoi.#Kan 106:10 72I inad tamadgaz ilon pinidinoi, inan temaneknen gun ilon isouwoi,#Gen 17:7 73azu me i get inad tamad Abraham niman malik ipailak, me inan niŋon id panadoi ibol.#Gen 22:16, 17 74Mewoilakoi i inan kanim ŋale toanadime, id inad agez nimadinlon pisiadmap, tazez teap,#Tit 2:12, 14 75i maip dagomlon, taozlon sededeŋanip tatozlakoi. 76O nanugai, gazop Ujanzen inan profet diboloi, o Ujanzen naon uŋalpa utozoi, inan dal kibinewoi.#Mat 3:3 77O inan tamolpain putudin isanenoi azu pidinoi, me aupasek pasinenoi.#Jer 31:34; Num 24:17; Jes 60:1, 2; Maleak 3:20 78Inad Anut inan ilonpanek nal faun inau, ad latnenge fodlak itasemap, 79me mafuzlon mateŋ jauŋlon mai demataldime i noadinnen sepetadewoi; inad nied mai kume ilap mazoz dallak tezebabewoi, mewoi ise.#Jes 9:1
80Nanunai itub, tinin nitun mai du ibol. I siben Israel peteŋanawoige eginmeg i fatu udaulon made.#Mat 3:1
Currently Selected:
Lukas 1: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
