Johanes I 2
2
1Aŋ ai kamo, mewoi azu e ŋegaze ŋepanaŋŋame, aŋ au so apasoi. Ge ta au ipasmap inad aned idunen ta Mam izinnen madoime, ŋan Jesus Kristus, i taoz.#Rom 8:34; Heb 7:25 2I inad aupasek naon inaulak, ge inad mon tea, tea, tamolpain daŋan nadin mai.#Kol 1:20; Joh 11:51
ANUT INAN KIBIAIŊ FUN, 2:3–17
Dagomgaz mon panupanu nadin Patunpaseknen diloŋ
3Id inan kibiaiŋ dab tepanimap id taloŋ id mug sibed i taloŋ. 4Ta ibolime i Jesus iloŋ, ge inan kibiaiŋ dab so ipaniime i sekaukwain, i ilonlon azu malik so ienime.#Tit 1:16 5Ge tata i inan azu dab ipanimap i ilonlon Anut inan ilopanek malik dadon isag ienime. Melon malik taloŋ id i ilonlon temadotame.#Joh 14:21, 23 6Ta ibol i i‐lon madoime, i Jesus itozlak egin mai itozoi.#Joh 13:15
Ta i tain ilon so paniime i mafuzlon madoime
7Bubeggaz, kibiaiŋ faun ta so ŋegaze ŋepanaŋŋame, tea, kibiaiŋ getnen aŋ funlonge medaŋanlak, kibiaiŋ getnen inan azu aŋ get aloŋlak.#Joh 13:34; Mat 5:17 8Ge ŋa faun te kibiaiŋ faun ta mai ŋegaze ŋepanaŋŋame, azu me i ilonlon, aŋ lamilon mai malik, mafuz biniimelakoi, lelaman malik me gazo nunutiime.#Rom 13:12; Joh 15:10, 12 9Ta ibol i lelamanlon madoime, ge inan tain zezeŋaniime i gazo e mafuzlon mon madoime.#Joh I 4:20 10Ta i inan tain ilon paniime, i lelamanlon madoime, lelaman melon siŋlon idulanen tea.#Joh 11:9 11Ge ta me i inan tain zezeŋaniime i mafuzlon madoime, mafuzlon itoz maiime, i domten ilaime me so iloŋ. Mafuz inan malan inau itaulakoi.#Joh 11:10; 12:35
Johanes aitoi gazek pinidin?
12Ai kamo, gazek ŋepanaŋŋame, nami aupasek Kristus neanoi paze idulakoi.#Kor I 6:12 13Tamaggaz, gazek ŋepanaŋŋame, aŋ me i funlonge madelak i aloŋlakoi. Gazek ŋepanaŋŋame, ai faungaz, aŋ i salanlak iwoi seŋanaŋlak. Aikamo, ŋa gazek ŋepanaŋ, aŋ Mam aloŋamelakoi.#Joh 1:1 14Tamaggaz, ŋa gazek ŋepanaŋ, aŋ funlonge imadelak me aloŋamelakoi. Ŋa aŋ ai faungaz gazek ŋepanaŋ, aŋ gugumi, Anut inan azu aŋ lamilon ienime, aŋ i salanlak iwoi seŋanaŋlakoi.#Ef 6:10
Ta i Anut ilon panimap i tealakgaz nadin kagin ilon paninen tea
15Tealakgaz nadin kagin abaŋ tanlak ienime mai lami so ipinidin mon. Ta i tealakgaz nadin kagin ilon paniime, i ilonlon Mam inan ilopanek so ienime.#Jak 4:4; Joh 5:42 16Tan inan abaŋ daŋan, tinin inan buben imaisnen, malan inan isinen, ŋagas temadonen mai me Mam i fun tea, tea, me tan inan fun.#Met 27:20 17Tannen abaŋ me biniime, inan malaisek mai, ge ta i Anut inan auan uzi paniime i dedeŋanip madowoi.#Mat 7:21
KRISTUS INAN DAŊEKGAZ, 2:18–28
Miz panekwainoi, peteŋanek sekaukoi tansaek azu
18Aikamogaz, e me saen wadan. Aŋ aloŋlak egin Kristus inan daŋek isoime, megin gazo Kristus inan daŋekgaz kuzum mug ditaselak. Melon id taloŋ saen wadan iduime.#Mat 24:5, 24; Kor I 10:11 19I id leŋadlonge ditase, ge i idwain tea, i inadpe me i id mai temadope. Ge i idwain tealak me beŋten itasawoi i dibinadge didu.#Apos 20:30; Kor I 11:19 20Gun i aŋ buzugusaŋlak, aŋ daŋan aloŋ.#Joh I 2:27 21Aŋ azu malik so aloŋ, mewoi gazek so ŋepanaŋŋame, tea, aŋ aloŋame, aŋ aloŋ mai azu sekauk ta azu maliklon itasanen tea.
22It sekaukwain, me i tea tat me ibol Jesus i Kristus tea? I me Anut, Anut Ai mai zezeŋanaime, i Kristus inan daŋek. 23Tata Anut Ai zezeŋaniime i Mam mai tea, ge i me Anut Ai sigianiime i Mamdaŋan mai madoime.#Joh I 4:15; Joh 5:23 24Azu aŋ funlon aloŋlak me lamilon ienlalonoi. Azu aŋ funlonge aloŋlak aŋ lamilon ienmap aŋ Anut Ai Mam mailon amadowoi.#Joh I 2:7 25E me blani panadlak, ŋan bas dedeŋaneknen.
26I me aŋ se duzaŋ alanoi iwoi ŋa gazek ŋepanaŋŋame.#Joh 14:26; 16:13 27Ge buzugusek i aŋ panaŋlak me bubumilon ienime, tata aŋ ao peteŋanaŋoi, inan buzuguseknen me abaŋ daŋanoi fun peteŋanaŋimelakoi, i me malik, sekauk tea. I aŋ peteŋanaŋlak egin i‐lon amado.#Joh I 2:20
NANUNGAZ MOK ME ANUTLON INAU MUGLAK, 2:29—3:24
Anut nanungaz, Satan inan nanungaz mai
28Aŋ ai kamo, i‐lon amado, meginpe i itasemap id tisililip temadowoi, i inan isonenlon mamai funadpa so da taboloi.#Joh I 4:17 29I taozlak me aloŋmap aŋ lamilon malikoi, tata i taoz itozime me Anut inaulak.#Joh I 3:7, 10
Currently Selected:
Johanes I 2: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
