Korint I 1
1
Tabei panek
1Paulus, Anut auanlon wagilak, i Kristus Jesus inan apostel madowoi, taid Sostenes mai. 2Korintnen Anut inan medaeŋ me i Kristus Jesuslon gun inaulak i aenta me aben daŋanlon idinad Ujanazen Jesus Kristus neanoi diwogdime me maip gun demadowoi wigidinlak, i inadin Ujanzen idinad mai.#Kor I 6:11; 12:13; Apos 9:14 3Aŋ daŋan Mam Anut Ujanzen Jesus Kristus mailonge kanim mazoz mai toanaŋ.#Rom 1:7; Kan 103:13
Paulus Anut pez paniime
4Ŋa sansan aŋoi Anut pez ŋepaniŋame, Anut inan kanim aŋ Kristus Jesuslon panaŋlak mewoi. 5Aŋ i‐lon abaŋ daŋanlon kagin subuŋandaŋanlak, kibiaiklon aloŋnenlon mai,#Kor II 8:9 6aŋlon Kristusoi sigianek segatilak egin.#Luk 17:30; Tes II 1:7 7Meginge aŋ idinad Ujanzen Jesus Kristus beŋten itasawoi malan anaumap aŋ Uzgun inan suzuzum tawoi, Am so aŋalelak e so aboloi.#Tit 2:13 8Tea, i me noaŋpa aŋnami saen wadanlon eginmap segatip amadowoi, aŋ idinad Ujanzen Jesus Kristus inan nallon peneŋanaŋnen teaboi.#Fil 1:6, 10; Tes I 3:13; 5:23 9Anut i buben malikdaŋan i siben inan Ai Jesus Kristus, idinad Ujanzen, inan peleŋanek amadonenoi iwigiaŋlak.#Rom 8:17; Tes I 5:24
MEDAEŊ INAN TOTOLGAZOI 1:10—4:21
Korint medaeŋlon malan ibeniben
10Ge taiggaz, ŋa aŋ idinad Ujanzen Jesus Kristus neanlon ŋeseseŋanaŋŋame, aŋ azu taimon abolpa, medaeŋ tezepalek mai aŋ leŋamilon so ienoi. Tea, lami kumek kankan mailon temanip amado.#Fil 2:3; 3:16 11Taiggaz, Kloe inangaz ta totol denaug ŋaloŋ, aŋ leŋamilon pesauŋ ienime. 12Mewoi ŋabol, aŋ dudumi abol, Ŋa Pauluswain, ŋa Apoloswain, ŋa Kegaswain, ŋa Kristuswain.#Kor I 3:4; Apos 18:24, 27; Joh 1:42 13Kristus i gusutilak? Paulus aŋoi jakebazeklak zailak tat. Aŋ Paulus neanlon flanaŋlak? 14Ŋa ilog gauai, ŋa aŋ ta so ŋeflanaŋlak, Krispus Gaius mai mon.#Apos 18:8; Rom 16:23 15Meginge tata aŋ leŋamilon so iboloi aŋ ŋainag neaglon flanaŋlak. 16Stefanus, inan samungaz mai ŋeflanalak, aenta ta mai ŋeflanilak me so ilog isou.#Kor I 16:15, 17 17Kristus i flanekoi so noaglak, tea, totol gamun fun ŋeflalewoi, kaginkagin inan azulon tea, Kristus inan jakebazek inan azu so lasenoilakoi.#Joh 4:2; Mat 28:19; Kor I 2:4
Totol jakebazekoi me azu gedagad, tamol aenta dibol
18Me depadaldime iwoi jakebazek inan azu me azu gedagad, ge idoi me patud pasiime azu me Anut inan tiwon.#Kor II 2:15; 4:3; Rom 1:16 19Gazelak ienime, Ŋa me ladin kaginkagindaŋan inadin kaginkagin ŋipitiŋiniwoi, me i maŋaudaŋan inadin maŋau ŋenaup teaboi.#Jes 29:14; Kan 33:10 20Me i ilon kaginkagindaŋan me ŋan? Gazekmaŋau me ŋan? Saen e inan azulon nug betenaebetenaedime me ŋan? Anut i tealakgaz nadin kaginkagin so tat buliseg gedagad inaulak?#Jes 19:11; Hiob 12:17 21Tealakgaz i nadin kaginkaginoi Anut inan kaginkaginlon Anut so diloŋlak, mewoi Anut inan buben uzig azu am aflaleame inan gedagadlon ŋan i me ladinlon malikdime me putudin pasiime.#Mat 11:25; Luk 8:12 22Judagaz bagozoi dibol, me Grikgaz i kaginkaginoi dibol.#Mat 12:38; Joh 4:48; Apos 17:18, 32 23Ge am Kristus jakebazeklak dezailak me fun aflaleame, me Judagazoi siŋ egin, Grikgazoi abaŋ gedagad,#Rom 9:32; Kor I 2:14 24Me bo me i wigidinlak, Judawain Grikwain mai, iwoi Kristus i Anut inan tiwon Anut inan maŋau mai inaug madoime.#Kol 2:3; Kor I 1:18 25Anut inan gedagad me tamolpain nadin kaginkagin nenaziime, Anut inan bodok me tamolpain nadin tiwodin nenaziime.#Kor II 13:4
Ujanzen inan medaeŋgaz dodin pilianalak
26Nami wagiŋoi lami kankan, taiggaz, aŋ leŋamilon kuzum tamol biŋadindaŋan noadinnen maŋau tea, kuzum tiwodindaŋan tea, kuzum tamol biŋandaŋan inan daz tea.#Mat 11:25; Joh 7:48; Jak 2:1–5 27Anut bo tannen abaŋ gedagad egin ipilianalak i tamolpain ladin kagin kagindaŋan mamai pinidinoi. 28Tannen abaŋ biŋan tea, abaŋ zezeŋanalak mai, es abaŋ so diendime me Anut pilianag i melon abaŋ diendime me teabnen pinidinoi.#Mat 19:30 29Meginpe tamolpain tata tanlak Anut naonnen siben biŋan so bisawoi.#Rom 3:27; Ef 2:9 30Aŋ I‐lonpa Kristus Jesuslon amadoame, me i inad kaginkaginoi, taozoi i maip kilianoi, patudpasekoi mai inaulak.#Kor II 5:18, 21; Joh 17:19 31Mewoilakoi gazelak me uziwoi, Ta i auan ujanime i Anutoi auan ujanlon iboloi.#Jer 9:22, 23
Currently Selected:
Korint I 1: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
