Apostel Sai 1
1
Gaten
1O Teofilus, ŋa get sai ta ŋepanolak, abaŋabaŋ Jesus inaulak azu ibollak me mai,#Luk 1:3 2sai ŋanig ileg i Auanuzgunlon apostel pilianag kibiai pinidinlag i didlon imulge ilemeg geg.#Luk 6:13 3Inan alannauk binilag i meladinlon itasese itaseleg denasi, nal forti zidinnen itaseg Anut kiŋdom inan fun flale.
Jesus meglaum kibiai blani panek mai pinidin
4I meglaumgaz mai demademeg kibiai pinidin ibol, i Jerusalem so dibiniwoi, tea, i melon abaŋ Mam blani pinidinlak me malan denaup demadowoi. Ibol, Ŋa get aŋ azu menen ŋepanaŋlak megin.#Joh 15:26; Luk 24:49 5Johanes i get nazlon flanek inau, ge nal taitai binip aŋ Auanuzgun flanaŋoi.#Mat 3:11 6I maig demadelak me sodoz depani dibol, Tamoluja, o saen elon Israel inan kiŋdom faun sedage mugoi tat?#Luk 24:21; Mat 6:10 7I pidin, Aŋ saen aur me mai aloŋoi so abol mon, me Mam i Ujanzen siben taimon i inan tiwondaŋan nal me nean inaulak ienime.#Mar 13:32 8Ge aŋ Auanuzgun fomilak idu isop aŋ tiwomidaŋanoi; meginpe aŋ ŋainag sigianektamol Jerusalemlon, Judea fatulon Samarianen mai, fatu wadannen daŋan mai atozpa fug aflalewoi.
Jesus didlon ile
9I megin ibol binilag i denasi i bise egin itase, meladinlon timtaen idug ŋaleg ile.#Mar 16:19; Luk 24:51 10Meglaum didlak ditadge delalemeg demade. Anasi, tamol azugen jamel kebazadindaŋan i maig ditiuz,#Luk 24:4 11me dibol, Galileawain, aŋ dodin elak didlak atadmeg itiuzame? Jesus me gazo naminenge ŋaleg didlon ile, me mok gazo ilelak egin, megin mon gazop imulpa isowoi.#Luk 21:27
EKLESIA FUN JUDEA FATULON, 1:12–7
Meglaumgaz pain mai Jerusalemnen demade
12Did demadelak i nean Gazeŋdid me iziknen, uboulon dilanen iduse, Jerusalem muzinnen ienime, menge Jerusalemnen dimulge dile.#Luk 24:50, 52, 53 13I panulon didug ablak diduse, galuŋ aten latnenlak ienime melon diduleg demade, me: Petrus, Johanes, Jakobus, Andreas, Filipus, Tomas, Bartolomeus, Mateus, Jakobus me Alfeus inan ai, Simon Selotes, Judas i Jakobus inan ai.#Luk 6:13–16 14Me detemanig daŋan bubudin taimon dogodoanimeg demade. Pain tata, Maria, Jesus tinan, mai Jesus inan taingaz maig demade.#Apos 2:1; Joh 7:3, 5
Judas Iskariot naon apostel faun dipiliani
15Nal menen talon Petrus meglaum leŋadinlon imaisge ibol (demadelak me 120), 16Tamol, taiggaz, Judas i agez me Jesus diabilak nadin dal peteŋaneknen inaulak, iwoi get Auanuzgun Dawid auanlon ibollak me daŋan niŋon inaup iduwoi.#Kan 41:10; Luk 22:27 17I bo id maig temade taimon, id mai totol madowoi pilianilak. 18I gaŋmalan so talilaklon tan ta idadlak, ge i ibal idug loan tezepale, teŋaen daŋan walig idu.#Mat 27:3–10 19Jerusalemnen demadodime me daŋan diloŋ. Mewoi nadin azulon tan me nean “Akeldama” deblani, me poalek: Daznen tan. 20Dawid inan kanam buklon gazek egin ien, Inan madokaben fuzai inauwoi, tatata melak so madowoi. Gazek aenta, inan totol uzat ta inalewoi.#Kan 69:26; 109:8 21Mewoige tamol enen ta tipilianiwoi, i id maig saen melon id Ujanzen Jesus maig tatozse tatozlemeg temadelak;#Joh 15:27 22me funlonge Johanes inan flaneklonge nal daŋan Jesus id naodnen didlon ŋaleg ilemeg id maig temadelak me ta id mai Jesus inan tiziauoi azu sigianek iboloi.#Luk 16:16; 23:5 23Meginge i azugen denau, ta me Josef i Barsabas mai deblanidime, inan nean ta Justus, tamol ta mai nean Matias, i auzun se denau. 24Dogodoanimeg dibol, O Ujazen, bubudin daŋan uloŋ pasilak, o peteŋanamapa azugen enen it o pilianilak,#Joh 2:24, 25; 6:70 25me am maip uzat anaup apostel madowoi, i Judas me inan aben ban ilawoi sazizlak abenlon madowoi. 26I titititi denaug Matias deŋale. I mug apostel elewen mai detemana.#Met 16:33
Currently Selected:
Apostel Sai 1: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
