Matie 7
7
Obee b'ãndɔɔ ã bakyɛ otsiil
(Luk 6.37-38,41-42)
1Yeso bvool olieel ndiri: «Ebee ãndɔɔ ã bakyɛ otsiil, kwɛn oŋɔ̃ hɛ̃ abee mã byɛ otsiil. 2Ke ngwel wɛ, àtsiil ãndɔɔ ã byɛ onge b'ebetsiil byɛ mã bakyɛ, àmvɛɛl ãndɔɔ ã byɛ m'emvɛɛl li ebemvɛɛl byɛ mã bakyɛ. 3Ndɔɔ mã yi emwɛn yɛ efeel ki eli onse dziil e muaan-ngoo a yɛ, kɛn a yɛ k'amwɛn epaal ki ekwii ki eli onse dziil e yam wɛ? 4Emfa emã kyɛn yɛ koo k'ayɛɛn muaan-ngoo a yɛ wɛn: “Muaan-ngoo, sa mɛ̃ mbaal yɛ efeel ki eli onse dziil e yɛ”, kwɛn ŋɛn yɛ li y'epaal ki ekwii onse dziil e yam? 5Mbuul a pfuru! Ŋ’ɛ̃kwel kɛn mbaal epaal ki ekwii ki onse dziil e yam! M'emfa okyɛ, yɛ ol'obvi omwɛn kal-a-kal, me ndɔɔ yi ambaal efeel ki eli onse dziil e muaan-ngoo a yɛ.»
Eluɔ bvi ngel y'ãnkɔɔn m'ɔ̃bvɛn
6Yeso bvool olieel ndiri: «Ebee eluɔ bvi ngel ol'amva owa, owɛɛl bɔ ayekɔɔl me byɛ bvool atswi byɛ, ebee hɛ̃ ãnkɔɔn m'ɔ̃bvɛn ol'anguru otyal, kwɛn bɔ abee bvɛ me ntaã odziaal.»
Esɔɔ, ebii, ebɛɛl nzɔ
(Luk 11.9-13)
7Yeso bvool olieel ndiri: «Ebesɔɔ, àwa byɛ. Ebebii, byɛ èbɔɔ. Ebebɛɛl nzɔ, àdzweel byɛ yɔ. 8Ke ngwel wɛ, mbuul wu abesɔɔ abeyɔɔ. Mbuul wu abebii abebɔɔ. Mbuul wu abebɛɛl nzɔ abedzweel ndɛ yɔ. 9Ondɛ tal nã onse byɛ wɛn muaan asɔɔ esuɔ ola ndɛ, ndɛ owi ndɛ nkɔɔn? 10Wuo muaan asɔɔ nswi ola ndɛ, ndɛ owi ndɛ ntaal? 11Obobɔ, okɛɛn byɛ b'eli bam abi-abi eyɛɛ k'ewa baan a byɛ eluɔ bvi ngesɛ, oŋɔ̃ Tal a byɛ wa ke ywel wu akwɛɛn k'awa eluɔ bvi ngesɛ ola baal b'asɔɔ bvɛ ola ndɛ!»
Ngel yi nkiin
(Luk 6.31)
12Yeso bvool olieel ndiri: «Ãndɔɔ mbueel m'edzii byɛ kwɛn bakyɛ asa me ndɔɔ a byɛ, byɛ hɛ̃ esa mɔ̃ me ndɔɔ a bɔ: Omɔ̃ ãndɔɔ m’etam Ngel a Moyize y’ɛ̃nkaan mi aliaal-ɛ̃kiɛɛn a Nziã osa.»
Ɔ̃nywã a nzɔ ye nkuul
(Luk 13.23-24)
13Yeso bvool olieel ndiri: «Esam m'ɔ̃nywã a nzɔ wu ɔ̃tsi-ɔ̃tsi. Ke ngwel wɛ ɔ̃nywa a nzɔ wu abiri baal k'epfu oli wu ɔ̃nɛn, nkuul yi ayi okɔ hɛ̃ eli yi nɛn. B'anɔɔn a yɔ ali bibi. 14Kɛn ɔ̃nywa a nzɔ wu abiri baal k'elaã oli wu ɔ̃tsi-ɔ̃tsi, nkuul yi ayi okɔ hɛ̃ eli yi ntsi-ntsiri. B'abɔɔ yɔ k'ali bibi wɛ.»
Ɔ̃ti ye nsia e ndɛ
(Luk 6.43-44)
15Yeso bvool olieel ndiri: «Ekyab m'aliaal-ɛ̃kiɛɛn a mfya. Bɔ aya ola byɛ m’emfa bvi emɛmɛɛ̃. Kɛn a onse ɛ̃kwal, bɔ ali anyam a mpuru. 16Byɛ ekieel eyɛɛ bɔ m'ɛ̃sal ɛ̃ bɔ. Byɛ ekoo k'eka nsia e bvine m'ɔ̃ti wu ãnsiɛɛn? Wuo byɛ ekoo k'eka nsia e fig m'ɔ̃ti wu ãnsiɛɛn ɔ̃kyam? 17Ɔ̃ti wa ngesɛ aburu nsia yi ngesɛ. Ɔ̃ti wu ɔ̃bi-ɔ̃bi hɛ̃ aburu nsia yi mbi-mbi. 18Ɔ̃ti wa ngesɛ k'aburu nsia yi mbi-mbi wɛ. Ɔ̃ti wa y'oluu hɛ̃ k'aburu nsia yi ngesɛ wɛ. 19Ɔ̃ti ndyam wueel wɛn k'aburu nsia yi mvɛ wɛ, àkii ndɛ, bvool àtyal ndɛ onse mbaa#Luk 3.10. 20Obobɔ, byɛ èyɛɛ aliaal-ɛ̃kiɛɛn a mfya m’ɛ̃sal ɛ̃ bɔ.»
Oyɛɛn y'osa
(Luk 6.46; 13.25-27)
21Yeso bvool olieel ndiri: «K'eli bueel b'ata mɛ̃ me: “Mfam, Mfam!”, b'akieel asam onse Okwɛn o ywel wɛ, eli kɛn a ndɛ ondɛ wu asa ãndɔɔ m'etam Tal a mɛ̃ wa ke ywel osa. 22Me tsoo li ekieel etsiil Nziã ãndɔɔ ã baal, bibi akieel aliaal mɛ̃ ndiri: “Mfam, Mfam, ke me nkuũ a yɛ wɛ, k'ékeliaal bee ãndɔɔ m’ãfa ola Nziã? Ke me nkuũ a yɛ wɛ, k'éketswɛɛl bee ɛ̃fel mi ɛ̃bi-ɛ̃bi? Ke me nkuũ a yɛ wɛ, k'ékesa bee emvieel bibi?” 23Obobɔ, mɛ̃ ekieel etsiil oyɛɛn kal-a-kal wɛn: “Mɛ̃ lɔɔ-okal ke ngyɛɛ byɛ wɛ, embal bam tsotsoo a mɛ̃, byɛ baal b'ebesa ãbi!”»
Ãnzɔ mbuaal
(Luk 6.47-49)
24Yeso bvool olieel ndiri: «Obɔ otsɛn bɛn, mbuul wu oyoo ãyɛɛn me ngyɛɛn mɛ̃, bvool osi mɔ̃, ndɛ àkal onge mbuul nga-ãyal wu otuu nzɔ a ndɛ nkal a nkɔɔn. 25Mvel ondwɔɔ, ãnzal ãluul, mfel obwel me yɔ, kɛn a yɔ k'ebvi wɛ, ke ngwel wɛ átuu yɔ nkal a nkɔɔn. 26Kɛn a mbuul wu oyoo ãyɛɛn me ngyɛɛn mɛ̃, bvool k'asi mɔ̃ wɛ, àkal onge mbuul wu ewool wu otuu nzɔ a ndɛ nkal a nsie ntu, k'abɛɛn yɔ otuu nkal a nkɔɔn wɛ. 27Mvel ondwɔɔ, ãnzal ãluul, mfel obwel me yɔ, yɔ ebvi, bu etsɔɔn yam yueel.»
Omfam o Yeso
(Mak 1.22; Luk 4.32)
28Ŋ'eman Yeso ãtee omɔ̃, esi baal ɛ̃kam bibi m'emfa ki éketee ndɛ. 29Ke ngwel wɛ, ndɛ áketee bɔ y'omfam bueel, k'onge ayiool b'ãngel a bɔ wɛ.
Currently Selected:
Matie 7: ngz
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
