Genesis 44
44
Gab padallak
1Meginge Josef abgaten kibiai panig ipai, Tamol nadin bek anaŋ dadon isap debezaunen diloŋlak egin nasip dizi, tamol dadodado nadin gaŋmalan bek auanlon unau. 2Ŋainag gab, gab silwer, me mizimu inan bek auanlon baza inan gaŋmalan mai temanip unau. Josef i ipailak egin inau. 3Fatu sesalimeg tamol nadin doŋki mai denauge dile. 4I dal biziwonlak demademeg Josef inan abgaten ipai, Umaispa tamol uzpe! Zidinnen utasap pidin, Dodinge abaŋ gauai aŋalemeg aŋ megin anau alan? Dodinge aŋ ŋainag gab silwer ponau aŋale? 5Ŋainag ujanzen ŋan melon so tat miliime, ŋan melon kiai so inauimege? Aŋ megin anaug aŋ anau alan.
6I dallak ijabge i azu me ipidin. 7I depai, Dodinge inag ujazen, ina gaten azu egin ibolime. Oina begabeg kagin megin so denaudimelak. 8Nasi, gaŋmalan amnama bek auanlon anasilak, am Kanaan fatulonge aŋaleg aselak me faun imullak. Aitoige silwer gold tat oina ujanzen inan ablon ponau aŋalewoi? 9Ai i gabdaŋan nasimap me funip imatmap am daŋan mai nama ujanzen inan begabeg anauwoi. 10I ibol, Au, aŋ abollak egin: Ai i gabdaŋan ŋenasimap i ŋainag begabeg, aenta daŋan tinidinnen teaboi. 11Ai mug anenanen nadin bek tanlak denaug tamol daŋan nadin bek auan dipas. 12I laŋaimeg matu inanlon fun inaug ileg mizimu inanlon bini. Gab me Benjamin inan beklon nasi. 13Meginge i daŋan nadin jamel diabge detetaza, dadodado nadin bek doŋkilak didizig panulon dimul.
14Juda inan taingaz mai Josef inan ablak ditaseg i madoime, get so ile. I naonnen tanlak dibal didu. 15Josef ipidin, Aŋ abaŋte anaulak? Aŋ so aloŋ tamol ŋa egin i malik kiai inaunen iloŋ? 16Juda ibol, Am dodin inag ujanzen apaiwoi? Am dodin aboloi? Am dodinpa tuzugusinen aloŋoi? Anut oina begabeg nadin aupasek iloŋlak. Nasi, am ŋainag ujanzen inan begabeg, am i mai me nimanlon gab nasilak me. 17Ge i ibol, Megin teaged, ŋa megin so ŋenauwoi. Ai i nimanlon gab nasilak i mon ŋainag begabeg inauwoi; ge aŋ segauz mazozdaŋan temami izinnen ala.
Juda Benjaminoi igod
18Meginge Juda izinnen ipazge ibol, O inag ujazen, binagpa o ŋogodoano, oina begabeg azu ta inag ujazen tiliŋanlon iboloi, oina buzu oina begabegoi buzu so kekazu ibol mon; o Farao siben kilianlakoi. 19Inag ujazen inan begabeg sidiziag ibol, Aŋ temami timi maidaŋan? 20Am inag ujazen apai, Am temamadaŋan, tamol dinou, tima faun mai, daz wadan. Inan tain imat, i siben tinan inan nanun madoime, taman ilon paniime. 21Meginge o oina begabeg pidin, Uduzip izignen iduwoi, ŋa malaglon ŋenasiwoi. 22Am inag ujazen apai, Ai faun taman bininen tea, i inan taman binimap me inan taman imatoi. 23Meginge o oina begabeg pidin, Nami timi mizimu aŋ maip so adutap aŋ naog faun so anasiwoi. 24Am oina begabeg amnama temama izinnen amulge am inag ujazen inan azu apai. 25Amnama temama ibol, Faun alap anaŋ kin adadpe, 26am abol, Am adunen tea. Amnama tima mizimu am maip aletap am aduwoi; tima mizimu am mai teatap am tamol me naon anasinen tea. 27Meginge oina begabeg amnama temama am paiama, Aŋ aloŋ inag iwog nanugai azugen duzi panaglak. 28Ta i binagge ŋa ŋabol, Malik i tetazilak, saen melonge gazo e ŋa so ŋenasilak. 29Aŋ e mai iwiziagpa i padaltap aŋ sagaiklon inag waŋawaŋ ŋetabubpa Seollon azaep iduwoi. 30Mewoilakoi ŋa oina begabeg inag mam izinnen ŋatasemap, ai faun am mai teatap, meginpe ai i inan buben mok me, 31am mai tealak me inasip iloŋpa i imatoi. Meginpe oina begabeg i amnama temama oina begabeg inan waŋawaŋ tabubpa, sagaiklon Seollon dezaep iduwoi. 32Oina begabeg ai faunoi inag mam malik ipailak, ibol, Ŋa ŋuduzip o izinen so imulmap ŋa inag mam malanlon sansan depaiagoi, ŋamatmap geg. 33Mewoilakoi ŋa ŋogodoano, biniŋan, oina begabeg e i ai faun naon iŋalpa ujanzen inan begabeg inaup madowoi; ai faun inan taingaz maip dimuloi. 34Ŋa dodin ai me ŋa mai teap inag mam izinnen ŋalawoi? Abaŋ alan inag mamlak iduwoi mewoi ŋazez.
Currently Selected:
Genesis 44: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
