Apostel Sai 16
16
Derbe, Listranen ditoz. Timoteus
1Alouge i Derbenen Listranen maig itase. Men meglaum ta made, i nean Timoteus, Judapain ta inan ai, pain me Jesus ilonlon malik; ge taman me Grikwain.#Apos 17:14; 19:22; Tim II 1:5 2Taingaz Listranen Ikonianen mai iwoi gauai e dibol.#Apos 6:3 3Paulus i me ŋaleg maip ditozoi dadom inau. Mewoi iŋale, Juda fatu men demadodimelakoi, i tininlon muluŋ jabi; Juda daŋan diloŋlak inan taman i gob, mewoi.#Gal 2:3
4Panupanu duzig dilemeg ladinlon maliklak me dipidin, i kibiaiŋ, me apostel matugaz mai Jerusalemnen nean denaulak, duzi depaniwoi.#Apos 15:23–29 5Meginge medaeŋgaz ladinlon maliknenoi dud dipinidinge, nal daŋan subuŋan aenta i mai detemana.
Prigia Galatia fatu Troas panu mai
6Dilemeg Prigia Galatia fatulon mon ditoz, Auanuzgun pizianalakoi, i Asia fatulon faun azu so diboloi.#Apos 18:23 7I Misia fatu sizizlon ditasemeg Bitinia fatulon dilawoi denau, ge Jesus inan Uz noadin dal fale, so dilawoi. 8Misia fatu digeg mon dilemeg Troasnen ditase. 9Tidom melon Paulus malan nitun jaze: Makedoniatamol inasi, me i naonnen itiuzge igod, Daiapa Makedonianen en usop titiziama ŋiliamapŋan!#Apos 11:5; 18:9 10I me ienminlon nasilag buntaimon lamalon isisikge Makedonianen alawoi. Am lamalon malik aloŋ, Anut am wigiamalak, men alap totol gamun ipidinoi.
Makedonianen dejaua: Filipi panu
11Meginge Troasnenge ajauag tiduk aleg nui Samotaka laŋten abal, boŋanip egin Neapolisnen adu. 12Menge Filipinen ale, me Makedonia fatu gatenpanu, Romgaz panu me deŋalelak. Panu melon nal taitai amade. 13Juda uboulon am panu muzinnen naz paluime melon adug ale. Men Juda nadin godoanek aben ienime. Amatal adug pain diselak men detemanig am azu ipidin.#Apos 13:14; Luk 4:20
Lidia
14Azu diloŋdimelak leŋadinlon pain ta made, i Anut dagom panilak, i nean Lidia, i jamel dadeŋpain, Tiatirawain. I Anutoi izut. Ujanzen inan buben ifuelak, Paulus azu ibolge i dab paninen iloŋ.#Joh 6:44 15Alouge i mai inangaz daŋan mai flanalakge seseŋanamag ibol, Aŋ ŋawoi Ujanzen inan dagompain iloglon maliklak e aboltap asop inag ablak adusap ŋa maip temadowoi. Alawoige i gauz pizianamag i maig amade.#Mat 10:40; Luk 24:29
Kiaipain. Paulus Silas mai sebaneklon
16Nal ta am dal uzig alemeg godoanek inan abenlon alawoige begabegpain ta ise, i kiai inan uzdaŋan. Inan kiainauklon inan gatengaz naon gauz deŋale.#Apos 12:13; 19:24 17Pain me Paulus am maig zumag atozmeg ibobmeg ibol, Tamol e Anut Ujanzen inan totol, i putumi isanen dal aŋ peteŋanaŋdime.#Mar 1:24, 34 18Nal kuzum megin inau. Mewoi Paulus ilon bebazeg idaŋseg buga me ipai, Ŋa Jesus Kristus neanlon o ŋepao, o pain e seflalewoi. Mug pain ibinig itaseg ile.#Mar 16:17
19Inan gatengaz denasig kiainauk naon mug bini, i Paulus Silas maig diŋalge betenaekabenlon fatu inan kibiaipanekgaz noadinnen denau.#Apos 19:25 20Men kiapgaz noadinnen denaug dibol, Tamol e inad panu dukubulidme, i Judawain.#Apos 17:6; Kiŋ I 18:17 21Kagin diboldime me am Romwain aloŋ aŋalep uzi apaninen teabe. 22Tamolpain pifoldaŋan dimaisge segazadin isa. Meginge kiapgaz mai dibolge tamolpain i diŋal, nadin jamel detatazge dipas, difuwoi dipidin.#Kor II 11:25; Fil 1:30; Tes I 2:2 23Difu kuzumge sebaneklon dufunata. Inan gaten depai, i aben gegaunlon inaup tizina gauaioi. 24Dibolge i iŋalge sebanek bisonlon inaug ifunata. Niedin pinek jalon ipin.#Apos 12:6, 10
Sebanek tizinek
25Tidom loanlon Paulus Silas mai dogodoanimeg Anut inan kalel diabi. Sebanekai aenta maig diloŋge dab depani. 26Buntaimon mim metalun zen idug sebanek inan bag daŋan gedegadag detapas, ab gojose gojolemeg dalauan daŋan purufueg ipas. Sebanekai daŋan depaulak ŋuzuŋaz siben tefalokge sazo dibolge didu.
Sebanek tizinek idaŋse
27Sebanek tizinek ien zazouge bubula imaislag dalauan fueg dienmeg il, inan sebuzi zugusi ŋaleg siben tinin bedaniwoi ibol; sebanekai daŋan diau pasi tat ibol, mewoi.#Apos 12:19 28Ge Paulus ibob kekauk, O sibe alan ta so nuo mon, am daŋan elak amadoame! 29Lampoi ibolge sebanek galuŋlon sisug idu, tinin terere ibolmeg Paulus Silas mai niedin funlon ibal idu. 30Uzimeg idauzig beŋten didug ibol, Tamolujami, ait mon ŋenaup ŋa patug isap ŋemadowoi?#Apos 2:37; Luk 3:10 31I dibol, O Jesus Kristus ilolon malikmap o, oinagaz maip putumi isap amadowoi!#Joh 6:29 32Meginge auzun i siben mai daŋan inan ablon demadelak mai Ujanzen inan azu dipidin. 33Tidom melon mon iŋalge nadin bililit iflana. I inangaz maig inau pinidinge, flanekoi ibolge deflana. 34Meginge iŋalge inan galuŋlon idauzig tuz inau pinidin. Inangaz daŋan i mai zigiameg demade, mug mai Anut ladinlon maliklakoi, mewoi.#Kan 23:5
I auzun pasi dipinidin
35Bomonge kiapgaz mai totol denauge sebanek tizinek depai, Tamol azugen me upaspa dilawoi. 36Sebanek tizinek me Paulus ipaig ibol, kiapgaz mai totol denaug ise, aŋ ŋipisiaŋoi; mewoi aŋ tapas adup segauz alawoi! 37Ge Paulus me pidin, Luluai tultul mai i am kin so sidiziamalak, se mok mon dufunumawoi, sebaneklon noamawoi dibolge denau. Am bo Rom mezaumalakge megin donoamalak, gazo i am jamumle egin noamap alawoi dibol? Tea mon tea! I sebadin disop am duzumawoi, me iduse.#Apos 22:25 38Totol auan me deŋaleg luluai tultul mai dipidin. Diloŋge i mai Rom mezaudinlak i gauz dizut.#Apos 22:29 39I diseg azu bodok dipidin, ladin padaloi dibol; sebaneklonge didauzig digod, i panu me dibiniwoi.#Mat 8:34 40Paulus Silas mai sebaneklonge ditaseg Lidia inan ablak diduse. Men taingaz dilge debebana, i ladinlon maliknenlon segatip demadowoi. Meginge panu dibinig ditaseg dile.
Currently Selected:
Apostel Sai 16: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
