Genesis 43
43
Josef inan taingaz Benjamin mai Egiptanen diladime
1Kanaan fatulon pitol me ujan. 2I baza Egiptanenge debezaug diselak me diani depasig nadin temadin i pidin, Faun alap idoi anaŋ kin adadpe. 3Ge Juda i ipai, Tamol me auan malikge bebanamag ibol, Aŋ timi maip so asetap aŋ naog so anasiwoi. 4O tima unaup am maip alemap am oina anaŋ adadoi aduwoi. 5O so unautap am so aduwoi, tamol me am paiamalak, Timi aŋ mai teatap aŋ naog so anasiwoi. 6Israel ibol, Dodinge noag alange tamol me nami timi ta madoime apailak? 7I auan diabig dibol, Tamol me kibineg sebamawoi, nama tima lumagaz daŋanoi ibol, Temami bas madoime? Nami timi ta madoime? Am sedazek ewoi mon auan abilak. Timi uduzip aso paiamanen me dodin aloŋoi? 8Juda i inan taman Israel ipai, Ai unaup ŋa maip alawoi, meginpe am amaispa alap bas temadop so tamatoi, amnama ai kinkin o mai. 9Ŋa wageglon ilawoi; ŋa nimaglon iwoi wolaul unauwoi. Ŋa ŋuduzip o izinen so imultap, o naonen so ŋenautap o gaid iwoi ŋa paiagoi. 10Id abaŋ ewoi so muzuadpe me am get ala amul azupe.
11Meginge temadin Israel i pidin, Megin montap aŋ megin anau: aŋ fatu e inan japatun gauaigauai ta sazeglon aŋalep alap tamol me zaiŋ apani, balsam#43:11 me japatan zuŋan gamun daŋan, marasinoi gubuzuztaen kin mai, mimin siziun, gedagod, japatan ta zuŋan gamundaŋan tali kaŋaz mai. 12Gaŋmalan baza naon azup aŋalep ala; gaŋmalan dubulig nami bek auanlon didizilak me mai aŋalep amuloi, dedeladal tatge didizi. 13Nami timi mai aŋalep amaispa tamol me izinnen ala. 14Anut tiwondaŋan aŋ tamol me naonnen kanim panaŋpa timi ta Benjamin mai inaupa dimuloi. Nanuggaz ŋa wiziagtap wiziagoi, se ŋemadowoi. 15Meginge tamol zaiŋ abaŋ gaŋmalan naon azug Benjamin mai diŋalge dimais, Egiptanen dileg Josef naonnen ditiuz.
16Josef Benjamin i maig demademeg nasig i inan ab tizineknen gaten ipai, Tamol udauzip ablon dilawoi, dazuk ta saep kibine, ad matilon i ŋa maip anaŋ aniwoi. 17Tamol Josef megin ipailak i azu uzig tamol me Josef inan ablon idauzi. 18Josef inan ablak idauzilakoi tamol i dizez, i dibol, Gaŋmalan get dubulig inad beklon didizilak mewoi se tinid inaup biadpa inan begabeg tenaup inad doŋki wiziadoi. 19Mewoi i Josef inan ab tizineknen gaten izinnen dileg i mai ab inan dalauan dabinlon dikibiai. 20I dibol, O amnama ujazen, am malanmalan anaŋ adadoi adug, 21am wonoŋ inan abenlon ataseg amnama bek auan apasig tamol dadodado inan gaŋmalan inan bek auanlon ien, nama gaŋmalan daŋan skellak iduse. Mewoi am faun aŋaleg aselak. 22Gaŋmalan aenta anaŋ adadnen nimamalon aŋaleg ase. Am so aloŋ it tat gaŋmalan nama beklon inaulak. 23I ibol, Tinimi binip amado, so azez mon, nami Anut temami inan Anut, i aŋoi nami beklon jes idizilak tat. Ŋa nami gaŋmalan ŋeŋalelak. Meginge Simeon beŋten duzig zidinnen ise. 24Tamol me Josef inan ablak idauzilag naz pinidin, niedin deflanig, i nadin doŋki anaŋ dipinidin, 25taingaz Josef se zaiŋ paninen abaŋ dikibine, i melak anaŋ dianiwoi dibollakoi.
26Josef inannen itaseg i zaiŋ abaŋ i deŋaleg diselak me i izinnen ablon denaug i naonnen tanlak detakok. 27I gauai tat demadodime sodoz pinidinge i ibol, Temami, tamol dinou aŋ abollak, i gauai madoime? I bas madoime? 28I dibol, Oina begabeg nama temama i gauai madoime. I bas madoime. I detakokge dugudin desebenaig didu. 29Josef inan malan biseg inan tain Benjamin, tinan inan ai, nasig ibol, Inag ai, Anut kanim ŋalep pano! 30Meginge Josef Benjaminoi tinia isaewoi inaug tiŋia abenoi laŋai, i inan galuŋlon idug ita. 31Meginge i inan naon flanig beŋten itase. Ilon stemanig i ibol, Anaŋ bezaup aso. 32I aben iben tabiz ta depani, taingaz mai ibennen dipinidin. Egiptagaz i Josef inan ablon anaŋ dianidime me mai ibennen diani. Egiptawain Hebreawain mai anaŋ so diani taimon, Egiptawain foawoilakoi. 33Taingaz i Josef naonnen dematal, matu tinan duzilak inan abenlon, mizimu mok mai mizimu inan abenlon; tamol dedeladalge nug lalelale. 34Josef inan anaŋ menen ta deŋaleg tamol dipinidin, Benjamin inan anaŋ me aenta nadin nenazig kin zen, tabiz faif depani. Meginge i dimilig i maig judin isa.
Currently Selected:
Genesis 43: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
