Genesis 19
19
Sodom Gomorra mai depadal
1Eŋel azugen i juzalon Sodomnen ditase. Lot i Sodom panu inan dalauanlon matal. Lot ilge i mai naon tazetazewoi imais, naon tanlak takokge ibol, 2Inag ujanujangaz ŋogodoanaŋ, nami begabeg inan ablak kin adup tidomlon amadop, niemi flanip boŋanip bomon mon aŋ alawoi. I dibol, Tea, am bop panu mon uzip atozoi. 3Ge i gauz seseŋana. Meginge i izinnen dileg inan ablak demade. I janek ta kibine, sepalaŋ dideknen zagun mai so geteŋanilak menen ipinidinge diani. 4Ge i wonoŋ so diabimeg panu me inan tamol, Sodom inan tamol, faun besabes mai, tamol ai mai daŋan mok ab dililiti. 5I diwogge Lot depai, Tamol juzalon o izinen diselak me domten? Udauzip beŋten didup am i maip nama kagin me anauwoi. 6Lot i dalauanlon tamol zidinnen idug muzinnen dalauan funatig, 7i ibol, Ŋainag taiggaz ŋa ŋogodoanaŋ, aŋ kagin salan so anau mon. 8Anasi, ŋa aipain azugendaŋan, i get tamol ta maig so ditozlak; binagpa ŋa i ŋedauzip ziminen diduwoi, aŋ abolame egin i‐lon anau, tamol alan so anau mon, i ŋainag ablon ŋitizinag demadodime. 9I dibol, Usukpa umul! Dibol, Tamol salan e iseg baswain egin madoime, i idinad betenaek inauwoi ibolime. Gazo am owoi gik abolpa alan unuowoi, iwoi kinkin egin mon. I mug Lot gauz dububuzig kin mon maip ab inan dalauan dipitiŋiniwoi denau. 10Ge tamol didabge Lot diabig zidinnen ab ilonnen dezaeg idulemeg dalauan dufunati. 11Ab inan dalauan muzinnen demadelak, faunfaun ujanujan mai me meladin itaunen abaŋ ifug dalauanoi didabse didable lo tea.
12Meginge tamol me Lot depai, Oina ai aenta elak demadodime, nenate, ai aipain tat? Ai ta tat panu elon demadetap udauzip panu e dibiniwoi. 13Am panu e pitiŋiniwoi anauame, tamolpain nadin liŋan Ujanzen naonnen ujan moklakoi, Ujanzen am noamag pitiŋiniwoi ase. 14Meginge Lot imaisge ileg inan nenatengaz, me inan aipain mai difezlak me ipidin, Amaispa panu e ibinip ala! Ujanzen i panu e pitiŋiniwoi inauime. Ge nenatengaz ladinlon dibol, i baŋai azu ibolime.
15Fatu sesalimeg eŋel Lot deseseŋanig dibol, Umais, oina pain aipain azugen mai elak demadodime me uŋal, teap o mai panu inan naon paneklon padaloi. 16Ge i muzuan. Mewoi tamol i inan pain aipain azugen mai nimadin diabge, Ujanzen kanim ŋale pinidin, i didauzig panu muzinnen denau. 17I muzinnen didauzilakge i dibol, So apadaloiged au! So adaŋse mon, zoanek aben talon jaeŋ so aŋale mon, bubun ilonnen aupa ala, teap aŋ apadaloi. 18Lot ipidin ibol, O megin tea, ŋainag ujanujangaz, 19aloŋ, nami begabeg aŋ melamilon kanim iŋalelak, patug paseklon lo zen mok ŋawoi idu. Bubun ilonnen bo ŋaupa ŋalanen tea, dallak ŋepadalpa ŋamatoilakoi. 20Nasi, panu ŋan a, sisizlon iduse. Binagpa melon toanagpa ŋemadowoi, me panu kitek tea tat? Meginpe bas ŋemadop so ŋamatoi! 21Eŋel ibol, Uloŋ, kanim e mai ŋeŋalep ŋepanowoi, panu o ubollak me so ŋipitiŋiniwoi. 22Pasak melak uwaupa; o melak utasemap mon abaŋ ŋenaunen ŋaloŋ. Mewoi panu me nean Soar deblani. 23Ad tanlak itaselag Lot Soarnen idulak.
24Meginge Ujanzen inaug ja waetaen mai didlakge Sodom Gomorra panu fonlak idu. 25I panu fatu zoanek daŋan, panu inan tamolpain daŋan, abaŋ tanlak disadimelak me mai pitiŋina. 26Lot muzinnen inan iwon idaŋselag i mastaenlon toani gegaunge itiuz. 27Abraham i bomon mon get Ujanzen naonnen itiuzlak fatu melon ile. 28I malan ileg Sodom Gomorra mai fatu uzem inan tan daŋan mai baŋenlon abaŋ iliŋemeg, inan jakas me wiwa ujan inan jakas egin itasemeg nasi.
29Meginge Anut fatu zoanek inan panu me pitiŋinameg i Abraham ilon isouge, panu Lot madelak me mai pitiŋini me ilonnenge Lot inaug ile.
Moabgaz Ammongaz nadin fudin
30Uzig Lot Soar binig inan aipain azugen mai bubun ilonnen demade. Soarnen imadowoi izez; mewoi inan aipain azugen mai gogoŋ talon demade. 31Matu me mizimu ipai, Inad mam mug dinou inau, tamol ta tan kagin duzip id ŋiliadnen tea. 32Usop id mam wain tepanip milimap i maip taenoi, meginpe mamlon inad daz tezepalewoi. 33Meginge tidom melon temadin wain depanig mili. Matu idug inan taman mai dien. I maig dienlag a faun imaisge idulak me taman so iloŋ. 34Nal uzig matu mizimu ipai, Nasi, ŋa tidom binilaklon ŋainag mam mai aenlak; bop mai wain tepanip miliwoi, meginpe o udup i maip aenmap inad mamlon daz tezepalep so teaboi. 35Mewoi i temadin deseseŋanig tidom melon mai wain imili. Mizimu imaisge i maig dien. I maig dienlag a faun imaisge idulak me taman so iloŋ. 36Meginge Lot inan aipain azugen temadinlon aidaŋan. 37Matu i aitamol duzig inan nean Moab iblani; i Moabgaz temadin gazo e. 38Mizimu mai aitamol duzi, inan nean Ben‐ammi; i Ammongaz nadin temadin gazo e.
Currently Selected:
Genesis 19: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
