Apostel Sai 15
15
Paulus Barnabas mai pusaipusai
1Judeanenge kris taitai Antiokianen diseg i taingaz pidinge dibol, Aŋ Moses kaginlon egin muluŋ so anasimap aŋ putumi isap so amadowoi.#Gal 5:2 2Paulus Barnabas mai tamol e mai pusaipusai, azulon zen nug paipai. Mewoige taingaz Paulus Barnabas mai medaeŋgaz taitai mai Jerusalemnen denaug dile, abaŋ mewoi apostel matugaz mai dikibiaioi.#Apos 11:30; Gal 2:1
3I dimaisge dile. Medaeŋgaz taitai i me kin didauzi dallak denau. Dilemeg i Foinika fatu Samaria fatu mailon dal duzig ditoz, gobgaz didaŋselak me dallak taingaz sai dipinidin. I me diloŋmeg daŋan gauz zigia.#Apos 8:14, 25 4Jerusalemnen ditasemeg medaeŋgaz, apostel matugaz mai Gauai mok asie! dipidin. I auzun sai dipinidin, Anut inadin uzatlon abaŋ ujan inaulak me.#Apos 14:27 5Ge taitai i get farisea medaeŋlon demadelak, alouge maig didaŋseg Jesus ladinlon maliklak, i auadin taletalemeg dibol, Tea, i get muluŋ denasip Moses inan kibiaiŋ mai duzi depaniwoi, megin tipidinoi me gauai.#Apos 11:2
Kris faunoi kibiaik ujan Jerusalemnen
6Mug apostelgaz matugaz mai mewoi dikibiaioi medaeŋ ujan detani, azu tezepasek ta diboloi. 7Azu kuzum dibolse dibolle, so tezepasi gauai. Meginge Petrus imaisge pidin, O tamol, taiggaz, aŋ aloŋame, Anut get aŋ leŋamilon ŋa pilianaglak gobgaz inag auaglon totol gamun diloŋoi, maip ladinlon malikoi.#Apos 10:44; 11:15 8Anut i buben boboloanekkamaŋ, siben inan azu sigianilak, i me mai Auanuzgun pinidin, id get teŋalelak egin.#Apos 1:24; 11:17 9I mai nadin ladinlon maliknenlon nadin bubudin kibinelag, melon taloŋ, i siben id mai i mai dal ibeniben noadlak.#Apos 10:34 10Aitoige aŋ gazo Anut kibianiwoi, meglaum fodinlak joazeknen muzuan pinidinoi, me inad mamgaz id sibed mai get tejauaznen so mok taloŋlak!#Gal 3:10; 5:1; Mat 11:30 11Tea, Ujanzen Jesus inan kanimlon id patud pasiwoi taboltame, i dal megin mon mai.#Gal 2:16; Ef 2:4–10 12Mug daŋan auadin kati dibol. I dadon isag Barnabas Paulus mai auadin dab mon dipinidinge demade, me i maŋau kubelbagoz Anut i nimadinlon gob leŋadinlon inaulak me sai dipinidin.
13I dibol dibinilag Jakobus imaisge ibol, Taiggaz, inag auag dab apani!#Apos 21:18; Gal 2:9 14Simon sai panadlak, malanmalanlon Anut siben dodin inaulak, gob ilonlon inan neanoi tamolpainbadim iŋaloi.#Apos 15:7–9 15Me profet auan mai iduse. Gazelak egin:#Amos 9:11, 12 16Gazop faun ŋamulpa ŋaduwoi, Dawid inan tazas ibal idulak faun ŋesasewoi, boiboi samoilak faun ŋesegagewoi.#Jer 12:15 17Meginmap tamolpain aenta Ujanzen debezaniwoi, ŋan me gob daŋan fodinlak inag neag blanig ienime, 18megin Ujanzen ibolime, i me daŋan inauime. Get monge abaŋ me boboloanig ienime.#Jes 45:21 19Mewoi ŋabolŋame, id me goblonge Anut izinnen didaŋsadime joazeknen muzuan so pinidinoi. 20Tea, id mon gazep tipinidin, i ewoi mon tinin pizianiwoi: tibud janauk dazuk, jait, dazuk bofazilak, dazuk desaelak inan daz mai meme mon so dianiwoi, megin mon tipidinoi.#Gen 9:4; Lew 3:17 21Saen get moklonge panupanu daŋanlon Moses inan sigianektamol aenta demadelak, uboulon ubouab daŋanlon inan kibiaiŋ dusutidimelak.#Apos 13:15, 27
Kibiailak me nean denau
22Mewoi apostel matugaz mai i medaeŋ mai auadin taimon dibol, i leŋadinlon tamol tata dipilianiwoi, i Paulus Barnabas maip Antiokianen dilawoi. I Judas, inan nean ta Barsabas, Silas mai, i auzun taingaz leŋadinlon biŋadindaŋan, denauge dile. 23Leta mai degaze dipinidin, egin: Am apostel matugaz mai aŋ, nama timagaz, goblon Antiokianen, Sirianen, Kilikianen amadoame tabei apanaŋame!#Apos 15:41 24Am aloŋlakoi am leŋamalonge tata ziminen dilelak me am kin so mok ipidinlak, sebadin noadin mon dile, nadin azu aŋ lami gauz ikubulilak.#Apos 15:1 25Mewoi auan taimon nean anaulak, tamol kumeknen ipilianawoi, i Barnabas Paulus mai, i nama wezadingaz ziminen dilawoi. 26I auzun inad Ujanzen Jesus Kristusoi wagai denaulak, nadin nutudin nimadinlon mon bezaulak. 27Am mewoi Judas Silas mai anauge diladime, i auadinlon aŋ nama azu aloŋoi. 28Auanuzgun am mai nean anaulak, aŋ joazeknen aenta so panaŋoi, e mon aŋ dab apaniwoi:#Mat 23:4 29tibud janauk dazuk, dazuk saelak inan daz, bofazilak imat, jait mai me mon azezeŋanawoi. Aŋ menenoi tinimi pizianimap aŋ gauai anauame. Gauai amaduo!#Kor I 10:7, 8
Judas Silas mai Antiokianen
30Totol me medaeŋ inauge dileg Antiokianen ditase. Men medaeŋgaz detemanig leta me dipinidin. 31I me dusutilag ladin ŋaleknen azuoi zigia. 32Judas Silas mai profetlakoi sebadin mai taingaz azu kuzumlon debebana, segatek dipinidin.#Apos 11:27; 13:1, 15 33Saen ta i maig demadelag taingaz i faun denaug dadom pinidinge apostel zidinnen denaug dimulge dile. 34Silas bo men madonen nean inaumeg made. 35Paulus Barnabas mai Antiokianen uzat denau, kagin depeteŋana, aenta kuzum i auzun mai Ujanzen inan azu dipidin.
Paulus totol uzatoi itoz mug, Silas maig duzi
36Megin demademeg Paulus i Barnabas ipai, id get tatozlak panupanu azu pidinlak, men faun talap taidgaz tailoi, i dodin tat demadodime.#Tes I 3:5 37Barnabas i Johanes, nean ta Markus, i maip dilawoi ibol.#Apos 12:12, 25 38Ge Paulus ibol me gauai tea, get Pampilianen i ibinlak, i maig uzatlon so dilelak.#Apos 13:13 39Abaŋ mewoi i auzun gauz dupusai, mewoi ibeniben dile. Meginge Barnabas i Markus ŋale, auzun Kiprosnen dejaua. 40Ge Paulus i Silas piliani. I auzun taingaz Anut kanim paenlon denaulag dileg ditoz.#Apos 14:26 41I Siria fatu bisonlon ile, Kilikia fatulon itase, medaeŋ daŋan i segatek ipinidin.
Currently Selected:
Apostel Sai 15: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
