Apostel Sai 5
5
Ananias Safira mai salan denau
1Tamol ta nean Ananias, inan iwon nean Safira, i inan um ta idad ile. 2Gaŋmalan melon ŋalelak menen aenta inan iwon mai dibolge ibinig idumeg, aenta mon apostel niedin funlon inau.#Apos 4:35, 37; Gen 3:1 3Ge Petrus ibol, Ananias, dodinge oina bube Satan jabig ifofoklak, Auanuzgun se wozaiume, um udad ilelak gaŋmalan aenta o bini idulak?#Joh 13:2 4Um get so udadmeg i oina tea tat? O udad ilelag sibe naonoi so uboloi? O bube dodin ta naug usegŋan a? O tamolpain mon se so zudinlak, o Anut siben se wozailak! 5Ananias azu megin iloŋge ibal idug imat. Daŋan biŋ me diloŋmeg daŋan gauz dizut pasi.#Apos 19:17 6Ai faunfaun dimaisge diseg sesanun dikibineg deŋaleg beŋten didug denau.
7Aur tolgen binig inan iwon ise. Aban idulak i so iloŋ. 8Petrus auan bufateg ipai, O ŋa paiagpa, aŋ um adadlak gaŋmalan egin aŋalelak? I ibol, Au, ŋan e mon. 9Ge Petrus ipai, O dodinlakoi iwo mai fumi taimonge Ujanzen uz ikibianiwoi? Uloŋume, iwo dojoazelak dalauan naonnen ditiuzdime, i o mai dijiwiziowoi! 10Meginge i mai buntaimon inan nien funlon ibal idug imat. Aifaungaz diduseg denasitag dojoazeg dileg iwon izinnen denau. 11Kris medaeŋ daŋan aenta mai abaŋ me diloŋlak dadon isag gauz dizut malan itau.
Ujanzen apostellon maŋau inau. Medaeŋ itub ujan
12Apostel nimadinlon bagoz maŋaumaŋau mai kuzum inaug idu. I daŋan bubudin taimon Solomon inan galuŋlon demade.#Apos 2:43; 3:11 13Aenta ladinlon so malik, i temanekoi so dibol. Ge tamolpain iwoi azu gauai mon dibol. 14Tata i mai Ujanzen ladinlon maliklak, sansan detemani, kuzumpanu, tamol pain mai.#Apos 2:47; 6:7 15Au egin, tamolpain maiai ifulak me nadin badim taegdaŋan mai deŋaleg didug dallak denau. Petrus isop dibol, inan tinin metelaen ta itoanip i gauaioi dibol.#Apos 19:11, 12; Mar 6:56 16Jerusalem dililitig panu diendimelak me mai nadin tamolpain maiaidaŋan, buga ifulak me diŋalge diseg daŋan mai tinidin bas gauai denau.
Apostel sebaneklon, eŋel ipas iŋal
17Waliŋgaten imaisge aenta i maig demadelak me sadukeagaz, i daŋan segazadin isag,#Apos 4:1, 6; Mat 27:18 18apostel diabge sebaneklon dufunata.
19Ge Ujanzen inan eŋel ta tidomlon idu, sebanek dalauan ipasig idauzig beŋten didu, ipidin,#Apos 12:7 20Alap tempellon adup tamolpain totol basnen pidin. 21I me diloŋlakge bomon mon tempellon diduleg azu dibol.
Meginmeg waliŋgaten, i izinnen demadelak mai, betenaekgatengaz Israel nadin matumatugaz mai wigidinge detemani; i ai denauge dileg sebaneklon me diŋalpa disowoi dibol. 22Begabeg dileg sebaneklon so dil. Dimulge diseg dipidin, 23dibol, Sebanek kabe funatig ien anasi, fitamol dalauan muzinnen fi ditiuzge demade; ge am afuemeg tata so ail. 24Tempelgaten waliŋgaten mai azu me diloŋmeg fun denau lo tea, dodin tat inauime? dibol. 25Taimon ta iseg pidin, Aloŋ, tamol aŋ sebaneklon anaulak i tempellon ditiuz, tamolpain azu dipidin.
Apostel sililig sigiani
26Tempelgaten inan begabeg maig dileg diŋal, ge gegaun so denau, i tamolpainoi dizut, patlon difuwoi tat dibol. 27I diŋalge diseg betenaek gatengaz noadinnen denau. Waliŋgaten sidiziameg 28ibol, Am so tat aŋ gegaun pizianaŋlak, aŋ nean ewoi faunte so aboloi? Ge aŋ segauz anaulak, mug Jerusalem daŋan azu me ifofok pasi, am tamol e inan daz tinimanen abol anaulak!#Apos 4:18; Mat 27:25 29Ge Petrus apostel aenta mai auan diabig dibol, Malanmalan Anut dagom panip tamolpain nenazawoi me.#Apos 4:19; Dan 3:18 30Inad tamad nadin Anut i Jesus fuŋunilak imais, me aŋ jakebazeklak azaig funi imatlak.#Apos 3:15 31Me Anut inan tiwon waŋlon biselak, Ujanzen mai patunpaseknen mai nean blanilak; Israel tamolpain tulufunek didaŋsanen aupasek paze idunen mai pinidinoi,#Apos 2:33 32am azu me inan sigianektamol, Auanuzgun megin mon, me Anut tamolpain daŋan pinidinlak, i inan auan dagom depanidime.#Luk 24:48; Joh 15:26, 27 33I azu me diloŋmeg nadin bubudin badizlon sebelai egin inau, ladinlon nean denau, i dufunip dimatoi dibol.#Apos 7:54
Gamaliel aposteloi ibol
34Betenaek gatengaz leŋadinlon farisea ta imaisge i nean Gamaliel, i kibiaiŋkaman, tamolpain inan biŋan dibise, i bol, apostel kin beŋten didauziwoi.#Apos 22:3 35I pidin, Israelgaz, iŋ dab anaup, aŋ tamol e abaŋte anaup pinidinoi! 36Ge saen e so idumeg tamol ta nean Teudas imaislak, i tamol ujan e ibol, tamol 400 egin inan sunuzek. I mug aben tea, dufuni imat, inan sunuzek daŋan depetetaleg diau depasi.#Apos 8:9; 21:38 37Alouge Galileawain Judas tamolpain neadin gazeknen nallon imaislak, tamolai kuzum i ladin pasig maig ditoz. I mai aben wonanan teag imat, inan daup daŋan mai bezetaleg diau pasi.#Luk 2:2; 13:1 38Meginge ŋa ŋepaiaŋ, aŋ tamol e abinpa sebadin denauwoi. I diboldime denaudime mai me tamol nadin montap i siben biniwoi.#Mat 15:13; 21:25 39Ge me Anut inantap aŋ pitiŋininen so mok aloŋoi. Aŋ dab so anaup aŋ Anut liwon abiame diboloi.#Apos 9:5
Apostelgaz difug dipas, i zigiameg dimul
40Inan auan duzi depani, apostelgaz diwigidinge toklon mon difug laiŋ depaze, dipidin, i Jesusoi faun so diboloi dibol. Meginge dibinge dile.#Apos 22:19
41I bubudin zigiekdaŋan betenaek gatengaz noadinnenge dimulge dile, Anut i bisiadinlakoi, i Jesus neanoi alan denaug demadelak, mewoi.#Mat 5:10–12; Pet I 4:13 42Me i nal daŋan tempellon ab mentelon mentelon mai totol gamunoi azu dibol, Jesus i Kristuslak, mewoi auadin so kati ibol.
Currently Selected:
Apostel Sai 5: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
