Matie 9

Yeso oboo ekal

(Mak 2.1-12; Luk 5.17-26)

1Yeso osam onse ebɛɛ, otsiil nzal, bu ayɛn bviil e ndɛ#9.1 Bviil li aliaal ŋã, li Kapɛrnahum.. 2Etɔ oŋɔ̃, baal ayi ndɛ ye mbuul wu ekal wu áli bɔ nkal a ekal. Ŋ'emwɛn Yeso okiool o bɔ, ndɛ olieel mbuul ondɛ bubu: «Muaan a mɛ̃, kal ye mpɛn! Adzeel ãbi ã yɛ.» 3Ayiool b'ãngel ke kwɛ abvi bam-a-bam oyɛɛn bubu: «Ngaburu wu asiaan Nziã!» 4Onge bɛn Yeso otaal ãtsam m'ɛ̃kwal ɛ̃ bɔ, ndɛ olieel bɔ bubu: «Ndɔɔ mã yi eli byɛ y'ãtsam m'ãbi-ãbi? 5Ayɛɛn ndiri: “Adzeel ãbi ã yɛ”, oyɔ k'eli ndɔɔ yi mpal m'oyɛɛn wɛ, kɛn ayɛɛn ndiri: “Tɛɛn yi”, oyɔ ndɔɔ yi enduru mpal m'oyɛɛn! 6Ngesɛ, ebvaan byɛ eyɛɛ kwɛn Muaan a mbuul oli y'omfam b'adzeel ãbi me nsie yi.» Obobɔ, ndɛ wu Yeso olieel ekal okyɛ ndiri: «Tɛɛn, wal ekal e yɛ, bvool yi nzɔ!» 7Mbuul ondɛ hɛ̃ otɛɛn, bu ayɛn nzɔ. 8Ŋ'emwɛn baal obobɔ, bɔ buɔ obɔɔ, bu alweel Nziã wu owi baal omfam b'obobɔ.

Yeso oti Lebvi mbel

(Mak 2.13-17; Luk 5.27-32)

9Ŋ'ékebwel Yeso, ndɛ omwɛn mbuul wu awal mpal wɛn nkuũ Lebvi#9.9 Nkuũ Lebvi hɛ̃ Matie.#Mak 2.14-15; Luk 5.27. Ndɛ áli me nsɛn ke mboo a ndɛ yi ɔ̃sal. Yeso olieel ndɛ ndiri: «Luɛɛn a mɛ̃.» Lebvi otɛɛn, bu aluɛɛn a ndɛ.

10Tsoo ngelemɔ̃, Yeso ákedza onse nzɔ a Lebvi. Baal bibi b'awal mpal, ye baal b'ãbi akyam, ákedza ye ndɛ y'ayio a ndɛ. 11Afalisaye ayemwɛn obobɔ, bɔ alieel ayio a ndɛ bubu: «Ndɔɔ mã yi edza Mfam a byɛ ye baal b'awal mpal, ye baal b'ãbi?» 12Yeso ayoo obobɔ, olieel ndiri: «Baal ba kɛɛ-kɛɛ k'ali ye kɔɔ li ɔ̃boo wɛ, abieel b'ali ye kɔɔ e ndɛ. 13Eyefuul otsɛn b'ãndɔɔ m'ákel onse ɛ̃nkaan ndiri: “Mɛ̃ nzii osio o baal nyiĩ, k'ãkab wɛ.” Ke ngwel wɛ, mɛ̃ ke ngyi me ndɔɔ yi eta baal ba dzu mbel wɛ, be yenta mɛ̃ mbel, baal b'ãbi.»

Yeso oyɛɛn me ndɔɔ ãbuɛɛn mã me nzal

(Mak 2.18-22; Luk 5.33-39)

14Obobɔ, ayio a Dzaã ayefuul Yeso bubu: «Bee y’Afalisaye ebesa ãbuɛɛn mã me nzal ɛ̃nswɛɛl-ɛ̃nswɛɛl. Ke ndɔɔ mã yɛn ayio a yɛ k’abesa mɔ̃ wɛ?» 15Yeso bu abveel bɔ bubu: «Andoo b’ɔ̃baal ol’akal me mpiri ŋ'eli ndɛ kɛn ye bɔ? Kɛn ãtsoo ãkieel ãya m'ambaal ɔ̃baal onse bɔ. Obobɔ, bɔ akieel obee odza m'ãlio omɔ̃.»

16«K'eli ye mbuul wu abaan ekɔ ki tsɔɔn me mpɛɛl ekɔ ki enyiɔɔn wɛ. Ndɛ asa obobɔ, mpɛɛl ekɔ ki enyiɔɔn ol’embaal mpɛɛl ekɔ ki tsɔɔn. Pfee li ekɔ ki etsɔɔn bu eyii lam wuɔɔn. 17Emfa kiki, k'abekaal mbal m'ãlili onse ãmfel m'ãmaayiil wɛ. Asa obobɔ, mbal m'alili ol’ãbwel ãmfel omɔ̃: Ãmfel ol’ãbool, mbal bu ãtsɔɔn me nsie. Mbal m'alili, ebvaan alɔ mɔ̃ kɛn onse ãmfel m'alili, obobɔ ãmfel ye mbal, àkwɛɛ mɔ̃ mam mbueel ngesɛ#9.17 Awi otsɛn b'ãmboo omɔ̃ onse ɔ̃nkaan wa Luk. #Luk 5.33-38.»

Yeso oboo ɔ̃kaal ngɔmɔ̃ bvool oseel nsam ɔ̃kaal ngamɔ̃

(Mak 5.21-43; Luk 8.40-56)

18Ŋ'ékeliaal Yeso bɔ ãndɔɔ omɔ̃, pfa, mfam ngɔmɔ̃ oyi. Ndɛ obvi ãbuo ke nkwel a ndɛ, bu alieel ndɛ ndiri: «Muaan a mɛ̃ wu ɔ̃kaal otsuul mwĩi alili ŋã. Oŋɔ̃ ya, ndɔɔl ndɛ mviɔɔl, kwɛn ndɛ abvuul.» 19Yeso otɛɛn, bu aluɛɛn a ndɛ y’ayio a ndɛ wu Yeso.

20Ŋ'esa oŋɔ̃, éli y'ɔ̃kaal ngɔmɔ̃ wu áli y'ãluu m'ékepal ndɛ ãkel. Ãluu omɔ̃ ál'ãmaayiil ye ndɛ mvel kuun ye yuaal. Ndɛ oyi ke mbee a Yeso, onywɛn me nswɛ a ekɔ e ndɛ. 21Ke ngwel wɛ, ndɛ ákeyɛɛn ndyam-a-ndyam ndiri: «Okɛɛn mɛ̃ nywɛn kɛn a m'ekɔ e ndɛ, mɛ̃ olɔ mvuul!» 22Yeso atal mbee, omwɛn ndɛ, bu alieel ndɛ ndiri: «Muaan a mɛ̃, kal ye mpɛn! Okiool o yɛ obvuul yɛ.» Kɛn a me lio alili, ɔ̃kaal ondɛ obvuul.

23Ŋ'etɔ Yeso ke nzɔ a mfam ondɛ, ndɛ omwɛn baal b'ákefel ãnsiɛɛn ke ndwɔɔ ye b'ákesa nkyal. 24Ndɛ olieel bɔ ndiri: «Epal, ke ngwel wɛ nsam a ɔ̃kaal k'akwi wɛ, ndɛ twal alaal.» Kɛn a bɔ abvi ndɛ osyob. 25Ŋ’apaal baal nkwel-a-nzi, Yeso osam onse nzɔ, osiin nsam ɔ̃kaal me kuɔɔl, ndɛ bu asiool. 26Nsia oyɔ bu etsɔɔn m'etwi e nsie kyam kieel.

Yeso oboo baal buaal b'ékwi mviil

27Ŋ’embal Yeso oŋɔ̃, ɛ̃nkwa-mviil mviaal ɛ̃yii ɛ̃luɛɛn a ndɛ, bvool ɛ̃yii ɛ̃biool ndiri: «Muaan a David#9.27 «Muaan» wu ayɛɛn ŋã, ɔ̃tiɔɔl. , sio bee nyiĩ!» 28Ŋ'etɔ Yeso nzɔ, baal b'ɛ̃kwa-mviil o bɔ asyel tsotsoo a ndɛ, ndɛ bu afuul bɔ bubu: «Byɛ ekiool wɛn mɛ̃ nkoo k'esa obobɔ?» Bɔ akiool ndiri: «Hɛɛ̃, Mfam!» 29Obobɔ, Yeso osiin mviil ã bɔ, bu alieel ndiri: «Yɔɔl kwɛn asa byɛ ãndɔɔ m’emfa ki ekiool byɛ.» 30Ɛ̃kiri-anka oŋɔ̃, mviil ã bɔ ãdzweel nzuru. Yeso bu awi bɔ ãnkunkwa ndiri: «Mbuul ndɔɔ oyɔ oyɛɛ wɛ.» 31Kɛn a ŋ'epal baal obɔ onse nzɔ, bɔ atsal nsia a Yeso m'etswi e nsie kieel.

Yeso oboo nkɛn

(Luk 11.14-15)

32Ŋ'eyii eyi bɔ, ayi a Yeso mbuul wu áluul m'ɔ̃fel wu ɔ̃bi-ɔ̃bi wu ákesa kwɛn ndɛ k’ákeyɛɛn wɛ. 33Ŋ'etswɛɛl Yeso ɔ̃fel wu ɔ̃bi-ɔ̃bi, mbuul ondɛ obvi oyɛɛn. Baal akam bvool ayɛɛn ndiri: «Ndɔɔ yi bubu, lɔɔ-okal kɛn emwɛn yɔ m'Isalayɛl wɛ!» 34Kɛn Afalisaye ayɛɛn ndiri: «Ndɛ abetswɛɛl ɛ̃fel mi ɛ̃bi-ɛ̃bi me waan e mfam a myɛ̃!»

Yeso y'embuul e baal

(Mak 6.34; Luk 10.2)

35Yeso ákedzuu m'ãla y'ãbviil mbueel, ndɛ ákeyiool m'ãnzɔ m'ãbuɛɛn ã bɔ, áketsal Nsia yi Ngesɛ yi Okwɛn o Nziã bvool ákeboo ãluu mbueel y'elyam bvieel. 36Ŋ'emwɛn ndɛ embuul e baal, ndɛ nyiĩ a bɔ yam ebɔɔ, ke ngwel wɛ bɔ al'ayii ɛ̃kwal ke ywel bvool nzuru alemeesool, onge emɛ̃mɛɛ̃ bvi eywɛn a ɔ̃nkiaal. 37Obobɔ, ndɛ olieel ayio a ndɛ ndiri: «Nsia yi aka onse nguun eli bibi, kɛn asal ali atsi-tsiri! 38Oŋɔ̃ ebuɛɛn nga-nguun kwɛn ndɛ ayuɔɔl asal onse nguun a ndɛ.»

Currently Selected:

Matie 9: ngz

Highlight

Copy

Compare