Matie 10

Antam kuun ye buaal

(Mak 3.13-19; Luk 6.12-16)

1Ŋ'eti Yeso ayio a ndɛ kuun ye buaal mbel, ndɛ owi bɔ waan li atswɛɛl ɛ̃fel mi ɛ̃bi-ɛ̃bi, bvool aboo ãluu mbueel y'elyam bvieel. 2Tal ãnkuũ m'antam kuun ye buaal: wu ɛ̃kwel Simɔ̃ wu ata me Piɛɛl, y'Andele wu muaan-ngoo a ndɛ, ye Dzak wu muaan a Dzebede, ye Dzaã wu muaan-ngoo a ndɛ, 3ye Filipe, ye Balatelemi, ye Toma, ye Matie wu ɔ̃twal-mpal, ye Dzak wu muaan a Alefe, ye Tade, 4ye Simɔ̃ wa nkel yi Adzelot, ye Yuda wu Isikaliot wu átiɔ Yeso.

Yeso oyuɔɔl antam ange-kuun ye buaal

5Yeso otam baal ange-kuun ye buaal obɔ, bu awi bɔ ãluo y’ãnkunkwa mã: «Ebee ola baal bɛn k'Ayuda wɛ oyi, ebee hɛ̃ onse bviil li Afi-Samali osam. 6Eyi ol’emɛmɛɛ̃ bvi nzɔ a Isalayɛl bvi edziɔɔn. 7Me nkuul a nkuul, eyi etee wɛn Okwɛn o ywel osyel tsotsoo. 8Eboo ba y'ãluu, eseel b'ákwi, esuul ba y'ãluu me leba akal tsɛtsɛ, etswɛɛl ɛ̃fel mi ẽbi-ẽbi. Awi byɛ ngwel, ewa hɛ̃ ngwel. 9Ebee ɔɔl obiri, ekal nzi, ekal nzi yi ãbvieel, onse posi. 10Ebee ɔ̃paa a dzwɛ obiri, ekal ekɔ bviaal, ekal asimpal, ekal ɔ̃mpaã, ke ngwel wu asal obvaan k’abɔɔ bvi-odza e ndɛ.»

11«Onse bviil lam lueel wuo onse ola bam bueel b'èsam byɛ, efuul mbuul wu obvaan m'oyɔɔ o byɛ, oŋɔ̃ ekal ola ndɛ tiil ye k'eyi byɛ. 12Ŋ’èsam byɛ onse nzɔ, ebio baal a nzɔ oyɔ. 13Okɛɛn bɔ ayɔɔ byɛ, opi o byɛ òkal ye bɔ. Okɛɛn bɔ k'ayɔɔ byɛ wɛ, opi o byɛ òkɔɔl ola byam. 14Okɛɛn, onse nzɔ ngamɔ̃ wuo onse bviil ngelemɔ̃, k'ayɔɔ byɛ wɛ, wuo k'ayoo ãyɛɛn ã byɛ, embal oŋɔ̃ bvool ekweel ɔ̃fel a ntaã e byɛ. 15Taa-taa bam, mɛ̃ eyɛɛn byɛ wɛn, me tsoo li ètsiil Nziã ãndɔɔ ã baal, fool li baal a Sodome ye Gomɔɔl ekieel ekal nkuual-a-nkuaal a fool li baal b'ãmboo omɔ̃.»

Ãmpal m'akieel atuual baal

(Mak 13.9-13; Luk 21.12-17)

16Etal, mɛ̃ ngyuɔɔl byɛ onge emɛmɛɛ̃ onse anyam a mpuru#10.16 Anyam obɔ ali onge amva b'edzwa.: Ekal angɔ-mwiĩ onge antaal, ekal ankinkyam onge ãkuun. 17Ekal y’onkyab, ke ngwel wɛ baal akieel abiri byɛ k'ãmbal m'ãnɛn m'Ayuda bvool apfel byɛ ɔ̃dzii onse ãnzɔ ã bɔ m'ãbuɛɛn. 18Akieel abiri byɛ ke nkwel ambiri y'akwɛn, me ndɔɔ a mɛ̃. Obobɔ, byɛ ekieel eyɛɛn me ndɔɔ a mɛ̃ ke nkwel a bɔ bvool ke nkwel a baal bɛn k'ayɛɛ Nziã wɛ. 19Ŋ'akieel abiri byɛ k’ãmbal, ebee nguo okɛɛ me b'èyɛɛn byɛ wuo m'emfa ki eyɛɛn byɛ. Ke ngwel wɛ, kɛn a me lio alili, Nziã ndyam akieel awa byɛ ãyɛɛn m’èyɛɛn byɛ. 20Ke ngwel wɛ, byɛ ke b'ekieel eyɛɛn wɛ, Ɔ̃fel a Tal a byɛ wu akieel ayɛɛn onse byɛ.

21«Muaan-ngoo akieel atiɔ muaan-ngoo kwɛn abam ndɛ. Tal akieel atiɔ muaan. Baan akieel akal ataal a tal ye ngoo, bvool akieel asa kwɛn awa bɔ etumbu ki lepfu. 22Baal bueel akieel abyal byɛ me ndɔɔ a nkuũ a mɛ̃. Kɛn a wu akieel akuru ɔ̃kwal tiil ntɔ, wu akieel abvuul.»

23«Ŋ'akieel atuaal byɛ mpal onse bviil ngelemɔ̃, ebal onse likyɛ. Taa-taa bam, mɛ̃ eyɛɛn byɛ wɛn, ye k'eya Muaan a mbuul, byɛ olɔ kɛn eman k'edziɔɔn ãbviil mbueel m'Isalayel wɛ.»

24«Ɔ̃yio k'anduru ɔ̃yiool a ndɛ wɛ, ɔ̃nkyal hɛ̃ si ngɔmɔ̃ wu onduru mfam a ndɛ pyɛ. 25Ki ebvaan m’ɔ̃yio, ki àkal onge ɔ̃yiool a ndɛ, ki ebvaan m’ɔ̃nkyal hɛ̃ ki àkal onge mfam a ndɛ. Okɛɛn mfam a nzɔ ati me Beledzebule, oŋɔ̃ yɛn k'àyɛɛn me baal a nzɔ a ndɛ wɛ mã!»

Mbuul wɛn ebvaan abal

(Luk 12.2-7)

26«Obobɔ, ebee ye buɔ o baal okal, ke ngwel wɛ ndɔɔ yam yueel yi eli m'odziɔɔn ekieel epal kal-a-kal. Ndɔɔ yam yueel hɛ̃ yi eli m'ofoo, akieel ayɛɛ yɔ. 27Ndɔɔ yi eyɛɛn mɛ̃ byɛ onse empeel, eyɛɛn yɔ me mwiĩ. Ndɔɔ yi eyɛɛn mɛ̃ byɛ m'ãmfi-mfya, etee yɔ ke ywel a sɛɛ e nzɔ.» 28Ebee baal b'abam nzuru a mbuul obal. Bɔ k'akoo k'abam omwiĩ wɛ. Wu ebal byɛ Nziã wu koo k'abam nzuru a mbuul y'omwiĩ o ndɛ onse ywɛn e mbaa. 29«K'abetiɔ answiĩ buaal m'enzi-nzi etsi-tsiri wɛ? Kɛn a ngɔmɔ̃ onse bɔ k'akoo k'abva me nsie wɛ, okɛɛn Tal a byɛ k'awi nkuul wɛ. 30Me b'otal byɛ, onkyam mpfu y'ɔ̃tswɛ a byɛ, Nziã oyɛɛ ɔ̃bvɛn a yɔ. 31Oŋɔ̃ ebee ye buɔ okal. Byɛ eli y'ɔ̃bvɛn, enduru ɔ̃bɔbɔ wu answiĩ.»

32«Obɔ otsɛn bɛn, mbuul wu akiool ke nkwel a baal ndiri ndɛ oli wa mɛ̃, mɛ̃ hɛ̃ ekieel ekiool ndɛ ke nkwel a Tal a mɛ̃ wa ke ywel. 33Kɛn a mbuul wu abee mɛ̃ ke nkwel a baal, mɛ̃ hɛ̃ ekieel ebee ndɛ ke nkwel Tal a mɛ̃ wa ke ywel.»

K'opi wɛ, epwel

(Luk 12.51-53; 14.26-27)

34«Ebee otsam wɛn mɛ̃ ngyi y’opi onse ɔ̃kiri: Hɛɛ̃-hɛ̃, mɛ̃ ke ngyi y’opi wɛ, ki ngyi mɛ̃ ye kyɛ epwel e mvel. 35Taa-taa, mɛ̃ ngyi ye ndɔ eka mpɛ̃-a-mpɛ̃ a muaan ye tal, mpɛ̃-a-mpɛ̃ a muaan wu ɔ̃kaal ye ngoo, mpɛ̃-a-mpɛ̃ ɔ̃kal a muaan y'okɔ wu ɔ̃kaal: 36Ataal a mbuul akieel akal baal a nzɔ a ndyam.#Mis 7.6»

Okuru o nzuru me Yeso

(Mak 8.34-35; Luk 9.23-24; 14.26-27)

37«Mbuul wɛn dzii li edzii ndɛ tal a ndɛ wuo ngoo a ndɛ enduru li edzii ndɛ mɛ̃, k'abvaan me mɛ̃ wɛ. Mbuul wɛn dzii li edzii ndɛ muaan a ndɛ wu bɔɔl wuo wu ɔ̃kaal enduru li edzii mɛ̃, k'abvaan me mɛ̃ wɛ. 38Mbuul wɛn k'abiri enkulusu e ndɛ me ndɔɔ yi anɔɔn a mɛ̃ wɛ, k'abvaan me mɛ̃ wɛ. 39Mbuul wu odzii k'abvuul elaã e ndɛ, àywɛn a lɔ. Kɛn a mbuul wu àywɛn a elaã e ndɛ me ndɔɔ a mɛ̃, àbɔɔ lɔ.»

Ebvakab

(Mak 9.41)

40«Mbuul wu ayɔɔ byɛ, mɛ̃ ayɔɔ. Mbuul wu ayɔɔ mɛ̃, ŋ’ayɔɔ wu oyuɔɔl mɛ̃. 41Mbuul wu ayɔɔ ɔ̃liaal-ɛ̃kiɛɛn a Nziã me ndɔɔ yɛn ndɛ oli ɔ̃liaal-ɛ̃kiɛɛn, ndɛ àbɔɔ ebvakab kiki y’ɔ̃liaal-ɛ̃kiɛɛn. Mbuul wu ayɔɔ mbuul wa dzu me ndɔɔ yɛn ndɛ oli dzu, ndɛ àbɔɔ ebvakab kiki ye mbuul wa dzu. 42Mɛ̃ eyɛɛn byɛ wɛn, mbuul wu awa onkyam mbiɔ a ãdza m’efyɛ ola ngɔmɔ̃ onse b’atsi-atsi ba, me ndɔɔ yɛn ndɛ oli ɔ̃yio a mɛ̃, taa-taa bam, ndɛ k’akoo k’aywɛn ebvakab ki ndɛ wɛ.»

Currently Selected:

Matie 10: ngz

Highlight

Copy

Compare