Tesalonika I 5
5
Kristus imul isoknen saenoi demazazoi
1Ge timagaz wezami, saen aur maiwoi am aŋ letalon faun azu ta agazep panaŋnen teabe.#Mat 24:36 2Aŋ sebami kabe aloŋamelak. Ujanzen inan nal ponaubibian tidomlon egin doloanadoi.#Mat 24:42–44; Pet II 3:10; Bo 3:3; 16:15 3Saen melon tamolpain dibolmap, Gazo mazoz toanadime, kaboŋlon egin dod temadotame! Ŋan melon buntaimon mok abaŋ alan i doloanawoi, pain aidaŋan inan nal pisinimap, izoznen tezepasig toaniime megin, melonpa so tuzugusawoi.#Mat 24:39; Joh 16:21, 22 4Ge aŋ, timagaz, aŋ mafuzlon so atozame, mewoi nal e ponaubibian egin bezeteŋanaŋnen teabe; 5aŋ daŋan sul nanungazlak, ad nanungaz mai. Id mafuz mai tukan mai nadin badin teabe.#Rom 13:12; Ef 5:8 6Mewoi i aenta egin so tadozoi, tea, id temazazoi, kukuaiwoi mai. 7Me i didozdimelak i tidomlon didoz, me i aiu sinanlon gedagad, i tidomlon gedagad. 8Ge id, id ad nanunlak, id tukukuaip tatozoi, melon ilodlon maliknen, nugoi, ilod paninen mai inad dimui egin me patud pasekoi suzuazouknen me inad kemkitikat egin tunulap tatozoi.#Ef 6:14–17; Jes 59:17 9Anut idoi nean so inaulak, id inan buzun ban temadowoi, tea, id tetazek ŋalek Jesus Kristuslon teŋalewoi.#Tes II 2:14 10Me i idoi imat pasilak, mewoi id, id temazaztap, tea, get taen tepadaltap, id i maip papepapek bas temadowoi.#Rom 14:8, 9; Tes I 4:14 11Mewoi aŋ nug bebanaŋpa, ta i aenta dud panip segatiwoi, me aŋ gazo mug anauame, megin sebatewoi.#Juda 20
Medaeŋgaz i medaeŋgaten mai dodin ditozoi?
12Timagaz wezami, aŋ me i aŋoi uzat wagai denaudime i Ujanzen neanlon nami getami demadodime, i aŋ dal petenaŋanaŋmap bebanaŋdime, ŋan me aŋ biŋadin ibisawoi.#Kor I 16:18; Tes I 5:17 13Inadin uzatoi aŋ i lami gauai ipinidinpa. Aŋ sebami nug mazozlon mon atozoi.
Medaeŋgaten i medaeŋgaz mai dodin ditozoi?
14Batemeg am aŋ bebanaŋame, timagaz wezami, me i pufulag ditozdime, aŋ gauai ipidinpa, bubudin iaug demadodime me ladin aŋalewoi, magoz didulak me dud ipinidinoi, dadodadowoi aŋ lami naseknasekdaŋan mon amadowoi.#Tes II 3:15
15Aŋ dab anaup, ta i o alan nuolak, o i naon alan so anauwoi; tea, aŋ sebami nug atoznenlon anasip, aŋ abaŋ gauai mon anaup nug panipaniwoi, tamolpain aenta daŋanoi megin mon anauwoi.#Met 20:22; Rom 12:17; Pet I 3:9
Medaeŋgaz daŋan temanip nugoi ladin dodin diboloi? Ait mon dab depaniwoi
16Aŋ sansan zigieklon mon atozoi.#Fil 4:4
17Aŋ sededeŋanip mon godoaniwoi.#Luk 18:1; Rom 12:12
18Anaŋ daŋanoi aŋ pez apaniwoi. Megin Anut inan auan Jesus Kristuslon aŋoi ienimelak.#Ef 5:20
19Auanuzgun inan ja aŋ lamilon so sufuniwoi mon.#Kor I 14:30, 39
20Tata imugsap azu fun flalenen me aŋ so zezeŋana mon.#Kor I 14:1 21Tea, azu daŋan, abaŋ daŋan aŋ kibianiwoi, gauai me mon aŋalep abiwoi.#Kor I 14:29; Joh I 4:1 22Abaŋ salan fun ibeniben me daŋan mok aŋ abitoi.
Dadom nauk inan godoanek
23Ge Anut mazoz i siben aŋnami lami tezepasek gun inauŋan, nami uz, nutumi, tinimi mai inad Ujanzen Jesus Kristus inan imul isoknenoi tizinip nun teag ikok mok kibinep inauwoi.#Tes II 3:16; Heb 13:20 24Anut i aŋ wigiaŋlak, i buben malikdaŋan. I malik inauwoi.#Kor I 1:9; Tes II 3:3
Paulusgaz tabei dipinidindime; Anut kanim paenlon denaudime
25Timagaz, aŋ am‐oi agodpa.#Tes II 3:1
26Aŋ taidgaz daŋan musuk gunlon pez ipinidinoi.#Kor I 16:20
27Ujanzen naonnen aŋoi tikug ŋowoteg ŋepaiaŋŋame: aŋ leta e timigaz gun daŋan suti pinidinpa diloŋoi.#Kol 4:16
28Inad Ujanzen Jesus Kristus inan kanim aŋ daŋan toanaŋoi.
Currently Selected:
Tesalonika I 5: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
