Apostel Sai 28
28
Nui Miletus demade
1Putuma pasig amademeg nui me inan nean aloŋ, Miletus dibol. 2Nui mezaungaz i lo gauz didu, donoama gauai; i ja dutunig biama mai depalu, ui idug malas mai funumalakoi.#Kor II 11:27
3Paulus sib malan betemanig bezaug itani. Meginge mot salan sib jalak wonananlakoi itaseg inan niman jaze. 4Tamolpain inan nimanlak mot ikukge denasimeg nug dibol, Tamol e malik funekbibian, maslon so padallak, ge tibud e inan wagaz so binip ilawoi, gazo funi mokoi inauime. 5Ge i niman bitiliŋanig jalon kude tani, alan kin so inau.#Mar 16:18; Luk 10:19 6Tamolpain malan denaug didip tat, buntaimon imatpa ibal iduwoi dibol. I saen melaen tinidin denaug demade; ge denasimeg abaŋ alan ta kin so funiime i auadin iben dibol, dibol i tibud ta.#Apos 14:11
Paulus i Publius inan taman, aenta mai tinidin kibinia
7Panu me sizizlon nui me inan tamol ujan nean Publius, inan um ujan ienime. I am ŋiliamag inan ablon nal tolgen lo mok anaŋ penama. 8Saen melon Publius inan taman maiai salan ifunig ien, taen mai fezasi. Paulus inan galuŋlon idu, godoanimeg niman fonlak inau, meginge tinin faun pasa ibolge bas. 9Meginmeg aenta nui melon maiaidaŋan maig diseg i daŋan kibinia pasi. 10Mewoige i am biŋama gauz dibise. Alouge faun atasawoige i lautamad, abaŋ aenta waiŋnen me mai lo depenama.#Mat 10:8; Luk 8:3
Faun ditaseg dile: Sirakus, Puteoli, Rom
11Fulei tolgen binilag am Aleksandria panu inan waglak aduse, me jauazti saenlon nui en so ienlak, elon ajaua. Inan bagoz me Dioskuri. 12Am Sirakusnen abal. Men nal tolgen amade. 13Menge laŋ tilianig sipilitig alemeg Regium atiti, Boŋanip egin jauan ipalumeg am nal azugen binig mug Puteolinen aballak. 14Men timagaz ail, i digod, am ubou taimon i maip amadowoi. Amadelag am aleg Romnen atase. 15Timagaz men demadodime, i am‐oi biŋ diloŋge, dimaisge dallak am mai naon tazetazewoi diseg Apii‐Forumnen, Tabernoun Tolnen denesama. Paulus i leleidin ilmeg i Anut pez pani, faun segatig imade.#Rom 1:7
Paulus Romnen. Juda medaeŋ gatengaz mai dikibiai
16Romnen adulag opasgaten Paulus opas ta pani. Paulus ipai, i siben ab ta pilianip madowoi, opas taimon i tizinip mai.#Apos 27:3
17Nal tolgen dibinilag i Juda medaeŋ gatengaz wigidinge, izinnen disowoi ibol. I diseg ipidin, Taiggaz, ŋa bo inad tamolpainbadimoi, tamadgaz kaginoi mai siai so ŋatozlak, ge i Jerusalemnen dibiaglak, Romgaz nimadinlon donoag. 18I ŋawoi kabe dubudab binilag, pisiagoi dibol, dufunag ŋamatnen ja tiniglak ta so denasilakoi. 19Ge Judagaz me dimoige, mewoi ilog seseŋaniime ŋa kaisar mok ŋepaiwoi ilog ien. Ge ŋainag tamolpainbadim meladin ŋesaewoi so ŋabol, tea, sibeg gateg pasekoi mon ŋabol.#Apos 25:11 20Mewoilakoi aŋ izignen asowoi ŋabollak; ŋa ŋenasaŋpa aŋ maip tikibiaiwoi, Israel inan suzuazouknenoi ŋuzaŋuz elon dopoaglak.#Apos 26:6, 7 21I depai, Owoi Judeanenge leta ta so denaug depenamalak, taid ta mai en so ise, i owoi azu salan ta ibol, tea, 22Ge am oina aualon kin aloŋpe, o dodin ubolume. Oina medaeŋ tuzutek iben ta o temanilak, iwoi bo fatu daŋanlon liwon jabek ienime, me aloŋ.#Apos 24:14; Luk 2:34
23I nal ta nean denau depanilak melon kuzum diseg inan ablak diduseg medaeŋ ujan detani. I me bomonge ileg juzameg geg, Anut kiŋdomoi azu pidin. Jesusoi i Moses kibiaiŋ profet gazek mai isae, fun flale, azu melon i Jesus diloŋpa daŋe depaniwoi, ilon ibol. 24Aenta i inan auan ladinlon malik, aenta bo so ladinlon malik. 25I daŋan auadin taimon tealakoi depezetaleg dimul. Dilemeg Paulus azu taimon ta mai pidin ibol, Auanuzgun profet Jesaia auanlon aŋ temamigaz sebelaeg ipidinlak egin, 26O badim e izinnen ulap pidin, Aŋ tiliŋamilon bo aloŋoi, ge so tezepasip aloŋoi; melamilon bo anasiwoi, ge so aloŋoi.#Jes 6:9, 10; Mat 13:14 27Badim e inan buben boklak, tiliŋadin meteteŋana, meladin kelakil mon demadodime; inadin meladin abaŋ so denasipes i tiliŋadinlon so diloŋoi, niŋon bubudinlon so deŋalewoi, meginpe i didaŋsap ŋa i ŋikibiniawoi. 28Mewoilakoi aŋ aloŋoi, Anut inan patunpasinen gob zidinnen inaug ileg pinidin. I inan auan dab depaniwoi.#Kan 67:3; Apos 13:46 29I megin pidinlag Judagaz depetetaleg diau, nug gauz mok sodoz panipani.
30Paulus umaz azugen daŋan inan aben taimonlon mon made. Denasiwoi disemeg me inan ablak diduse. 31I me daŋan Anut kiŋdomoi azu pidin, Ujanzen Jesus Kristus inan fun jaugjaug iflaleg peteŋana, tata i mewoi so piziana.#Apos 28:23; Fil 1:14
Currently Selected:
Apostel Sai 28: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
