Matayo 19
19
Madahitso ga ndongwa tsa kulekana kwa munu na vake
Maliko 10:1-12
1Yesu hoavaga kusinda kulonga ndongwa itso, akawukaje kuhuma ku Galilaya na kubita ku muji gwa Yudeya mwambu gwa lulenga lwa Yolidani. 2Vanu wolofu vakamufwataje kuko, nayo akavaponetsaje. 3Vafwalisayo vamwe vakatsaje kwa Yesu ili vamujele, “Mbe, yin'ganika mulume kumuleka mudala vake kwasawuli ya lulongwa loluve hela?” 4Yesu akavajibulaje, “Mbe simukasomile mu Maandiko ga Mulungu kuta, kuhuma katali avawumbite munu mulume na munu mudala? 5Nayo Mulungu alontsile kuta, kwasawuli ya ihyo, munu akumuleka dade na yuve akihudikitsa hamwe na mudala vake, na ivo vavili vakuva muvili gumwe. 6Ihyo si vakuva vavili kaha, lechelelo vakuva muvili gumwe. Kwasawuli iyo cho achihudikitse Mulungu, munu alekaje kuchihudula.” 7Kaha Vafwalisayo vakamuputsaje, “Kwasawuli ya chichi Musa akalajitse munu amupele mudala vake baluva ya kumuleka mudala vake?” 8Yesu akavajibulaje, “Musa avadichilye mwileche na vadala venyu kwasawuli henye mulivatalamu kudahitsika. Lechelelo kuhuma hamutalo lulongwa ulo silwavaga hihyo. 9Heni ntsinguvalonjelani kuta munu yoyuve yo akumuleka mudala vake kwa lulongwa loluve na siyo kwa mbwiniyo tsa waafu, na kumutola mudala yunji akuva an'dita waafu.” 10Vadahitswa vake vakamulonjelaje, “Manyi lulongwa lwa kutolana luli ihyo, chiba munu ikale bila kutola.” 11Yesu akavalonjelaje, “Siyo vanu veka wo vafuluche kuludichila lulongwa luno, lechelelo wo vala ng'ani Mulungu wo avagavye. 12Kwasawuli vanu vamwe vaveye vachiliti kwasawuli valeliche hihyo, na vanji vadisilwe na vanu vave vachiliti, na vamwe valamwe vene vave vachiliti kwasawuli ya Wuntsajila wa Mulungu. Mwene yo akuvetsa kuludichila lulongwa luno aludichile.”
Yesu anguvatambichila vana vadodo
Maliko 10:13-16; Lukasi 18:15-17
13Kaha vanu vamwe vakamusindichilaje Yesu vana vadodo ili avavichile mawoko gake mumitwi jawo na kuvatambichila. Lechelelo vadahitswa vake vakavang'anulilaje vala vanu. 14Yesu akavalonjelaje vadahitswa vake kuta, “Muvaleche vana vadodo vatse kwa heni, mwalahogola kuvalemetsa kwasawuli Wuntsajila wa Mulungu wo wavala vanu wo vanakota vana vano.”
15Yesu akavavichilaje mawoko gake mwilanga mwawo, akawukaje hono hala.
Mukwamitsi yo avaga mufuchifu
Maliko 10:17-31; Lukasi 18:18-30
16Munu yumwe mukwamitsi yoavaga mufuchifu akabitaje kwa Yesu na kumuputsa kuta, “Mudahitsi muwuya, nditaje lulongwa lwachi ili mate wumi wugaya wudugo?” 17Yesu akamulonjelaje, “Mbona un'nyema heni kuta ntsi muwuya? Kuduhu muwuya lechelelo yumwe yo Mulungu ng'ani. Lechelelo manyi un'gana kuwupata wumi un'ganika ugahulikitse malajitso ga Mulungu.” 18Yula munu akamuputsaje? “Malajitso gachi?” Yesu akamulonjelaje, “Walahogola kukopola, walahogola kudita waafu, walahogola kuhitsa, wahogola kulonga wudesi, 19Uvahulikitsaje dado na yuwo na umuganaje muyago kota hila fyo ungigana heve.”
20Yula mukwamitsi mufuchifu akamulonjelaje Yesu, “Malajitso geka ntsigabite, lelo ndite chinu chachi kahi?”
21Yesu akamulonjelaje, “Manyi un'gana muwuya nachene, un'ganika ubite ukagutse finu fyako fyeka na magobole igo go ukugapata ukavapele vagayu, ihyo hohave ukuva na hachiba Kilanga kwa Mulungu na utse ufwate heni.” 22Yula mukwamitsi mufuchifu hoavaga kuhulika ihyo akawukaje kwa wususutalo kwasawuli avaga na finu fyolofu.
23Ihyo Yesu akavalonjelaje vadahitswa vake, “Ntsinguvalonjela wukweli kuta, kukuva na wutalamu kwa munu mufuchifu kwinjila ku Wuntsajila wa Mulungu. 24Ntsinguvalonjela kahi, kukuva na wupefu kwa linyama likomi lyolinchemwa ngamiya kupuluta mukanang'ana ka sing'ano kuliko munu mufuchifu kwinjila ku Wuntsajila wa Mulungu.”
25Vadahitswa vake hovavaga kuhulika ihyo, vakapomokaje ndalahela na kiputsa kuta, “Mbe, kwa lulongwa luno munu vachi yo akuvetsa kukuluka?”
26Yesu akavakangatsilaje miho na kuvalonjela, “Lulongwa luno lukuva lutalamu kwa vanu, lechelelo ndongwa tseka tsivaga mefu kwa Mulungu.”
27Kaha Petulo akamulonjelaje Yesu, “Ulave hetwe tulesile finu fyeka na tukufwatite heve, ino lelo tukupata chinu chachi?”
28Yesu akajibulaje, “Ntsinguvalonjelani wukweli kuta chipindi cha inyi ntsipya, hala Mwana va Munu ho akikala mu chigoda chake cha Wuntsajila cho chim'melema, henye yo mwamufwataga mukikala mu figoda kumi na fivili fya chintsajila, na mukutsihiga kabila kumi na tsivili tsa vanu va Isilaheli. 29Chila munu yo alesile nyumba awu vang'olotse mulume awu vadada awu yuve awu migunda kwasawuli ya heni, akwanuchila mala mya na kulutila, na akupata wumi wo wugaya wudugo. 30Lechelelo vanu wolofu wo valongola vakuva kuwudugo, na vanu wo vali kuwudugo vakuva valongola.”
Currently Selected:
Matayo 19: SBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Sagala Language @The Word for The World International and Sagala Language translation. All rights reserved.