Korint I 2
2
Paulus Korintnen dodin azu flale?
1Ŋa aŋ ziminen ŋalelag, taiggaz, ŋa azu gizaudlon, azu kaginkagindaŋan Anut inan totol so ŋepaiaŋlak.#Kor I 1:17 2Ŋa get ilog ibollak ŋa aŋ leŋamilon azu ta so ŋaboloi, Jesus Kristus, jakebazeklak zailak me mai mon.#Gal 6:14 3Ŋa bodokmeglon, zeznenlon, tinig terere ibolnen funfunlon mai aŋ ziminen ŋemade.#Apos 18:9; Gal 4:13; Kor II 10:1 4Ŋainag azu, fun flaleknen azu mai kaginkagin inan seŋaneknen azulon so ŋabollak, tea, Uzgun tiwon mai boboloaneklon.#Kor I 2:1 5Meginpe nami ilonlon maliknen tamolpain nadin kaginkaginlon so ienoi, tea, Anut inan tiwonlon.#Ef 1:17, 19; Tes I 1:5
Anut azu bo mai kaginkagindaŋan
6Ge tamolai gazoi me ilonlon am kaginkagin ipinidiname, tan inan saen tezepalek e inan kaginkagin tea, saen e inan kibiaipanekgaz depadaloi nean naug ienime me inadin mai tea.#Fil 3:15; Kor I 3:18 7Am bo Anut inan kaginkagin get so taloŋ gauailak, miŋianeklon mai ienlak me abolame, me tan inan saen so didumeg Anut i kubel panadoi get nean inaulak.#Rom 16:25; Luk 10:21 8Me saen tezepalek e inan kibiaipanek tata so iloŋlak, i diloŋpe i Ujanzen kubeldaŋan me so dezaipe.#Luk 23:34; Jak 2:1 9Ge gazelak, egin, abaŋ malan so nasilak, tiliŋan so iloŋlak, me tamol bubenlon so itaselak, abaŋ tata me Anut iwoi kibinialak me i Anut ladin depanidime.#Jes 64:3
Anut Uzgunlon inan kagin peteŋanadime
10Anut Uzlon id boboloani panadlak. Uz abaŋ daŋan sikilig kibianiime, Anut inan fun bunun mai.#Mat 13:11; Met 20:21; Mat 16:23 11It tamol inan kankan iloŋime? Tamol inan uz me ilonlon ienime me mon. Megin mon ta Anut inan fun mai so iloŋime, Anut inan Uz i mon iloŋ. 12Ge id tannen uz so teŋalelak, tea, id Uz Anut izinnenge iselak me panadlak, meginpe Anut abaŋ suzuzum ipanadlak me taloŋoi.#Joh 16:13, 14 13Abaŋ e am tamol kaginkagin azulon so abolame, tea, Uz peteŋanamalak me, Uz inan abaŋ me tamol Uzdaŋan flale ipinidiname.#Kor I 2:1, 4
14Ge tamol Uz tealak i Anut inan Uz abaŋ so ŋaleime, abaŋ gedagad ibol, i me iloŋnen lo tea, abaŋ me Uzlon mon taloŋtame.#Kor I 1:23; Joh 8:47; 14:17 15Ge me i Uzdaŋan i abaŋ daŋan betenaeime, tata i bo so betenaeime.#Joh I 2:20 16It Ujanzen inan kankan iloŋge i kibiai paniwoi? Ge id Kristus inan kankandaŋan.#Rom 11:34; Jes 40:13
Currently Selected:
Korint I 2: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
