Genesis 8
8
Siz binilak
1Ge Anut Noa ilon isou, dazuk bulmakau abaŋ daŋan i mai waglak demadodimelak iwoi mai. Anut inaug tanlak tim fazeg mas binig idu; 2betabet inan bubuaik, did inan auan mai funatag, didlon ui me ibiti. 3Naz tanlak binig idug mug kaza ibolge ilaime. Nal won hundert fifti binig mug maiat kin ujan idu. 4Fulei sewen inan nal sewentinlon wag did Ararat fonlak iduse. 5Naz me kinkin mon binig idug fulei tenlon ilemeg, fulei ten inan nal wonlon did gomun beŋten ditase.
6Nal fourti binilag Noa wag ipaulak me inan auan kitek ta pasi. 7I gaugau ta inaug ile. Me izouse izoulemeg made, tanlak naz kaza iboloi tinin inau. 8Meginge tan atenlak naz kaza ibollak me iloŋoi bun ta inaug ile. 9Bun me tan kazak ta so nasig i faun izinnen waglak imul, naz tan daŋan toanig ien, mewoi i niman isouge ŋaleg siben izinnen waglon inau. 10I nal sewen te malan inau, faun waglonge bun ta inaug ile. 11Juzalon bun me i izinnen imul, nasi, auanlon oliw zaun bas jazeg ise. Meginge Noa naz tanlak binilak me iloŋ. 12Meginge i faun nal sewenlon bun ta inaug ile. I faun izinnen so imul.
13Noa inan umaz siks hundert wonlon, fulei won inan nal wonlon naz tanlak kaza ibol. Noa wag inan tinin kin gageg malan ile, nasi, tan aten me kaza ibol. 14Fulei tulon nal twenti‐sewenlon tan kaza ibol. 15Saen melon Anut Noa ipai, 16Waglonpa udu, o, oina iwo, oina ai oina ai nadin iwodin o maip adu. 17Abaŋ bas daŋan, ma, dazuk abaŋ kinkin depaleldimelak me daŋan o maip aduwoi. I tanlak pelelaik gauzpa fabuldaŋanmap tanlak kuzumoi. 18Meginge Noa itaseg idu, inan ai, inan iwon, inan ai nadin iwodin i maig didu. 19Dazuk daŋan, abaŋ depaleldime me daŋan, ma daŋan, abaŋ tanlak ditozdime me daŋan samungaz mai detemanig didu.
20Meginge Noa Ujanzen inan wiwa ta talig dazuk daŋan foa tealak, ma foa tealak daŋan mai menen ta ŋaleg mazekjaoi wiwalak inau. 21Ujanzen zuŋan gamun dab panig ilonlon ibol, Ŋa tamoloi tan faun so ŋemeselaniwoi, ailonge tamol buben kankan bedanig salan. Abaŋ basdaŋan mai get ŋenaulak egin faun so ŋipitiŋinawoi. 22Tan ienmap paeksaen, melaunsaen, mousaen, uisaen, adsaen, jauazti kazag mai, ad tidom mai so biniwoi.
Currently Selected:
Genesis 8: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
Videos for Genesis 8
Episode 36:Are We Near the End? The Bible’s Hidden Pattern
Under The Hood
EP 25. Why Do So Many Cultures Have Flood Myths? The Truth Behind the Stories
Under The Hood
Episode 29: Did a Meteor Really Trigger Noah’s Flood?
Under The Hood
Ep 32. Genesis 6-7: The Flood: A Heartbroken God Brings Justice and Mercy
The Bible Show