Tesalonika II 2
2
GAZEK INAN AZU BISON
Jesus inan imul isoknen me dodin?
1Jesus Kristus inad Ujanzen isowoi me id tetemanip i maip naon tazetazewoi, mewoi, timagaz, am aŋ godoanaŋame,#Tes I 4:13–17 2uz tawoi, azuoi mai sekauk denaug gazek am agazelak dibol, Ujanzen inan nal mug idu, azu e daŋanoi nami kankanlon so deladal mon, titij so anau mon. 3Ta dal tatalon aŋ se wiziaŋnen ibiti. Nal me get so iduwoi, mizpanek ujan me get iduwoi, aupasektamol, padalnen ai, me get itasawoi eginmap.#Tim I 4:1; Joh I 2:18; 4:3 4I abaŋ daŋan me id Anut taboltame, dagud mai tesebenaitame me i daŋeg isou itaseg madoime. I Anut inan ab gunlon matalime, i sibenoi sigianig Ŋa Anut e ibolime.#Dan 11:36
Nadin totol get pidinlak
5Ŋa aŋ mai temademeg ŋa azu e ŋepaiaŋlak me lami isouime? 6Abaŋ me gazo pizianiime aloŋ, me i inan saenlon beŋten itasaime. 7Kibiaiŋ uzi panek tealak me fun so taloŋ gauaige mug uzat inauime, ge ta me i pizianiime i gazo madoime liluŋlon auan pasimap eginmap.#Apos 20:29; Tim I 3:16 8Saen melon kibiaiŋ uzi panek tealak me beŋten itasawoi, Ujanzen Jesus inan auan funip imatoi, beŋten itasap isemaplon pitiŋiniwoi.#Jes 11:4; Bo 19:15, 20
Aupasek bibian itasawoi
9Kibiaiŋ uzi panek tealak inan isoknen me Satan inan nauknauklon tiwon ujanlon bagozlon, maŋau sekauklon,#Mat 24:24; Bo 13:11–13 10sewozaik salanlon mai, iwoi i padal diladime me azu malik ladin depaninen dimoi, putudin pasinen mai dimoilakoi.#Kor II 2:15; 4:3 11Mewoi Anut i zegaik ujan inaug pinidin, me i azu sekauk ladinlon malikoi.#Rom 1:28; Tim II 4:4 12Meginpe i daŋan bitiniap ibitoi me i azu malik ladinlon so maliklak, ge kagin taoz tealak mewoi ladin ienlak.#Rom 1:32
Pez panek bebanek mai
13Ge am sansan aŋoi Anut pez apani mokoi, timagaz, Anut inan bubengaz, Anut i funlon pilianaŋlak aŋ Uzgun inan taoz nauklon, azu malik lamilon maliknenlon mai putumi pasiwoi.#Tes II 1:3; Ef 1:4; Tes I 2:13 14Mewoi i aŋ mai nama totol gamunlon wigiaŋlak, aŋ inad Ujanzen Jesus Kristus inan kubel aŋalewoi.#Rom 8:30 15Meginge, timagaz, segataŋpa, sai apanaŋlak, auamalon tat, gazeklon tat, me abip gegaun.#Tes II 3:6; Kor I 11:2, 23 16Ge inad Ujanzen Jesus Kristus siben, Anut Tamad mai, me ilon id panadge tansaek dedeŋanipnen suzuazouknen gauai mai, kanimlon panadlak,#Tes I 3:11–13 17ŋan i nami bubumi tansaek panipe, nauknauk gauai daŋanlon, azulon mai fenanaŋ gauaioi.
Currently Selected:
Tesalonika II 2: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
