Genesis 12
12
Anut Abram wagi
1Ujanzen Abram ipai, Oina panu, oina taitaua, tama inan abbadim mai ubinpa fatu ta ŋa ŋepeteŋanop melon ula. 2Ŋa ŋunuop o fatubadim ujanoi, ŋa ŋikibiniop nea biŋandaŋanoi, o kibineknen unaup utozoi. 3I o dikibiniotap me ŋa ŋikibiniawoi, i o demeselanotap ŋa me ŋemeselanawoi. Olon fatufatu nadin samungaz daŋan kibiniawoi. Olon i sebadin kibineknen deŋalewoi.
4Meginge Abram ile, Ujanzen ibollak egin, Lot i maig dile. Abram umaz sewenti‐faif imadelakge i Haran binig ile. 5Abram i inan iwon, Sarai, tain inan ai Lot, biauŋ i diŋalge ditozlak mai, begabeggaz mai Harannen i maig demadelak, me biauŋ mai iŋalge Kanaannen dilawoi dile. I Kanaan fatulon ditaseg, 6Abram fatu bufateg ileg Sekemnen More inan ito izinnen itase. Saen melon Kanaanwain fatu melon demade. 7Saen melon Ujanzen Abram izinnen itaseg ibol, Oina begazagaz tan e ŋipinidinoi. Mewoi i melak Ujanzen me i izinnen itaselak iwoi wiwa ta zaze. 8Melakge imaisge did Betel ist baŋenlon ileg Betel west salolon, Ai panu istlon ienmeg, inan tazas inau. Melak i Ujanzen inan wiwa ta zazeg Ujanzen nean wagimeg made. 9Abram fatu daiag Negeb salo ile.
Abram Egiptanen made
10Saen melon fatu men pitol idu. Meginge Abram Egiptanen kin madowoi ile, pitol kin ujanlakoi. 11I Egipta fatulon iduwoi sisizge i inan iwon Sarai ipai, Ŋa ŋaloŋ o pain nao tini mai gamun. 12Egipta tamol o denasomap i diboloi, Me i inan iwon; meginpe i ŋa dufunag ŋamatpa o dibinop bas madowoi. 13O nainag liug e ubolpa i dibinagpa i owoi so dufunagoi. 14Abram Egipta fatulon idug Egiptagaz meladin ileg pain gamun mok me denasi. 15Farao inan tamolujan i denasig i Farao naonnen biŋan dibise. Mewoi i pain duduzig Farao inan ablak denau. 16Iwoi i Abram kibine gauai; i belelek, bulmakau, doŋki dauai, aibegabeg, painbegabeg, doŋki paiat kamel mai ipani.
17Ge Ujanzen Farao, inan abbadimgaz mai Abram iwon Saraioi abaŋ salanlon alan pinidin. 18Mewoi Farao Abram wagig ibol, O abaŋte ŋawoi unaulak? Aitoige i oina iwo me so paiaglak? 19Dodinge i ŋainag liug e ubolge ŋa ŋainag iwog egin ŋeŋalelak? Mewoi oina iwo ŋan ie, ŋalep ula. 20Farao iwoi inan tamol kibiai pinidinge i inan iwon, inan abaŋ daŋan mai denaug ile.
Currently Selected:
Genesis 12: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
