Efesus 3
3
Anut Kristus inan fun Paulus peteŋanilak
1Mewoilakoi ŋa Paulus aŋ gobgazoi Kristus Jesus inan sebanektamol.#Fil 1:7, 13 2Ŋa ŋabol aŋ Anut inan kanim uzat aŋoi panaglak me aloŋ.#Kol 1:25 3Me i dodin azu toanek boboloaneklon peteŋanaglak me mug kin ŋegazelak.#Ef 1:9, 10 4Aŋ me usutimap aŋ Kristus inan fun kin tezepasig ŋenasilak me aloŋoi. 5Gazo inan apostel gun profet mai Uzlon peteŋanalak egin, megin begadin dimuglak nadin aigaz so peteŋanalak.#Kol 1:26 6Ŋan me, gobgaz i dodin fuzan ŋalekbi, i dodin tinin taimon inan boi ta, dodin totol gamunlon Kristusoi blani panek deŋaledime me.#Ef 2:13, 18, 19 7Anut inan lolon ŋa totol gamun e inan sigianektamol noagge inan tiwon nauknauklon panaglak.
Paulus i gob nadin totol
8Kanim e ŋa ipanag, me ŋa gungaz daŋan ilonnen mitin mon, ŋa Kristus inan filian wozen paseknen so ŋaloŋlak me gobgaz ŋipidinoi.#Kor I 15:9; Ef 1:7; Gal 1:16 9Daŋan diloŋoi me Anut i abaŋ daŋan inaulak i dodin kagin i‐lon toanig ienlak ŋelaŋal inau.#Rom 16:25; Kol 1:16 10Meginpe eklesialon Anut inan kaginkagin zen me kibiaipanek duzek fun mai did aben daŋanlon diloŋoi.#Pet I 1:12; Rom 11:33 11Me dedeŋanig ibolge ŋan Kristus Jesus inad Ujanzenlon niŋon inaulak.#Ef 1:11 12I‐lon id ilodlon maliknenlon so tazez, tea, tenau tepanig izinnen tapaznen taloŋ.#Joh 14:6; Heb 4:16; Rom 5:2 13Mewoi ŋogodoanaŋŋame, ŋa aŋoi alan ŋenauŋame mewoi bubumi so sagai mon, alan nauk me nami kubel.#Kol 1:24
Paulus medaeŋ faungazoi godoanek inauime
14Mewoi Mam naonnen dagug ŋesebenaiŋame, 15i‐longe daz funfun daŋan didlon tanlak mai neadin blanaime, 16i inan kubel zen uzip inoaŋpa inan Uz tiwonlon lamilon stemanaŋoi.#Ef 1:7; 6:10 17Kristus i ilonlon maliknenlon bubumilon madowoi; aŋ ilopaneklon dubumidaŋanpa lami zatamoi,#Joh 14:23; Kol 2:7 18gungaz daŋan mai lami sesalip, meginpe aloŋoi, kagin e inan bebaŋan, inan melaen, inan malaen latnen, inan tig mai dodin. 19Kristus inan ilopanek me tamol inan maŋau beleŋaniime me mai alonoi, meginpe Anut inan kagin subuŋan daŋan aŋlon fuamoi.#Kol 2:3
Anut gaid kubeldaŋan madowoi
20Ge i me inan tiwonlon id ilonlon uzat inauime, i inad kankan tagodtame me mai nenazip panadnen iloŋ,#Kol 1:29 21ŋan i eklesialon, Kristus Jesuslon biŋandaŋan madowoi, daz daŋan ilonlon, dedeŋanip dedenanipnen. Malik.
Currently Selected:
Efesus 3: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
