Apostel Sai 2
2
Auanuzgun idu
1Auanuzgun inan nal pisinimeg i daŋan bubudin taimon detemanig demade.#Lew 23:15–21; Apos 1:14 2Mug buntaimon didlakge liŋan idu, tim metalun fazek egin gik ibolge idu ise; ab demadelak me daŋan inau itau.#Apos 4:31 3I noadinnen balen peteŋana, jabalen egin, me petetale petetale wae pinidin, dududin getadinlak gunig ienime.#Mat 3:11 4Me i daŋan ladinlon Auanuzgun ifofokime, auadin azu ibeniben dibol. Auanuzgun i pinidin diboloi megin diboldime.#Apos 10:44–46; 19:6
5Judaai Anut inan dagomgaz me fatu daŋanlonge diseg maig Jerusalemnen demade.#Apos 13:26 6Liŋan me pisinimeg tamol malan zen daŋan detemanig dise, dedadub dizutge nadin auadinlon dadodado i azu dibolmeg diloŋ, mewoi. 7I daŋan bubudin punufunig dizut deladal, nug dikibiaig dibol, Anasi, e azu diboldime me daŋan so tat Galileawain mon? 8Dodin mon id dadod inan mezaud auanlon azu diboldime, id taloŋ? 9Id Parta, Media Elamgaz mai, Mesopotamianen, Judeanen mai, Kapadokianen mai, Pontusnen Asianen mai, 10Prigianen, Pampilianen Egiptanen maig temadotame, fatu Libia inan tuzutek talon Kirene geglon, Romnenge mezazeŋgaz diselak, Judatamol gob me kagin deŋalelak mai. 11Kretawain Arabiawain mai id daŋan inan auadlon Anut inan maŋaumaŋau fun deblanimeg taloŋtame. 12I daŋan tulufunag deladal, nug paipaig dibol, Dodin ta mon nauwoi? 13Aenta bo dizadin dewae dipinidin, dibol, Aiu dimililak ifuime me.
Petrus azu ibol
14Petrus ai elewen mai daŋan dimaisge auan joazeg pidin ibol, Juda tamolai wezami, aŋ aenta daŋan mai Jerusalemnen amadoame, aŋ e paiaŋoi aloŋ, ŋainag auag tiliŋamilon aŋalep dab apani. 15Ai e aiu so ifulak, aŋ abolame me, admetelaen 9 mon gazo saeg ienime. 16Tea, profet Joel get ibollak me mon niŋon inauime: Anut ibol,#Joel 3:1–5 17Nal kin wadanlon ienmap egin ŋenauwoi, ŋa ŋainag uz kin tamolpain daŋan fodinlak ŋewalip iduwoi, nami nanunai nanunpain mai profet egin ŋa fug deflalewoi, nami aifaun nitun dijazoi nami tamol matu dienminlon Anutoi boboloanek azu diloŋoi.#Apos 21:9; Jes 2:2 18Inag begabegai painbegabeg mai fodinlak nal melon ŋainag uz kin ŋewalip iduwoi, meginmap i mai profet egin ŋa fug deflalewoi. 19Ujanzen inan nal ujan, nal boboloaneknen get so idulak eginmap ŋa did latnen maŋaumaŋau ŋenauwoi, tanlak bagoz ŋenaup diduwoi, daz, ja jakas mai. 20Ad bulisap mafuz inauwoi, fulei bulisap daz inauwoi. 21Megin inaumap me i Ujanzen inan neanoi ibolime me tetazi ŋalep madowoi.#Rom 10:13
22Israelgaz, azu e aloŋoi! Nasaretwain Jesusoi Anut siben aŋ ziminen fun flale peteŋanaŋlak; aŋ leŋamilon i tiwondaŋange uzat inau, maŋaumaŋau bagoz mai Anut i nimanlon inaug idulak me aŋ aloŋlak.#Joh 3:2; Luk 24:19 23Me aŋ aŋalelak, gob i Anut kibiaiŋ tealak i nimadinlon aŋ i jakebazeklak azailak ufunig imat pasi. Ge Anut me wagam iloŋlak, siben mai ilon ibollak, megin inauwoi ibolge mewoi idu.#Apos 4:28 24Ge Anut i faun fuŋunilak, mateŋ zaeŋ iseflalemeg bas imais, mateŋ i jabinen so iloŋ.#Apos 3:15 25Dawid iwoi ibol, Ŋa Ujanzen gaid naognen ŋenasiŋamelak; i nimag waŋlon madoime, ŋa so ŋajoulawoi, mewoi.#Kan 16:8–11 26Mewoi inag bubeg jaugjaug madoime, auag zigeime; au, inag tinig mai loflon suzuazoumeg ienoi. 27O inag nitug Hadeslon so bitip madowoi ubollakoi, oina Ai gun mezeteŋaniwoi mai so ubolume.#Apos 13:35 28O dal basnen peteŋanaglak, o naonen ŋa zigiek panag ilog fuamoi.
29Tamolgaz, aŋ taiggaz! Tamad ujan Dawidoi aŋ paiaŋoi so pizianagŋan. I imatlak denaulak, inan fedafod gazo mai ien, id tenasitame.#Apos 13:36; Kiŋ I 2:10 30Ge i profetlakoi i iloŋ Anut get niman biseg malik ipailak, inan daz ta inan pezatiulak mataloi ibol.#Kan 132:11; Kan 89:4, 5; Sam II 7:12, 13 31Meginlak i get Kristus inan tiziauoi ibollak, i Hadeslon so bitig madelak, inan tinin so mezeteŋanilak.#Kan 16:10 32Anut i Jesus fuŋunilak me am daŋan sigianektamol amadoame.#Apos 1:22 33Anut i siben inan niman waŋlon ibiselag, Auanuzgun i get Mam blani panilak me mai niŋon panilag i me gazo wali idulak, me aŋ anasiame aloŋ maiame. 34Dawid didlak so biseg ŋalelak, ge i ibolime, Ujanzen i ŋainag Ujanzen ipailak, O ŋa waŋlon matal uduwoi,#Kan 110:1; Mat 22:44 35ŋa get oina agez oina nie inan pezatiu ŋenaup ŋemadowoi. 36Meginpe Israelgaz daŋan malik diloŋoi, Jesus me, me aŋ jakebazeklak azailak, ŋan me Anut siben ŋale, Ujanzen mai Kristus mai inaulak.#Apos 5:31
Jerusalemnen kris medaeŋ fun inau
37I azu me diloŋge bubudinlon sebelai egin inau, Petrus apostel aenta mai pidin, Tamol aŋ, tima! Am dodin ta mon anauwoi?#Apos 16:30; Luk 3:10 38Petrus pidin, Aŋ tulufunaŋpa adaŋsawoi, aŋ sebami dudumi anau apanip asop aupasek suasnenoi Jesus neanlon aŋ flanaŋoi. Meginmap aŋ Auanuzgun suzuzum aŋalewoi.#Apos 3:17–19; Luk 24:47 39Inan blani paneknen me aŋnamilakoi nami nunumigaz nadin mai, aenta daŋan dal makaiu demadodime me nadin maiime.#Joel 3:5; Jes 57:19 40Azu aenta zen mailon i seseŋana bebana mai, ibol, Aŋ anau apanip tamolpain sladin ilonlon aŋ titiziaŋ ŋiliaŋoi.#Deut 32:5; Fil 2:15 41Me i inan azu dagom deŋalelak denau depani maig i deflana. Nal melon tamolpain 3000 i mai detemana.
42I bubudin gegaundaŋan apostel nadin azu dab depani, i maig medaeŋ taimon demade, sepalaŋ dubufate, dogodoani mai.#Apos 20:7; 27:35 43Tamolpain dududin dizutge demade, apostelgazlon maŋaumaŋau bagoz mai didu. 44Ladinlon maliklak me daŋan bubudin taimon demade, nadin abaŋoi ta inag e so ibol.#Apos 4:32 45Nadin um, ab abaŋ daŋan didad ile, waizlak me dewae dipinidin. 46I nal daŋan tempellon ladin taimon detemanig demade, ab talon aentalon mai sepalaŋ dubufate.#Apos 2:42; 27:33 47Bubudin jaundaŋan dibini didug mailon nadin anaŋ diani. Tamolpain iwoi gauai e diboldime. Ujanzen bo nal daŋan aenta itataz iŋalime, mai medaeŋlon inau itemana.#Apos 4:4; 5:14; 11:21; 14:1
Currently Selected:
Apostel Sai 2: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
