Korint II 5
5
Tinin imatnen basnen mai
1Am aloŋ tannen tazas gazomnen amadoame me sebazimap am Anutlon ab tadaŋan me nimanlon so inaulak, tea, dedeŋaneknen, didpanulon ienime.#Hiob 4:19; Pet II 1:13, 14 2Tazas elon, malik asagaiame, didnen ab unulawoi kumeame. 3Meginpe unulap niŋoma mon so nesamawoi. 4Tazas elon muzuan funumag amademeg asagaiame, pisisekoi lama so ibolime, tea, unulawoi mewoi. Meginpe basnen me mateŋ inan abaŋ teŋaliwoi. 5Ge me abaŋ ewoi noamalak me Anut, me i Uzgun nitun am penamalak.#Kor II 1:22; Rom 8:16, 25; Ef 1:13, 14
Anut inan dagom didpanuoi dejateg demadodime
6Mewoi am sansan sililig amadoame, am aloŋame, am tinimalon amademap am Ujanzen izinnen so amadoame.#Heb 11:13 7Am lamalon maliknenlon atozamelak, naseklon tea.#Kor I 13:12 8Ge am sililig amadoame, tinima e bo binip Ujanzen maip amadowoi bubuma ajateame.#Fil 1:23 9Mewoi am namanen amademap, tea, panu talon atozmap, Anut am‐oi gamun funi mewoi abezaniame.#Kan 39:13 10Id daŋan Kristus inan betenaeknen pezatiu naonnen boboloanadoi, id dadodado tinidlon temademeg tenaulak naon teŋalewoi, me gauai tat, salan tat tenaulak.#Apos 17:31; Rom 2:16; 14:10
Id Kristusoi tazutoi, ilod mai tepaniwoi
11Mewoi Ujanzenoi azutnen aloŋmeg am tamolpain taltal ipinidiname, ge Anut fuma iloŋ. Me aŋ mai kakadlon aloŋ mewoi ŋusuzuazouŋame. 12Am sebama faunte noaminen biŋama so ibisaame, tea, am aŋ miziaŋame, aŋ amoi zigiaŋoi, meginpe aŋ i ipidinoi me tamol inan nauknaukoi mon biŋan dibisadime, ge bubenoi tea.#Kor II 3:1 13Am zen mok anaug gedagad egintap am Anutoi anau, am lamadaŋan anautap am aŋoi anauame. 14Kristus inan ilopanek me duzumaimelak, am abol lamalon malik mai, taimon i daŋanoi imat pasi, mewoi daŋan dimat pasilak. 15Es, i daŋanoi imat pasi, me i bas demadodime sebadinoi bas so demadowoi, tea, Kristusoi me iwoi imat pasilak fuŋunig imais mailak.#Tim I 2:6; Rom 14:7, 8
Kristuslon tamol faun inau muglak, Anut panupanuwain dadom pinidin
16Mewoi gazo geg, faunte am tamol tinin sinan dab so apaniwoi. Get bo Kristus tinin kagin ŋaleg itozlak am dab apani, ge gazo am i tamol kaginlon mon dab so apaniame. 17Meginge ta Kristuslon mademap i faun inau muglak, getnen me bini pasi, anasi, faun me itase.#Rom 8:1, 10; Gal 6:15 18Anut i abaŋ e daŋan fun, i Kristuslon sibenoi dadom penamalak, dadom panek uzatoi am mai totol penamalak.#Rom 5:10 19Ŋan megin, Anut i Kristuslon madeg panupanuwain i siben mai liluŋlon dadom inaug, nadin aupasek so isuta pinidinge dadom panek inan totol penamag am itiziniwoi ibol.#Rom 3:24, 25; Kol 1:20 20Am Kristus naon aŋalge totol uzat anauame, Anut i amlon inan azu inaug ilaime. Am Kristus abenlon apaiaŋame, aŋ Anut mai dadom anau.#Jes 52:7; Joh 8:46 21I me i aupasek so iloŋlak idoi inaug i aupasek, meginpe i‐lon id noadpa Anut inan taoz tenauwoi.#Heb 4:15; Gal 3:13; Kor I 1:30; Fil 3:9
Currently Selected:
Korint II 5: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
